Ululahu Kings 19 - Buka Blahi Ka Cheke Holo

Profet Elija rikha ne tei ka Thogele Sanai

¹ King Ehab neke pulo Jesrel ne toutonu ka Kuin Jesebel gobigna lepo teke edi Profet Elija re. Eghuteuna mana jaola ne toutonu eigna te falelehe mae Elija nogna profet te gnafa Baal.

² Aonu Kuin ne fatei cheke igne ka mae Elija, “Iara ginauna falehe nigho iagho jateula teke falehedi iagho nogna profet Baal ra eghu. Nathuꞌu jateula gognarogne teuna, iagho ginauna lehe. Jame te theome eni iara igne na, god tuare tangomana te falehe ghau iara na.”

³ Kate nomhini mae Elija cheke igne, mana ne mhaghu nogna fara ne rikha. Mana hata balugna nogna mae gloku na, eghuteuna phiamare rikha ne tei ke mata Juda. Eghuteuna mana ne snakreni nogna mae gloku na mala au ka namono biꞌo Bereseba.

⁴ Aonu mae Elija nolo kaisei narane thongana ne tei ka namono nagou na. Mana tei ne filoni kaisei gaju ikoi ne tei gnokro ka naungo gna gaju igne ne tarai, “Nabahi! Lord, iagho hata fadelei nakarhagu iara gne. Te keli na iara mala lehe jateula mae kmagu ra eghu kolho.”

⁵ Aonu mana thuru soru ke parigna gaju igne ne thuru iho. Eghuteuna kate thuru teu mana igne, kaisei engel megei nga ne mei habo ka mana ne cheke eghu, “Iagho kegra haghe ghamu.”

⁶ Aonu mana kegra haghe ne filoni kaisei bret teke gahu ka thina ngaja, balugna kaisei botol khoꞌu. Mana ghamu nei koꞌu neu. Eghuteuna gnafa teuna, mana neke thuru soru pari.

⁷ Eghuteuna engel nogna Lord igne mei ne fadofrani mana ne cheke eghu, “Khegra haghe ghamu. Jame te theo iagho na, iagho ginauna theome naba te tei na.”

⁸ Aonu mana kegra haghe ne ghamu nei koꞌu neu. Eghuteuna mana rheta ne nolo nabagna phiatutu narane ne ghilei tei posa ka Thogele Sanai, nogna thogele blahi God.

⁹ Ka vido igne mana tei ne ruma ka kaisei gluma thina ne au neu jare. Aonu Lord ne ghusna eghu ka mana, “Elija! Iagho mei eni unha agne?”

¹⁰ Eghuteuna mana ne cheke eghu, “Lord, iagho mae ihei te au nolaghi fateote'o. Leuleghu fata na iara thofno ghatho tahu nigho ne loku ranghi nigho. Nu naiknodi Israel igre, tirodini nou nhaꞌa cheke iagho na. Mare paꞌe soru nou olta iagho ra, eghuteuna mare aknu falehe nou profet iagho ra. Kaisei iara ngala te au na, eghuteuna mare jaola fariuriu mala falehe ghau iara.”

¹¹ Eghuteuna Lord ne cheke eghu ka mana, “Iagho jifla tei kosi, eghuteuna iagho ari thafo ghau iara ke kligna thogele, naugna Iara Lord namo mei salaꞌu agne.” Eghuteuna mana ne kuru mei kaisei nuri biꞌo jateula kaisei saeklon neu ne nghali thogele igne ne phike thina re. Nu Lord na theome au ka nuri igne. Ke leghugna nuri igne, glose na nghali ka nakheu. Nu Lord na jaola theome au ka nakheu igne.

¹² Ke leghugna nakheu igne, khaꞌaghi biꞌo ne jifla mei. Nu Lord na jaola theo ka khaꞌaghi igne. Aonu ke leghugna khaꞌaghi igne, kaisei naogla ikoi ne cheke mei.

¹³ Kate nomhini profet Elija naogla igne, mana ne toku tafru tathagna nei foflogna teure ne jifla mei ne kegra ke ulugna gluma thina igne. Aonu mana ne nomhini Lord ne cheke eghu mei ka mana, “Ghema Elija, unha te mei eni iagho agne na?”

¹⁴ Mana ne cheke eghu, “Lord, iagho mae ihei te au nolaghi fateote'o. Leuleghu fata na iara thofno ghatho tahu nigho fara ne loku ranghi nigho. Nu naiknodi Israel igre tirodini nou nhaꞌa cheke iagho na. Mare paꞌe soru nou olta iagho ra, eghuteuna mare aknu falehe nou profet iagho ra. Kaisei iara ngala te au na, eghuteuna mare jaola fariuriu mala falehe ghau iara.”

¹⁵ Aonu Lord ne cheke eghu, “Iagho ke pulo mala tei ka namono nagou rhegna namono Damaskas. Kate tei iagho jare na, iagho tofa oel ka phaꞌugna mae Hasael, fablahini mana mala king gna Siria.

¹⁶ Eghuteuna iagho tofa oel ka phaꞌugna mae Jehu, thugna mae Nimsi mala king gna Israel. Eghuteuna iagho tofa oel ka phaꞌugna mae Elisa, thugna mae Safat maegna Abel-Mehola, fablahini mana mala profet ke tughu nigho iagho.

¹⁷ Kate king mae Hasael igne, mana ginauna na aknu falehe kmana naikno. Jame keha te rikhani mana na, mae Jehu ginauna aknu falehedi mare. Eghuteuna jame keha te rikhani mae Jehu na, mae Elisa ginauna aknu falehedi mare.

¹⁸ Neuba, iara au fitu thogha naiknodi Israel te tirodi pogho soruni nei gnanghoni teu mumuju god Baal, eghuteuna mare ginauna theome lehe.”

Mae Elisa ne leghuni profet Elija

¹⁹ Profet Elija jifla ka Thogele Sanai neke pulo Israel. Eghuteuna mana tei ne hironi mae Elisa, thugna mae Safat. Elisa loku ka nogna nagare na ka kaisei plao te korho ka phei buluka. Eghuteuna nogna mae gloku mana re loku ka keha nabotho kaisei plao mala dokha glose. Aonu mae Elija ne hata koko nogna pohe brahu na ne nhaꞌa lao ka mae Elisa, igne kaisei fagaglana eigna mae Elisa teke tughuni mana na.

²⁰ Mae Elisa lisa soru nogna plao na ne leghuni mae Elija. Mana ne cheke eghu, “Snakre ghau iara mala tei kubaedi iara ido ghe mama ra, eghuteuna iara ginauna nake pulo mei mala leghu nigho iagho.” Elija ne cheke eghu ka mana, “Iagho ke pulo. Nu iagho ghaoghatho fakeli ka unha te eni iara ka iagho igne.”

²¹ Ke leghu mae Elisa neke pulo ka nogna nagare na. Mana ne aknu falehe phei nogna buluka ra, eghuteuna mana ne koko lao ka khaꞌaghi thaba mala plao ra, eghuteuna gahu nafnahidi phei buluka igre ka khaꞌaghi. Aonu mana ne tufa nafnahi igre ka naikno gna namono na. Gnafa teuna, mana tei ne leghuni profet Elija mala toghoni mana.