Ululahu Kings 13 - Buka Blahi Ka Cheke Holo

¹ Kate kegra fafara teu mae Jeroboam ka olta na, kaisei nogna profet God ne mei ka mana. Mae profet igne kaisei maegna Juda, eghuteuna Lord neke chekeni mana mala jifla Juda tei Betel.

² Eigna Lord ne diꞌatagna fara ka olta igne ne cheke ranghini mae profet igne mala tei cheke eghu mana. “Iagho olta! Igne unha teke chekeni Lord na, ‘Kaisei mae sua ginauna karha mei ka vikegna mae Devet, nanghagna na mae Josia. Mana ginauna hata mae pris teke fafara ke klignamu iagho ra mala falelehe ke klignamu iagho. Eghuteuna mana ginauna gahu nhubradi re ke klignamu iagho.’ ”

³ Ka narane tuanala, nogna mae gloku God igne ne eni kaisei fagaglana, “Igne fagaglana te chekeni Lord na, ‘Olta igne ginauna bagra phea eghuteuna nakrofugnare ginauna thofa soru pari ka glose na.’ ”

⁴ Kate nomhini King Jeroboam unha te chekeni nogna mae gloku God eigna olta igne, mana kegra neu rhegna olta na ne ngafa haghe khamegna na ne tusu lao ka mae profet igne, ne cheke eghu, “Lokini mae tuana!” Nu khamegna mae Jeroboam teke tusu lao ka mae profet igne megeinga ne lehe, ne theome tangomana te glomno na.

⁵ Olta na jaola ne bagra pea, eghuteuna nakrofugna olta igne ne thofa soru pari ka glose na, thofno leghuni nogna cheke Lord teke chekeni mana igne.

⁶ Aonu King Jeroboam ne cheke eghu ka mae profet igne, “Iara magnahaghei nigho iagho te toreni God, nou Lord, mala togho ghau iara mala ke keli fapulo iara khamegu gne!” Aonu mae profet ne leghuni nogna cheke King na ne tarai ka Lord, eghuteuna khamegna King na neke keli fapulo jateula teke ululahu ia neu.

⁷ Aonu king ne cheke eghu ka nogna mae gloku God igne, “Iara magnahaghei nigho iagho te ari ka sugagu iara na mala ima balugu iara. Eghuteuna iara ginauna tusu ari kaisei namha ka iagho.”

⁸ Nu profet ne cheke eghu ka mana, “Neuba iagho ne fota pea nou gobigna lepore ne tufa ka iara keha phile na, iara ginauna theome ari balumu iagho, ba ghamu nei koꞌu eghu balumu iagho agne Betel.

⁹ Naugna Lord neke cheke eghu ka iara, ‘Iagho thosei ghamu bret ba koꞌu ba ke figri ka nabrou teke mei iagho na.’ ”

¹⁰ Aonu mana neke salaꞌu ka keha nabrou delei neke theome pulo ka nabrou teke mei mana Betel igne.

Kaisei profet khuekuꞌe ne chaghini profet gna Juda

¹¹ Ka narane tuare, kaisei profet khuekuꞌe au jare Betel. Eghuteuna thugna nalhaꞌu mana re mei ne toutonu ka mana eidi unha te edi mae profet gna Juda igne jare Betel ka narane igne. Mare jaola toutonu ka mae kmadi na unha teke chekedi mana ka King Jeroboam.

¹² Mae profet khuekuꞌe igne ne ghusna eghu ka mare, “Nabrou aheva te leghui mana na?” Eghuteuna mae thugna mana re ne falalase nabrou te leghuni mae profet gna Juda igne.

¹³ Aonu mana ne chekedi mae thugna re mala tarabana nogna dongki na, aonu mana ne saghe ka dongki igne

¹⁴ ne tei ke leghugna mana. Mana tei ne filoni mae profet igne gnokrou ke parigna gaju biꞌo. Eghuteuna mae profet khuekuꞌe igne ne ghusna eghu, “Iagho si mae profet te mei funu Juda na ia?” Mae profet ne cheke eghu ka mana, “Uve, iara ngala.”

¹⁵ Aonu mae khuekuꞌe igne ne cheke eghu ka mana, “Iara magnahaghei nigho iagho te mei ka sugagu iara na mala ima balugu iara.”

¹⁶ Nogna mae gloku God igne ne cheke eghu, “Iara theome tangomana teke figri ka sugamu iagho na te mala ima nei koꞌu teu balumu iagho ka vido igne.

¹⁷ Chekegna Lord na lhoti ghau iara te mala ghamu nei koꞌu teu agne na, eghuteuna iara theome tangomana teke figri ka nabrou teke meila iara na.”

¹⁸ Mae profet khuekuꞌe igne ne cheke eghu, “Iara jaola kaisei mae profet jateula iagho eghu. Eghuteuna Lord neke kuruni kaisei engel neke mei cheke ka iara mala mei tali fapulo nigho iagho mala ke pulo ghamu nei koꞌu eghu ka sugagu iara na.” Nu mae khuekuꞌe igne chaghini mana kolho.

¹⁹ Aonu kate nomhini cheke igne, mae profet gna Juda igne neke pulo balugna mana, eghuteuna mana ne ghamu nei koꞌu neu balugna mana.

²⁰ Kate ghamu gnokro teu phiamare na, chekegna Lord na ne mei ka profet khuekuꞌe igne.

²¹ Aonu mana ne eha eghu ka nogna mae gloku God igne, “Lord ne cheke eghu, iagho theome leghuni nogna cheke Lord na, eghuteuna iagho theome eni unha teke chekeni mana ka iagho na.

²² Iagho ke pulo mei ka vido igne, eghuteuna iagho ghamu bret nei koꞌu eghu ka suga aheva mana teke cheke ranghi nigho te mala thosei ghamu nei koꞌu teku tagna na. Eghume iagho ginauna lehe, eghuteuna mare ginauna theome giugilu thinimu iagho na ka bekudi kuꞌemu ra.”

²³ Kate gnafa ghamu phiamare na, mae profet khuekuꞌe igne ne tarabana nogna dongki na malagna nogna mae gloku God.

²⁴ Kate tei mana na, kaisei lion mei ne thafoni mana ka nabrou na ne faleheni mana, eghuteuna thinigna mana na ne khoko soru ka nabrou na. Eghuteuna lion balugna dongki na kegra neu rhegna thinigna mana na.

²⁵ Keha naikno te salaꞌu ka nabrou igne ne filoni thinigna nogna mae gloku God na thuru neu ka nabrou na, eghuteuna lion na kegra neu rhegna thinigna mana na. Aonu mare tei Betel ka namono aheva te au mae profet khuekuꞌe igne ne toutonu ka naiknore unha te filoni mare ka nabrou na.

²⁶ Kate nomhini mae profet khuekuꞌe thoutonu igne, mana ne cheke eghu, “Tuana nogna mae gloku God te huhughuni chekegna Lord na. Eghume Lord neke kuru meini lion igne mala ghasini nei faleheni eghu mana, igne ne horoghoto ka unha teke chekeni Lord na.”

²⁷ Aonu mana ne cheke eghu ka mae thugna re, “Ghotilo tarabana nogu dongki iara ia.” Eghuteuna mare ne tarabana nogna dongki mae kmadi na.

²⁸ Mana tei ne filoni thini gna na thuru neu ka nabrou na. Eghuteuna lion balugna dongki na kegra neu rhegna mana, eghuteuna lion igne ne theome ghamu thini gna mana na, eghuteuna naꞌa jaola ne theome faleheni dongki na.

²⁹ Mae profet khuekuꞌe igne hata thinigna nogna mae gloku God na ne fasaghe lao ka nogna dongki na hata neke figri Betel mala tanhi nei giugiluni eghu jare.

³⁰ Eghuteuna mana baludi thugna re ne tanhini mae igne ne cheke eghu, “Kokhoni nigho fara ghema thabusigna! Kokhoni nigho fara ghema thabusigna!” Aonu mare ne giugilui thini gna mana na ka nogna gluma thegna na.

³¹ Kate giugilui te gnafa thinigna na, mana ne cheke eghu ka mae thugna re, “Kate lehe iara na ghotilo giugilui ghau iara ka beku teke giugilui thinigna nogna mae gloku God igne. Lilisei nhubragu iara re rhegna nhubragna mana re.

³² Uve, chekegna Lord teke chekedi nogna mae gloku God ranghini olta gna Betel nei ranghidi vido blahi te gnafa ka namono Samaria teu igre ginauna thoke mei tutuani.”

Nakhibogna King Jeroboam

³³ Neuba glepo igre ne thoke mei ngau, nu King Jeroboam theome tughu puhigna te diꞌa na. Mana vahidi thua nafnata mae ngala te mala pris te mala loku ka vido blahi na. Ihei te magnahaghei pris na, Jeroboam faꞌuveni ngala.

³⁴ Igne nakhibogna mae Jeroboam, eghuteuna nakhibo igne ne goigoni vikegna mana na. Eghuteuna mare te gnafa ka vike igne ne kafe lehe.