Ululahu Kings 15 - Buka Blahi Ka Cheke Holo

King Abaeja gna Juda

¹ Ka fabotho nhana finogha te king mae Jeroboam Israel igre, mae Abaeja keha nanghagna na mae Abaejam, jaola neke king Juda.

² Mana ne king Jerusalem thilo finogha. Nanghagna idogna mana na Maka, thugna mae Absalom.

³ King Abaeja leghuni puhigna kmagna te diꞌa na. Mana theome ghatho tahuni Lord, nogna God na, jateula teke eni kuꞌegna King Devet tifa ia neku.

⁴ Neuba, Lord ne ghathoni King Devet ne tusu ranghini mae Abaeja kaisei mae sitei nalhaꞌu mala tughuni mana Jerusalem mala king fruni Juda. Eghuteuna Lord ne reireghi fakelini fabrahu Jerusalem.

⁵ Naugna King Devet neke eni unha te doglo ka tathagna Lord na, eghuteuna mana theome huhughuni kaisei nogna cheke mana ka nakarhagna na. Kaisei glepo te diꞌa kolho teke eni mana ka mae Uraea, vikegna mae Het.

⁶ Ka narane te king mae Abaeja igre, magra na neke fufunu ka King Rehoboam ghe King Jeroboam.

⁷ Keha glepo teke eni King Abaeja na, mare neke rioriso soru ka Buka Eidi Glepo Teke Edi Hatimare Mae King Di Juda.

⁸ Eghuteuna kate lehe mae Abaeja na, mare giugiluni mana ka bekudi hatimare mae king ka nogna namono biꞌo King Devet. Eghuteuna thugna mana, mae Asa, teke king tughuni mana na.

King Asa maegna Juda

⁹ Ka varadaki finogha te king mae Jeroboam Israel igre, mae Asa ne kegra King Juda.

¹⁰ Mana king Jerusalem phiatutu kaisei finogha. Kavegna mana na Maka, thugna Absalom.

¹¹ King Asa ne eni unha te doglo ka tathagna Lord na, jateula teke eni King Devet kuꞌegna mana tifa ia neku.

¹² Mana neke koko mumuju god teke sari kuꞌedi nei kmadi teku mare tifa ra. Eghuteuna mana ne khi fajifladi nalhaꞌu nei gaꞌase eghu te eni puhi te diꞌa na ka vido te blahi re, mala jifla mare Juda.

¹³ Mana jaola ne fagnafani kavegna na ka sapegna Kuin, naugna naꞌa ne eni kaisei mumuju god gaꞌase Astarot. Eghuteuna mana ne kato soru mumuju god gaꞌase igne ne koko lao ka khaꞌaghi ka glogu Kidron.

¹⁴ Neuba mana ne theome paꞌe soru nodi vido blahi keha god re, nu ka nagnafagna na mana thofno ghatho tahuni fabrahu Lord ka nakarhagna na.

¹⁵ Eghuteuna mana lilisei ka nogna Sugablahi Lord na gobigna lepo teke edi mare ka gol nei silva teku teke fablahi kmagna mana tifa re.

¹⁶ Ka narane King Asa te king Juda igre, King Basa neke king Israel, phiamare magra koba.

¹⁷ Kaisei fata King Basa hata soldia balugna ne tei magra Juda. Ka magra igne mare neke uluni namono biꞌo Rama. Eghuteuna King Basa bara ne lithui namono igne ka thina mala rheta fakeli. Aonu mana neke eni namono Rama igne kaisei namono rheta mala theome tangomana kaisei naikno te ruma mei ba jifla Juda.

¹⁸ King Asa hata fajifla silva nei gol teu ka nogna Sugablahi Lord nei ka nogna suga biꞌo king. Mana ne tusu lao glepo igre ka nogna mae biꞌo re mala hata tei mare Damaskas mala falao ka King Ben-Hadad gna Siria. Mae Ben-Hadad gne thugna mae Tabrimon, thugna mae Hesion.

¹⁹ Aonu, King Asa ne fatei cheke ka mae King Ben-Hadad, ne cheke eghu ka mana, “Iara magnahaghei ghita tapa te fofodu jateula teke edi phei mae kmada tapa tifa ra eghu. Eghume, iara faꞌari ka iagho silva nei gol teu igre jateula kaisei nogu namha eghu ka iagho. Iara magnahaghei nigho iagho te ghatho ihoni u nhaꞌa cheke teke eni iagho balugna mae Basa king gna Israel ia. Jame te eni iagho igne na, mana ginauna na hata nogna armi na jifla kokoni nogu kantri iara gne.”

²⁰ Aonu King Ben-Hadad ne kaisei gaoghatho ka nogna cheke King Asa igne ne kurudi hatimare mae komanda balugna nogna armi na ne tei magra Israel. Ka magra igne, King Ben-Hadad ne uludi thilo namono igre, Ijon, Dan nei Abel-Bet-Maka, nei vido te namo ka Kholo Galili, nei ka nohi Naftali.

²¹ Kate nomhini King Basa cheke igne, mana lilisei gloku teke eni mana Rama igne neke pulo Tiasa.

²² Ke leghugna igne, King Asa ne fatei cheke ka namono te gnafa Juda igre mala mei toghoni. Aonu mana kurudi mare ne tei pala ne mei thina balu thaba teke hata teke mei King Basa ka namono Rama. Eghuteuna King Asa ne bara ne lithui ka thina gringnidi phei namono Mispa ghe Geba ka nohi Benjamin.

²³ Keha thoutonu eidi keha glepo teke edi King Asa re au ka Buka Eidi Glepo Teke Edi Hatimare Mae King Di Juda. Buka igne u thoutonu eidi unha gloku teke edi mana, teke bara teke maku namono igre. Nu kate kuekuꞌe na, kaisei khabru ne thokeni ghahegna mana na.

²⁴ Eghuteuna kate lehe King Asa na, mare ne giugiluni mana ka beku di hatimare mae king ka nogna namono biꞌo King Devet. Eghuteuna thugna mana mae Jehosafat teke king tughuni mana na.

King Nadab gna Israel

²⁵ Ka fapea finogha te king mae Asa Juda igne, mae Nadab thugna King Jeroboam te king Israel na. Eghuteuna mana ne king nabagna phei finogha kolho.

²⁶ King Nadab jateula kmagna neu ne leghuni puhi te diꞌa na ne batudi naiknodi Israel ka puhi nakhibo.

²⁷ Eghuteuna mae Basa, thugna mae Ahaeja ka vikegna mae Isaka igne ne hironi kaisei nabrou te mala aknu faleheni King Nadab. Aonu mae Basa ne faleheni mana ka narane mana nei hatimare nogna mae soldia re eghu te bara ligohoni namono Gibeton jare Filistia mala magra ka mana. Aonu mae Basa neke tughuni mae King Nadab neke king gna Israel.

²⁸ Puhi igne ne thoke mei ka fatilo finogha gna mae Asa king gna Juda.

²⁹ King Basa ne aknu falehe ne hui iheire te gnafa teke karha mei ka tharaknagna King Jeroboam. Theo kaisei ka tharaknagna King Jeroboam te karha na, eghume tharaknagna mana na ne kafe hui. Igne ne thofno horoghoto fara ka unha teke chekeni Lord tifa ka nogna mae gloku Profet Ahaeja maegna ka namono biꞌo Saelo.

³⁰ Glepo igne neke thoke mei ka tharaknagna King Jeroboam, naugna Lord God gna Israel igne neke diꞌatagna fara ka King Jeroboam ka nakhibo nei ka puhi te batudi mana naiknodi Israel ka nakhibo.

³¹ Thoutonu di keha glepo teke edi King Nadab re, mare rioriso soru ka buka te kiloni mare, Buka Eidi Glepo Teke Edi Hatimare Mae King Di Israel.

³² Ka narane te King mae Asa Juda igre, eghuteuna mae Basa te king gna Israel teu igre, phiamare magra koba leuleghu fata.

King Basa gna Israel

³³ Ka fatilo finogha gna mae Asa te king gna Juda igne, mae Basa thugna King Ahaeja te king gna Israel na. Basa neke king ka namono biꞌo Tiasa varadaki fati finogha.

³⁴ Mana jaola ne leghuni puhigna King Jeroboam te thono diꞌa fara na. Mana ne tapla jafra ka nakhibo ka tathagna Lord, eghuteuna mana jaola batudi naikno di Israel ka nakhibo.