Ululahu Kings 11 - Buka Blahi Ka Cheke Holo

King Solomon ne figri tagruniLord

¹ King Solomon magnahagheidi fara kmana gaꞌasedi keha kantri are. Ulu lahu na mana tolaghi ka thugna gaꞌase king gna Ijep, eghuteuna mana tolaghi ka keha gaꞌase ka vikegna mae Het, nei gaꞌase di Moab, Amon, Idom, nei Saedon.

² Nu gaꞌase igre thaudi ka kantri delei, eghuteuna Lord na theome magnahaghedi maedi Israel te tolaghi ka nafnata gaꞌase igre. Tifa na Lord neke cheke eghu, “Ghotilo maemi Israel ra thosei tolaghi ka naikno bongihehe are, naugna mare ginauna figridi nagnafami ghotilo are mala tarai ka nodi god thedi re.” Nu mae Solomon ne theome fanomho ne namhadi fara khetogna re.

³ Mana ne tolaghi ka fitu gobi gaꞌase, gaꞌase igre thudi hatimare mae king, eghuteuna mana jaola au thilo gobi khetogna te loku ranghini mana. Eghuteuna gaꞌase igre hata fadelei gaoghathogna mana na mala figri tagruni Lord.

⁴ Kate kueku'e mana na, khetogna mana igre batuni gaoghathogna mana na mala tarai ka mumuju god. Gaoghathogna mana na theome ghatho tahuni Lord, nogna God na. Mana ne theome jateula King Devet, mae kmagna teke ghatho tahuni Lord.

⁵ Mana ne pogho soruni god gaꞌase Astarot, nodi god naiknodi Saedon. Mana jaola pogho soruni Milkom. Nodi god naiknodi Amon igne thono diꞌa fara.

⁶ Ka puhi igne, mae Solomon ne tapla jafra ranghini Lord, eghuteuna mana theome leghuni chekegna Lord. Mana theome jateula puhigna mae Devet mae kmagna na teke thofno leghuni Lord teuna.

⁷ Mae Solomon ne eni kaisei vido blahi ka thogele ke maghati Jerusalem mala tarai ka god Kemos, god te thono diꞌa fara igne nodi god naiknodi Moab. Eghuteuna mana jaola eni keha vido blahi na mala pogho soru ka Molek, kaisei nodi god te diꞌa naiknodi Amon.

⁸ Eghuteuna mana neke edi soasopai nodi vido blahi maladi khetogna te mei funudi ka keha kantri delei, mala tangomana rehati te gahu insens nei fafara teu ka nodi god re.

^9-10 Lord, nodi God naikno di Israel igne, neke phei fata meihi ka mae Solomon, eghuteuna mana neke cheke faheta ka mana mala thosei pogho soru ka keha god delei. Nu mae Solomon ne theome leghuni cheke igne ne figri tagruni Lord. Aonu Lord ne thono diꞌatagna fara ka mana.

¹¹ God ne cheke eghu ka mae Solomon, “Gaoghatho te diꞌa te au ka iagho igne, te theome leghudi iagho noda nhaꞌa cheke tapa ra, nei theome leghudi nogu cheke iara ra teuna. Eghume iara ginauna na hata fadelei ka iagho nogna nolaghi vikemu iagho te mala king gna Israel na, eghuteuna iara ginauna tusu lao nolaghi igne ka kaisei nou mae biꞌo iagho.

¹² Nu naugna teke ghatho tahuni iara mae kmamu iagho King Devet ia, iara ginauna na theome eni igne kate karha teu iagho na. Iara ginauna eni igne kate kegra king thumu iagho na.

¹³ Nu iara ginauna na theome hata fadelei vike te gnafa Israel igre ka mana, nu iara ginauna na snakreni mana funei frunini kaisei vike mala au ka khamegna mana. Naugna iara neke ghatho tahuni mae kmamu iagho nogu mae gloku iara King Devet ia, eghuteuna iara jaola ghatho tahuni namono biꞌo Jerusalem teke vavahi iara ia.”

Phei nogna naoka King Solomon

¹⁴ Aonu Lord ne tusu lao gaoghatho ka King Hadad maegna Idom mala naoka ka King Solomon.

¹⁵ Tifa, kani teke magra King Devet ka naiknodi Idom ra, mae Joab mae ihei teke komanda ka armi gna Israel na, mana neke tei Idom neke giugilui thinidi hatimare mae soldia di Israel teke lehe ka magra. Ka narane tuare, mae Joab balugna armi na neke aknu falehe mae te gnafa di Idom.

¹⁶ Mare neke au namno nhigra Idom, eghuteuna mare neke aknu falehe neke hui mae te gnafa te au ka namono tuana.

¹⁷ Nu mae Hadad gne kaisei mae sitei thugna king gna Idom, ka narane tuana mana neke rikha baludi keha nogna mae biꞌo kmagna mana re. Mare rikha ne tei Ijep.

¹⁸ Mare jifla ka nohi Midian ne tei ka namono nagou Paran, eghuteuna keha maedi Paran jaola ne toghodi mare. Aonu mare jifla ne tei Ijep mala tei filoni king gna Ijep. King ne snakre lao keha vido glose nei kaisei suga biꞌo neu ka mae Hadad, eghuteuna mana jaola ne toghoni mana ka gano na leghu narane.

¹⁹ King gna Ijep gne thono magnahagheni fara mae Hadad, aonu mana ne snakreni greghagna Kuin Tapanes na mala tolaghi ka mae Hadad.

²⁰ Aonu gaꞌase igne ne karha kaisei thugna nalhaꞌu ka mae Hadad, mare ne kiloni mana Genubat. Kuin Tapanes tathajini mae Genubat ne biꞌo haghe ka suga gna King. Aonu mana ne biꞌo haghe baludi thugna king gna Ijep.

²¹ Kate au teu mae Hadad Ijep na, mana ne nomhini tela lehehi King Devet ghe komanda Joab na, aonu mana tei ne cheke eghu ka king, “Iagho snakre ghau iara mala ke pulo ka nogu kantri na.”

²² Aonu King ne cheke eghu ka mana, “Naugna unha sagho teke magnahaghei pulo ka nou kantri na gnea? Ba iagho kmoꞌe ka glepo kate au balugu iara na sia?” Mae Hadad ne cheke eghu, “Iara theome kmoꞌe ka kaisei glepo kate au teu agne na, nu iara magnahaghei nigho iagho te snakre tei ghau iara.”

²³ Aonu God nhaꞌa lao gaoghatho ka King Reson gna Siria mala jaola naoka ranghini King Solomon. Mae Reson gne thugna mae Eliada, nu tifa na mana neke kaisei nogna mae biꞌo King Hadadesa jare Soba, nu mana neke rikhani mana.

²⁴ Kani teke uluni King Devet nogna armi mae Hadadesa gne ka magra na, Reson neke batuni kaisei tothoghei soldia neke tei au Damaskas. Tothoghei igne toghoni mana ne kegra king Damaskas.

²⁵ Aonu leuleghu fata ka nakarhagna King Solomon igre, King Reson gne kaisei nogna naoka mana. Eghume King Hadad maegna Idom igne mana eꞌei puhi ranghini Israel, eghuteuna King Reson maegna Siria igne jaola naoka ranghini Israel.

Nogna cheke God ranghini mae Jeroboam

²⁶ Eghuteuna kaisei nogna ofisa King Solomon, mana jaola ne naoka ranghini mae Solomon. Mae igne nanghagna na mae Jeroboam, thugna mae Nebat maegna Sereda, vikegna mae Efrem, eghuteuna idogna na Serua, kaisei thau glehe kokoi.

²⁷ Igne thoutonu eigna mae Jeroboam te naokani King Solomon. Kaisei fata, king neke chekedi mae gloku re mala hata glose fafodu ka kaisei vido ka keha phile thogele Jerusalem mala horo suga ke kligna gna, eghuteuna mala ke babana fakeli baragna namono Jerusalem.

²⁸ Ka narane igre, mae Jeroboam gne kaisei famane mae majaghani, nei kaisei mae lase loku eghu. Eghuteuna kate filoni King Solomon igne, mana ne vahini mae Jeroboam mala nodi mae funei hatimare mae gloku ka vikedi mae Manase ghe mae Efrem.

²⁹ Kaisei narane mae Jeroboam ne jifla Jerusalem, eghuteuna profet Ahaeja maegna Saelo igne ne thafoni mana ka nabrou na ke kosi namono. Eghuteuna theo kaisei naikno te au teu jare na. Eghuteuna mae profet igne ne pipichi kolho ka kaisei pohe majaghani.

³⁰ Mana hata koko nogna pohe majaghani igne ne rerheku ka nabotho phei nabreku.

³¹ Aonu mana ne cheke eghu ka mae Jeroboam, “Iagho hata nabotho nabreku igre. Lord nodi God maedi Israel igre ne cheke eghu, ‘Filo sagho! Iara ginauna hata fadelei nodi nolaghi vikegna King Solomon te mala king frunini Israel igne. Eghuteuna iara ginauna tusu ari nabotho vike ka iagho mala funei frunidi iagho.

³² Nu mana ginauna funei fruni ni kaisei vike, naugna iara ne ghatho tahuni nogu mae gloku King Devet, eghuteuna iara ghatho tahuni Jerusalem, namono teke vahini iara na.

³³ Iara ginauna eni igne, naugna mae Solomon baludi naiknodi Israel igre ne tei koko ghau iara, nei mare pogho soru ka god Astarot nodi god gaꞌase naiknodi Saedon, eghuteuna Kemos nodi god naiknodi Moab, eghuteuna Molek nodi god naiknodi Amon. Mare theome leghuni puhigu iara na. Eghuteuna mare theome eni unha te doglo ka tathagu iara na, mare theome leghudi nogu vetula nei nogu cheke teu iara re jateula King Devet kmagna mae Solomon teke edi tifa ra eghu.

³⁴ “ ‘Nu iara ginauna na theome hata fadelei nogna nolaghi mae Solomon te mala funei fruni kate karha teu mana na, naugna iara neke vahini mana mala king te mala funei fruni fabrahu ka nakarha gna na. Iara ginauna snakreni mana mala funei fruni, naugna iara ghatho tahuni King Devet, eigna iara neke vahini mana, eghuteuna mana neke leghudi nogu vetula nei nogu cheke teku iara re.

³⁵ Nu iara ginauna na hata fadelei nolaghi te mala funei fruni jateula king teuna ka thugna mae Solomon igre. Eghuteuna, mae Jeroboam, iara ginauna lisa ari nabotho vike ka khamemu iagho.

³⁶ Iara ginauna snakreni thugna mana na mala funei frunini kaisei vike kolho, eghuteuna vikegna King Devet te mala funei fruni ni fabrahu Jerusalem. Igne namono teke vahini iara te mala pogho soruni ghotilo Nanghagu iara na.

³⁷ Nu iagho ginauna tangomana te funei frunidi vido aheva te magnahaghedi iagho re. Iara ginauna vahi nigho iagho mala king gna Israel.

³⁸ Jame te thofno leghu fakelidi iagho gobigna lepo te chekedi iara igre na, iagho ginauna na jaola edi gobigna lepo te doglo ka tathagu iara na, eghuteuna jame te leghudi iagho nogu vetula nei nogu cheke teu iara igre jateula teke edi King Devet tifa ra teuna, iara ginauna au fabrahu balumu iagho. Eghuteuna iara ginauna vahidi keha mae ka vikemu iagho gne mala king gna Israel fabrahu jateula teke eni iara ka King Devet tifa ia eghu.

³⁹ Naugna nakhibo te edi King Solomon igre, iara ginauna paradi vikegna King Devet igre, nu papara igne ginauna na theome eghu fabrahu.’ ”

⁴⁰ Ke leghugna igne, King Solomon ne magnahaghei te faleheni mae Jeroboam, nu mana rikha ne tei ka King Sisak Ijep, mana au neu jare ne ghilei lehe King Solomon.

King Solomon ne lehe

⁴¹ Keha thoutonu eigna King Solomon, baludi gobigna lepo teke edi mana re, nei nogna famane cheke teu mana igre mare neke rioriso soru ka buka eigna mana.

⁴² Mae Solomon neke king Jerusalem nei Israel nabagna phiatutu finogha.

⁴³ Kate lehe mana na, mare neke giugiluni mana ka nogna Namono biꞌo King Devet. Aonu thugna mana mae Rehoboam igne teke kegra king tughuni mana na.