Ululahu Kings 16 - Buka Blahi Ka Cheke Holo

¹ Kaisei narane, Lord ne cheke ka profet Jehu, thugna mae Hanani mala tonu fajiflani cheke igne ka mae Basa. Igne chekegna Lord na,

² “Ghema Basa, tifa na iagho neke kaisei fiti mae kolho, nu gognarona iara neke vahi nigho iagho mala king ranghidi nogu naikno iara te au Israel igre. Nu iagho tapla jafra fabrahu ka nakhibo jateula teke eni King Jeroboam tifa ia neu. Eghuteuna iagho jaola batudi naiknodi Israel igre ka nakhibo. Igne te thono diꞌataguni fara iara ka iagho na.

³ Eghume, iara ginauna goigoni nigho iagho baludi naikno te gnafa ka thabuknamu iagho igre. Iara ginauna goigoni ghami ghotilo jateula teke eni iara ka mae Jeroboam tifa ia eghu.

⁴ Jame te lehe keha ka thabuknamu iagho igre ke lamna namono biꞌo na, khuma ginauna mei ghamu thinidi re. Eghuteuna jame te lehe mare mata na, nanghaji re ginauna mei ghamudi mare.”

⁵ Keha glepo teke edi King Basa, nei nogna nolaghi biꞌo te mala funei frunidi naiknore, mare rioriso soruhi ka Buka Eidi Glepo Teke Edi Hatimare Mae King Di Israel.

⁶ Kate lehe mana na, mare ne giugiluni mana Tiasa. Thugna mana mae Ela neke king tughuni mana na.

⁷ Chekegna Lord na ne mei ka mae profet Jehu mala tei cheke ka King Basa nei tharaknagna, eigna Lord ginauna goigonidi mare. Naugna King Basa gne neke edi kmana glepo te thono diꞌa fara te theome doglo ka tathagna Lord jateula King Jeroboam nei tharaknagna teke edila tifa ra. Igre nafnata puhi te thono diꞌatagnadi fara Lord. Naugna Basa jaola neke falehedi vikegna Jeroboam.

King Ela gna Israel

⁸ Ka varadaki namno finogha te king mae Asa Juda igre, Ela thugna mae Basa igne ne kegra king gna Israel. Mana neke king ka namono Tiasa phei finogha.

⁹ Simri kaisei mae komanda, mana mala magra ka King Ela. Mae Simri mae funeigna kaisei nogna tothoghei chariot. Aonu mae Simri ne hironi kaisei nabrou te mala faleheni King Ela. Kaisei narane, king au neu Tiasa, mana koꞌu waen neu ka sugagna mae Arasa mae ihei te mae biꞌo ka sugagna king.

¹⁰ Aonu mae Simri ne tei ruma ka suga igne ne aknu faleheni King Ela. Eghuteuna mae Simri ne vahini thegna neke king. Glepo igne ne thoke mei ka varadaki fitu finogha te king Asa Juda.

¹¹ Ka narane te king mae Simri igre, mana ne aknu falehe mae te gnafa ka tharaknagna mae King Basa baludi kheragna mana re.

¹² Aonu mana ne thofno goigoni ni fara tharaknagna King Basa na jateula nogna cheke Lord teke chekeni Profet Jehu ranghini King Basa tifa ia.

¹³ Puhi igre ne thoke mei, naugna King Basa ghe thugna mana Ela igre ne tapla jafra ka nakhibo, eghuteuna phiamare batudi naiknodi Israel gre ka nakhibo. Eigna mare ne pogho soru ka mumuju god. Eghuteuna Lord na thono diꞌatagna fara ka glepo te diꞌa te edi mare igre.

¹⁴ Keha glepo te edi King Ela igre mare rioriso soru ka Buka Eidi Glepo Teke Edi Hatimare Mae King Di Israel igre.

King Simri gna Israel

¹⁵ Ka varadaki fitu finogha te king mae Asa Juda igre, mae Simri ne king Israel ne au soru Tiasa, eghuteuna mana ne king fitu narane kolho. Ka narane tuare, armi gna Israel na mei ne kegra faligohoni namono biꞌo Gibeton ka kantri Filistia mala magra.

¹⁶ Kate nomhini mae soldia di Israel gre te aknu falehe mae Simri king gna Israel na, mare ne vahini komanda Omri mala king gna Israel.

¹⁷ Aonu mae Omri jifla Gibeton balugna nogna armi na, aonu mare tei ne kegra ligohoni namono biꞌo Tiasa mala magra.

¹⁸ Ka narane igre mae Simri au neu Tiasa, eghuteuna kate laseni mana tela hatahila mare namono igne, mana rikha ne tei ruma ka nogna suga biꞌo king na ne gnubra suga igne ne lehe jare.

¹⁹ Mana ne lehe naugna mana ne tapla jafra ka nakhibo, eghuteuna jaola mana edi kmana glepo te theome doglo ka tathagna Lord na jateula teke edi King Jeroboam tifa ra neu. Eghuteuna mana batudi naiknodi Israel mala jaola tapla jafra ka nakhibo.

²⁰ Keha glepo teke edi King Simri nei thoutonu eigna gaoghatho mala faleheni king teu igre mare rioriso soru ka Buka Eidi Glepo Teke Edi Hatimare Mae King Di Israel.

King Omri gna Israel

²¹ Ke leghugna te lehe mae Simri igne, vikegna Israel na ne fnota pea ka phei tothoghei. Kehare magnahagheni mae Tibni thugna mae Genat te mala king gna Israel. Eghuteuna kehare magnahagheni mae Omri te mala king gna Israel na.

²² Nu iheire te leghuni mae Omri igre ne uludi iheire te leghuni mae Tibni. Aonu mae Tibni ne lehe, eghuteuna mae Omri ne king gna Israel.

²³ Ka tolufulu kaisei finogha te king mae Asa Juda igre, mae Omri ne king Israel. Mana neke king nabotho phei finogha, ulu lahu na mana au neke king ka namono biꞌo Tiasa nabagna namno finogha.

²⁴ Ke leghu, mae Omri ne foli thogele Samaria igne ka mae Sama, mae khotogna thogele igne, ka fitusalei kilo silva. Mana ne eni kaisei namono biꞌo ka thogele igne ne kiloni Samaria, ka nanghagna mae Sama, mae ihei teke khotogna glose igne.

²⁵ Nu mae Omri ne edi kmana nakhibo te thono diꞌa fara ka tathagna Lord na, salaꞌudi fara mae iheire teke king ke ulugna mana ra.

²⁶ Mana leghuni puhigna mae Jeroboam te thono diꞌa fara ia. Mana khibo ka tathagna Lord, nodi God mae Israel. Eghuteuna mana jaola ne batudi naiknodi Israel igre ne tarai ka mumuju god. Aonu Lord ne thono diꞌatagna fara ka nakhibo te edi mare igre.

²⁷ Keha glepo te edi King Omri nei nogna nolaghi biꞌo te mala funei frunidi naiknore, mare neke rioriso soru ka Buka Eidi Glepo Teke Edi Hatimare Mae King Di Israel.

²⁸ Kate lehe mae Omri na, mare ne giugiluni mana Samaria. Mae Ehab thugna mana igne teke king tughuni mana na.

King Ehab gna Israel

²⁹ Ka tolufulu nhana finogha te king mae Asa Juda igre, mae Ehab thugna King Omri ne king gna Israel. Mae Ehab neke funei fruni Samaria varadaki phei finogha.

³⁰ Nu mae Ehab ne edi glepo te thono diꞌa fara ka tathagna Lord na, ke tulaodi king te gnafa teke funei fruni ke ulugna mana ra.

³¹ Ehab loku jateula Jeroboam eghu, nu mana diꞌa fara salaꞌuni mae King Jeroboam, naugna mana tolaghi ka Jesebel thugna mae Et-Baal, king gna Saedon, eghuteuna mana ne funu tarai ka god Baal.

³² Mana eni kaisei Sugablahi mala tarai ka Baal jare Samaria, eghuteuna mana ne eni kaisei olta ka Sugablahi igne.

³³ Eghuteuna mana jaola ne fakegra haghe kaisei mumuju god gaꞌase Astarot. Aonu King Ehab ne edi kmana nakhibo te thono diꞌatagnadi fara Lord nodi God mae Israel, ke tulaodi king te gnafa di Israel tifa ra.

³⁴ Ka narane te king mae Ehab Israel igre, mae Hiel maegna Betel igne mana neke babana fapulo namono biꞌo Jeriko. Kate loku teu mana ka namono igne, thugna mana, mae Abiram teke kulu karha na ne lehe. Eghuteuna kate eni teu mana grengathagna bara thina na, thugna leghu lahu mana, mae Segub igne jaola ne lehe. Glepo igne ne horoghoto nogna cheke Lord teke chekeni mae Josua thugna mae Nun tifa ia.