Ululahu Kings 14 - Buka Blahi Ka Cheke Holo

Thugna King Jeroboam na ne lehe

¹ Ka narane tuana, mae Abaeja thugna King Jeroboam igne ne fogra.

² Aonu mae Jeroboam ne cheke eghu ka khetogna na, “Iara magnahaghei nigho iagho te lalaoni ka keha nafnata pohe te nhogri mala theome filo glani nigho mare te khetogna King Jeroboam teuna. Eghuteuna iagho tei Saelo mala filoni Profet Ahaeja. Mae tuana ngala teke vahi ghau iara te mala king gna Israel teku na.

³ Iagho hata nabotho bret balumu, keha bisket nei kaisei botol jurukuli eghu tei mala tusu lao ka mana. Mana ginauna tangomana te chekeni ka iagho unha nate thokeni mae sitei igne.”

⁴ Aonu khetogna mana na leghuni igne ne tei Saelo ka sugagna mae Profet Ahaeja. Gognaro na mae Ahaeja gne la khuekuꞌe farahi, eghuteuna phei tathagna re la dofuhi.

⁵ Lord neke cheke eghu ka mae Ahaeja, “Khetogna King Jeroboam na ginauna mei mala tore nigho iagho eigna thugna te fogra na. Iagho ginauna na cheke ranghini naꞌa glepo teke chekedi iara ka iagho ra. Nu kate mei ka iagho na, gaꞌase igne ginauna chaghi na kaisei gaꞌase ngau eghu.”

⁶ Kate nomhini mae Ahaeja te nolo te mei ka grengatha na, mana ne cheke eghu, “Mei suga sagho. Iara lase nigho iagho khetogna King Jeroboam kolho. Naugna unha sagho te mei chaghi ghau iara gnea? Iara au kaisei thoutonu diꞌa ranghi nigho iagho.

⁷ Iagho tei cheke ka mae Jeroboam eigna unha te chekeni Lord, nodi God maedi Israel, ‘Iara neke vahi nigho iagho ka naikno igre mala nodi mae mala batudi naiknodi Israel.

⁸ Ulu lahu na, iara neke hata fadelei ka vikegna king Devet nolaghi te mala funei frunidi naiknore neke tusu ari ka iagho. Nu iagho theome jateula nogu mae gloku iara mae Devet mae ihei teke thofno leghu ghau iara fabrahu ia eghu. Mana neke leghudi nogu cheke iara re, eghuteuna edi gobigna lepo te doglo ka tathagu iara na.

⁹ Nakhibo te edi iagho re biꞌo fara salaꞌudi nakhibo teke edi naiknodi Israel tifa ra. Iagho figri tagru ghau iara, eghuteuna iagho horo phei god ka mumuju buluka nalhaꞌudi ka gol mala tarai tagna. Ka puhi igre te thono diꞌatagu fara iara na.

¹⁰ “ ‘Naugna eidi glepo igre, iara ginauna snakre mei puhi biꞌo mala roꞌeni tharaknamu iagho na mala theo kaisei ka ghotilo nate king ke leghumu iagho na. Iara ginauna kafe falehedi mae te gnafa re, neubane naikno sneka ba naikno snagla. Iara ginauna kafe fahui ghami ghotilo jateula mae te gnubra chara ra eghu.

¹¹ Vikegna mae Jeroboam te lehe ke lamna namono biꞌo na, khuma ginauna ghamu thinidire. Eghuteuna keha te lehe mata re, nanghaji ginauna ghamu thinidire. Iara Lord te chekeni igne!’

¹² “Eghuteuna Profet Ahaeja ne cheke eghu ka naꞌa, ‘Iagho ke figri ka namono. Kate posa lao iagho farihotei namono na, ka vido tuana la thumu iagho na ginau lehe.’

¹³ Naiknodi Israel igre ginauna tanhi, nei giugilui ni mana. Tuana ngala ka tharaknagna King Jeroboam te giugilu mare na, naugna Lord, nodi God maedi Israel, ne kelitagna ka mae sua igne.

¹⁴ “Lord ginauna vahini kaisei mae mala king gna Israel. Eghuteuna king igne ginauna fagnafani tharaknagna King Jeroboam. Uve, gognaro na glepo igre la thofno thoke mei tutuani.

¹⁵ Lord ginauna farhani ni Israel mala jateula fora te blele tafri ka nabritha ra eghu. Uve, Lord ginauna khi fajifladi naiknodi Israel mala tei kokoni mare nodi thofno namono te keli teke tusu lao Lord ka kuꞌedi mare tifa ra. Eghuteuna mana ginauna na eni igne mala tei fagaꞌu mare ka keha phile Khoꞌu biꞌo Iufretis. Mana ginauna eni igne, naugna mare ne tarai ka mumuju god gaꞌase Astarot.

¹⁶ Lord ginauna lisa koko ghita, naugna King Jereboam ne tapla jafra ka nakhibo, eghuteuna mana batudi naiknore mala jaola tapla jafra tahati ka nakhibo.”

¹⁷ Aonu khetogna mae Jeroboam igne jifla neke figri ka namono Tiasa. Eghuteuna kate ao ngala te ruma haghe nga teu naꞌa ka nogna suga na, thugna na ne lehe.

¹⁸ Aonu naikno te gnafa Israel igre ne tanhi ne giugiluni mana. Glehegna thugna naꞌa igne ne horoghoto ka unha teke chekeni Lord ka nogna mae gloku profet Ahaeja.

King Jeroboam ne lehe

¹⁹ Keha glepo teke edi King Jeroboam kani teke funei fruni, nei magra teku teke edi mana igre, mare neke rioriso ka Buka Eidi Glepo Teke Edi Hatimare Mae King Di Israel.

²⁰ Mae Jeroboam neke King nabagna varadaki phei finogha Israel. Eghuteuna kate lehe mae Jeroboam na, thugna mana mae Nadab igne teke king ke leghugna mana na.

King Rehoboam maegna Juda

²¹ Ka narane igre, Rehoboam thugna mae Solomon, mana neke king gna Juda kate phiatutu kaisei finogha na. Mana neke funei Jerusalem nabagna nabotho fitu finogha ka namono aheva teke vavahi Lord ka vike te gnafa Israel. Mana neke vahini namono igne mala pogho soruni nanghagna na jare. Idogna king na, nanghagna na, Nama, ka vikegna mae Amon.

²² Naiknodi Juda igre ne edi glepo te diꞌa fara ka tathagna Lord. Kate edi mare nakhibo igre diꞌatagna Lord na thono brana fara tei salaꞌudi puhi te diꞌa teke edi kuꞌedi mare tifa ra.

²³ Mare horo vido blahi heva heva ke kligna thogele, ba ke pari gaju biꞌo. Mare jaola fakegra haghe thina blahi, ba sari mumuju god gaꞌase Astarot.

²⁴ Eghuteuna mae nalhaꞌu nei gaꞌase teu te au ka vido blahi igne mare eni puhi te diꞌa na ka naikno te mei tarai ka mumuju god igre. Neuba Lord neke brue fajifladi naikno te diꞌa puhidi igre ka nodi namono Israel, naiknodi Juda igre ne theome gnafa te leghudi puhidi naikno te thono diꞌa fara tifa ra.

²⁵ Ka falima finogha te funei fruni King Rehoboam igre, King Sisak gna Ijep mei ne magra Jerusalem.

²⁶ Mana hata ne tei gobigna lepo te keli teke au ka nogna Sugablahi Lord na, nei ka nogna suga biꞌo King. Mana hata gobigna lepo igre baludi greoreo teke horo King Solomon ka gol.

²⁷ Aonu King Rehoboam neke horo greoreo ka bras ke tughudi teke hata mare igre. Nodi komanda hatimare mae soldia te mala reireghi grengatha gna nogna suga biꞌo mae King, mana chekedi mare mala reireghi greoreo igre.

²⁸ Eghuteuna leuleghu fata kate tei king ka nogna Sugablahi Lord na, hatimare mae sekiuriti pala greoreo mala reireghini mana, gnafa teuna mare ke lisei fapulo ka chogho mala audire.

²⁹ Keha glepo te edi King Rehoboam re mare neke rioriso soru ka Buka Eidi Glepo Teke Edi Hatimare Mae King Di Juda.

³⁰ Ka narane te King Rehoboam balugna King Jereboam igre, phiamare magra koba.

³¹ Kate lehe King Rehoboam na, mare ne giugiluni mana ka bekudi king tifa ka nogna namono biꞌo King Devet. Nanghagna idogna mana na, Nama, ka vikegna mae Amon. Aonu mae Abaeja thugna mae Rehoboam teke king tughuni mana na.