Ululahu Kings 2 - Buka Blahi Ka Cheke Holo

Nogna cheke leghu lahu mae Devet ka mae Solomon

¹ Kate namo lehe na, mae Devet ne cheke eghu ka mae Solomon, mae thugna na,

² “Nogu narane iara te mala lehe na la namohi, iagho kegra heta jateula nalhaꞌu eghu.

³ Eghuteuna iagho mala eni unha te chekeni nou Lord God na. Iagho leghudi nogna vetula nei nogna cheke teu mana te rioriso soru ka nogna buka mae Moses ra. Jame te edi iagho glepo igre na, neuba iagho ne tei au delei, nou gloku iaghore ginauna thofno keli fara.

⁴ Jame te leghuni iagho Lord na, mana ginauna eni unha teke nhaꞌa chekeni ka iara tifa ia. Mana neke cheke eghu ka iara, ‘Jame thofno leghu ghau iara fabrahu iheire te karha mei ka vikemu iagho igre ka nakarhadi nei gaoghathodi teure meuna, leuleghu fata na kaisei ka mare ginauna mala king gna Israel.’

⁵ “Eghuteuna keha glepo na igne. Iagho laseni unha teke eni ranghi ghau iara mae Joab, thugna Seruia tifa ia. Mana neke aknu falehe phei mae komanda ka armi gna Israel: mae Abna thugna mae Ner ghe mae Amasa thugna mae Jeta. Mana theome aknu falehedi phiamare ka magra, nu mana neke eni igne ka vido pharikeli kolho. Mana lilisei dadaradi phiamae igre ka nogna nhugha nei sadol teure. Eghume, mae igne nabagna te au papara.

⁶ Eghume, iagho parani mana leghuni unha te ghathoni iagho na. Eghuteuna iagho thosei snakreni mana mala lehe ka pharikeli.

⁷ “Nu iagho mala keli ranghidi thugna mae Basilae, maegna Gilead ra. Iagho hata meidi mala ima fabrahu ka sugamu na. Naugna tifa na, kani teke rikhani iara mae thabusimu Absalom na, mare neke thofno keli fara ranghi ghau iara.

⁸ “Eghuteuna iagho ghathoni mae Simei, thugna mae Gera ka namono Bahurim, ka nogna vido glose vikegna mae Benjamin. Ka narane teke soru iara Mahanaem igne, mana neke cheke fadiꞌa ghau iara. Nu kate mei thafo ghau iara jare ka khoꞌu Jordan na, iara neke eni kaisei nhaꞌa cheke ka mana ka nanghagna Lord, eigna te mala thosei faleheni iara mana na.

⁹ Nu gognarona iagho parani mana. Naugna iagho kaisei mae glalase fara. Eghume iagho laseni ka unha puhi nate leghuni iagho te mala faleheni mana na.”

Mae King Devet ne lehe

¹⁰ Aonu kate lehe mae Devet na, mare ne giugiluni mana Jerusalem.

¹¹ Mana neke funei fruni Israel phiatutu finogha. Fitu finogha Hebron, eghuteuna tolufulu thilo finogha Jerusalem.

¹² Ke leghugna tela lehehi mae Devet igne, mae Solomon neke tughuni mana ka sapegna king. Mae Solomon gne kaisei king nheta fara, theo kaisei glepo tangomana te faparini mana na.

Mare ne faleheni mae Adonaeja

¹³ Kaisei narane, mae Adonaeja thugna Hagit igne tei ne filoni Batseba idogna mae Solomon. Kate filoni mana na, Batseba ne ghusna eghu ka mana, “Iagho mei ka pharikeli?” Mae Adonaeja ne cheke eghu, “Uve, iara mei ka pharikeli!”

¹⁴ Aonu, mana neke cheke eghu, “Iara au kaisei glepo kolho te magnahaghei mei chekeni ka iagho na.” Aonu Batseba ne cheke eghu ka mana, “Unha glepo te magnahaghei mei chekeni iagho ka iara na?”

¹⁵ Mana ne cheke eghu, “Uve, ulu lahu na naikno te gnafa Israel igre neke ghatho ghau iara te mala king gna Israel. Nu unha te ghathoni thegna Lord na tela king mae thabusigu iara igne, theome iara.

¹⁶ Eghume, gognarona iara au kaisei nogu faghusna kolho. Iagho tangomana te faꞌuveni nogu thore iara igne?” Batseba ne cheke eghu ka mana, “Unha te magnahagheni iagho na?”

¹⁷ Aonu mae Adonaeja ne cheke eghu, “Iara magnahaghei nigho iagho te toreni King Solomon mala snakreni Abisag gaꞌase gna Sunem igne mala khetogu iara. Iara laseni, king ginauna theome fatheꞌoni nou cheke iagho na.”

¹⁸ Batseba ne cheke eghu ka mae Adonaeja, “Uve, iara ginauna tei cheke eimu iagho ka king.”

¹⁹ Aonu Batseba tei ne filoni King Solomon eigna igne. Kate ruma Batseba ka suga na, king kegra haghe ne pogho soru ka naꞌa. Aonu King Solomon gnokro soru ka nogna sape nafnakno na, eghuteuna mare hata kaisei sape nafnakno ka kuin, idogna na, ne gnokro rhegna mana.

²⁰ Batseba ne cheke eghu, “Iara au kaisei glepo ikoi kolho te mei toreni ka iagho gne, iagho thosei thodoni unha te thore iara igne.” King ne cheke eghu, “Ido tore sagho! Iara theome thodoni unha te toreni iagho na.”

²¹ Aonu Batseba ne cheke eghu, “Iara magnahaghei nigho iagho te snakreni Abisag gaꞌase gna Sunem igne mala khetogna tighamu Adonaeja.”

²² Kate nomhini igne, King Solomon ne cheke eghu ka idogna na, “Ido, naugna unha sagho te tore ghau iara te mala snakreni Abisag ka mae Adonaeja gnea? Iagho jame jaola tore ghau iara mala snakre lao sape nafnakno na ka mana. Naugna mana neke kulu karha ka iara. Eghuteuna pris Abiata ghe mae Joab ra phileu ka mana.”

²³ Aonu King Solomon ne nhaꞌa cheke ka nanghagna Lord ne cheke eghu, “Naugna mae Adonaeja te toreni glepo igne, mana mala lehe! Jame te theome eni iara igne na, God ginauna tangomana te falehe ghau iara na.

²⁴ Tutuani, Lord mae ihei te karha na vahi ghau iara hi te mala tughuni mae kmagu te mala king na. Eghuteuna mana nhaꞌa chekehi ka vikegu iara gne te mala king fabrahu na. Te chekeni iara ka iagho na, mae Adonaeja gne mala lehe gognaro gne.”

²⁵ Aonu King Solomon ne chekeni mae Benaea mala faleheni mae Adonaeja. Eghume, mae Adonaeja ne lehe.

King Solomon ne kuru fapuloni mae Pris Abiata

²⁶ King Solomon ne cheke eghu ka pris Abiata, “Iagho ke figri ka namonomu Anatot. Iagho nabamu te lehe na, nu iara na theome falehe nigho iagho gognarona, naugna tifa na iagho neke toghoni mae kmagu iara ia neke pala nogna Bokis Blahi Lord na. Eghuteuna iagho neke ruma haghe balugna mana ke lamnadi narane te ninhigrana tura.”

²⁷ Aonu King Solomon ne fagnafani mana ka nogna gloku pris. Ka puhi igne, cheke teke chekeni Lord tifa eigna vikegna pris Ilae ka namono Saelo ia ne thoke mei tutuani.

Mae Joab ne lehe

²⁸ Kate nomhini mae Joab eigna igne mana ne mhaghu nogna fara. Naugna mana laseni, neuba mana neke theome phile balugna mae Absalom tifa, nu mana neke phile ka mae Adonaeja. Aonu mana rikha ne tei ka Suga Tapuale te Blahi na ne tei loku ka olta na mala theome faleheni mare.

²⁹ King Solomon ne nomhini mae Joab te rikha te tei ka Suga Tapuale te Blahi na te tei au teu ka olta na, aonu mana ne cheke eghu ka mae Benaea, “Iagho tei aknu faleheni mana.”

³⁰ Aonu mae Benaea tei ka Suga Tapuale te Blahi na ne cheke eghu ka mae Joab, “King magnahaghei nigho iagho te jifla ka vido igne.” Nu mae Joab ne cheke eghu, “Theo, iagho falehe ghau iara agne!” Aonu mae Benaea figri neke cheke ka king unha te chekeni mae Joab igne.

³¹ King ne cheke eghu ka mana, “Eni sagho unha te chekeni mae Joab na! Faleheni nei giugiluni eghu mana. Mala nu iara nei vikegna mae kmagu teura theome naba te au papara eigna unha teke eni mana kani teke fiti aknu falehedi mae Abna mae komanda ka armi gna Israel ghe mae Amasa mae komanda ka armi gna Juda tifa ra.

³² Lord ginauna nake tughu fapulo ka mae Joab dadaradi phia mae tura, naugna mae kmagu iara na theome laseni mae Joab te aknu falehedi mae Abna, thugna mae Neri mae komanda ka armi gna Israel, ghe mae Amasa, thugna mae Jeta mae komanda ka armi gna Juda. Phia mae igre thofno keli fara nei doglo eghu uluni mae Joab.

³³ Mae Joab nei vikegna teu mana ra nabadi te au papara eidi dadaradi mae Abna ghe mae Amasa ra. Nu ghehati vikegna mae Devet te gnokro ka sapegna king igre, Lord ginauna togho ghami ghehati mala au fabrahu ka pharikeli.”

³⁴ Aonu mae Benaea tei ne aknu faleheni mae Joab, eghuteuna mare tei ne giugiluni mana ka nogna namono na ka namono nagou na.

³⁵ King ne liliseini mae Benaea thugna mae Jehoeada mala komanda ka nogna armi na tughuni mae Joab. Eghuteuna pris Sadok tughuni mae Abiata.

Mae Simei ne lehe

³⁶ Aonu King Solomon ne fatei cheke ka mae Simei mala mei filoni mana. Kate mei mana na, King ne cheke eghu ka mana, “Iagho na horo kaisei suga Jerusalem mala au fabrahu iagho tagna. Eghuteuna iagho thosei jifla kokoni namono biꞌo igne.

³⁷ Jame te jifla iagho ka namono biꞌo igne, te tei kasa ka glogu Kidron ana, ghehati ginauna aknu falehe nigho, naugna nou najafra themu.”

³⁸ Aonu mae Simei ne cheke eghu, “King, nou cheke iagho igne thofno keli fara, iara ginauna leghuni unha te chekeni iagho igne.” Aonu mae Simei ne au raugha Jerusalem.

³⁹ Nu ke leghu thilo finogha, phei nogna mae snekare ne rikha ne tei Gat, ka king Akis thugna mae Maka. Kate nomhini mae Simei phiamare tei au jare Gat teuna,

⁴⁰ mana tarabana nogna dongki na ne tei filodi phiamare jare. Eghuteuna mana hatadi phiamare neke pulo Jerusalem.

⁴¹ King Solomon nomhini mae Simei teke tei Gat eghuteuna kela pulo meihi Jerusalem.

⁴² Aonu mana ne kilo meini mae Simei ne cheke eghu ka mana, “Iagho neke nhaꞌa chekehi ka nanghagna Lord mala thosei jifla iagho Jerusalem. Te chekeni iara na jame te jifla iagho ka namono biꞌo igne na, iagho ginauna lehe. Eghuteuna iagho neke cheke eghu, ‘Keliu kolho. Iara ginauna leghuni unha te chekeni iagho na.’

⁴³ Eghume, naugna unha sagho te theome leghuni nou nhaꞌa cheke na, eghuteuna theome leghuni nogu cheke iara na teu ignea?”

⁴⁴ Iagho lasenihi glepo te diꞌa teke edi iagho ka mae kmagu iara mae Devet ia. Eghume gognarona Lord na para nigho iagho eigna igne.

⁴⁵ Nu mana ginauna fablahi ghau iara King Solomon, eghuteuna mana ginauna na vavahi kaisei ka vikegna mae Devet mala king fabrahu.

⁴⁶ Aonu king neke chekeni mae Benaea mala faleheni mae Simei. Aonu mae Benaea tei ne aknu faleheni mana. Eghume nogna nolaghi mae Solomon te mala funei fruni na thofno rheta farahi.