Ululahu Kings 17 - Buka Blahi Ka Cheke Holo

Profet Elija cheke eigna Israel ginauna theome nakhete

¹ Profet Elija mae gna Tisbe, ka nohi Gilead. Mana tei ne cheke eghu ka King Ehab, “Iara nogna mae gloku Lord, nodi God mae Israel te karha te tifa. Ka nanghagna Lord iara na cheke fadoglo ari ka iagho, ginauna na theome nakhete keha finogha. Jare ginauna theo kaisei nakhete ba nabubla nate soru mei na ghilei chekeni iara na teke soru mei nakhete na.”

² Eghuteuna Lord ne cheke eghu ka mae Profet Elija,

³ “Iagho jifla ka namono igne mala tei poru ka Jari Kerit ke maghati Khoꞌu biꞌo Jordan.

⁴ Iagho ginauna na tangomana te tei koꞌu ka khoꞌu te au ka vido tuana, iara neke kulu chekehi ka nanghaji ra mala pala mei gano ka iagho.”

⁵ Aonu mana ne leghuni cheke gna Lord igne ne tei au ka Jari Kerit.

⁶ Mana ne koꞌu jare ka khoꞌu ikoi igne, eghuteuna fei hamerane nei fei grafi teuna nanghaji te pala te mei bret nei nafnahi teu koba ka mana na.

Profet Elija ne tei au Serefat ka suga gna kaisei naikno biꞌo

⁷ Mana au neu jare ne ghilei krango khoꞌu ikoi igne, naugna ne theome nakhete.

⁸ Aonu Lord ne cheke eghu ka mae Elija,

⁹ “Iagho tei au ka namono biꞌo Sarefat rhegna Saedon, kaisei glehe kokoi au ka namono biꞌo tuana. Iara la chekehi ka naꞌa te mala togho nigho ka gano na.”

¹⁰ Aonu mae Elija kegra haghe ne tei Sarefat. Kate tei namo ka grengathagna namono te bara ka thina na, mana ne filoni kaisei naikno biꞌo glehe kokoi te uge gaju teuna. Eghuteuna mana ne cheke eghu ka naꞌa, “Iagho famei katha khoꞌu mala koꞌu iara.”

¹¹ Eghuteuna kate tei naikno biꞌo na te mala hata khoꞌu teuna, mae Elija ne eha eghu tei ka naꞌa, “Iagho jaola hata mei keha bret.”

¹² Eghuteuna gaꞌase igne ne cheke eghu ka mana, “Thono kokhoni ghita fara! Ka nanghagna Lord nou God mae ihei te karha fabrahu te tifa te tifa, iara theo kaisei bret. Iara au kaisei kapu flaoa, nei katha oel eghu kolho. Iara mei hata katha gaju mala gahu katha gano tuana mala ghamu ghepa thugu. Tuana ngala leghu lahu gna ghemi gano ghepa na, jau ke leghu na ghepa ginauna lehe.”

¹³ Nu mae Elija ne cheke eghu ka naꞌa, “Thosei nanga nou, iagho posa ka namono mala gahu gano te chekeni iagho tuana. Nu ulu lahu na iagho eni kaisei bret ikoi ka flaoa tuana mala hata mei ka iara. Eghuteuna ke leghu na iagho tangomana te eni unha te salaꞌui na malami ghopa thumu na.

¹⁴ Naugna Lord nodi God mae Israel igne ne cheke eghu, ‘Flaoa igne theome tangomana te hui na, eghuteuna oel igne theome tangomana te peso na eghu, ghilei thoke mei narane Lord nate kuru soru mei nakhete ka nauthoglu igne.’ ”

¹⁵ Aonu naikno biꞌo igne posa ka namono na ne eni unha teke chekeni mae Elija na, eghuteuna leuleghu narane na, naikno biꞌo igne ghe thugna, nei mae Elija eghu, retilo theome kmoꞌe ka gano na.

¹⁶ Flaoa nei oel teu igre ne theome tangomana te gnafa na jateula teke chekeni Lord ka mae Elija ia neu.

¹⁷ Ke leghudi igre, thugna nalhaꞌu naikno biꞌo te khotogna suga te au mae Elija igne ne fogra fara ne ghilei lehe.

¹⁸ Aonu idogna na ne cheke eghu ka mae Elija, “Iagho nogna mae gloku God, naugna unha site eni iagho ka iara gnea? Jau iagho mei agne mala ke ghathodi iara nakhibogu gre, mala faleheni thugu iara gne!”

¹⁹ Mae Elija ne cheke eghu ka naꞌa, “Iagho hata mei mae sitei na ka iara.” Aonu mae Elija hata mae sitei na ka idogna na, mana pala ne haghe kligna ka chogho te thuru tagna na. Mana ne fathuru soru mae sitei igne ka nogna sape na,

²⁰ eghuteuna mana ne tarai heta eghu, “Lord nogu God, naikno biꞌo igne reireghi fakeli ghau iara. Naugna unha sagho te eni puhi biꞌo ka naikno biꞌo ignea? Naꞌa snakre ghau iara mala au agne, aonu iagho lisa lao ne lehe thugna na.”

²¹ Eghuteuna mae Elija ne thuru ke kligna gna mae sitei na thilo fata. Mana ne tarai ka Lord, “Lord, nogu God, iagho ke tusu fapulo nakarha na ka mae sitei igne.”

²² Aonu Lord ne nomhini nogna tharai mae Elija igne, eghuteuna mana neke tusu fapulo nakarha na ka mae sitei igne neke keli fapulo!

²³ Mae Elija pala neke soru funu ka chogho kligna na neke tusu fapulo ka idogna na, ne cheke eghu, “Filo sagho, thumu iagho na kela karhahi!”

²⁴ Aonu naikno biꞌo igne ne cheke eghu ka mae Elija, “Tutuani fara, iara gognaro na lase nigho iagho kaisei nogna mae gloku God. Eghuteuna unha te chekeni iagho na thofno mei funugna ka Lord!”