Ululahu Jone 5 - Buka Blahi Ka Cheke Holo

Fatutuani ka Thugna God

¹ Iheire fateo te fatutuani ni mae Jisas na mae Kraes, igre goro thugna God. Ihei te namhani God Mama na jaola namhadi thugnare.

² Faꞌunha ne laseni tahati, tahati te namhadi thugna God re? Tahati laseni igne naugna tahati namhani God nei leghudi nogna vetulare.

³ Namhani God, gaoghathogna na leghudi nogna vetula, eghuteuna nogna vetulare theome ninhigrana ranghi ghita.

⁴ Ihei te thugna God na, mana fatutuani ni mae Jisas. Eghume mana au nolaghi mala tapla soruni puhigna nauthoglu igne.

⁵ Ba, ihei tangomana te tapla soruni puhigna nauthoglu igne? Uve, mae ihei ngala te fatutuani ni mae Jisas na thofno Thugna God.

⁶ Igne mae Jisas Kraes, mae ihei te mei balu khoꞌu apublahi nei dadara glehe. Theome khoꞌu kolho, nu khoꞌu balu dadara. Eghuteuna mae Tharunga te Blahi na thofno tutuani fara. Te chekeni mae Tharunga te Blahi na igne te thofno tutuani fara mae Jisas neke meihi ka puhi igne.

⁷ Thiloi igre mala cheke eigna mae Jisas:

⁸ Tharunga te Blahi, khoꞌu, nei dadara. Thiloi igre kaisei ngala.

⁹ Tahati fatutuani ka unha te chekeni naikno na. Nu unha te chekeni God na thono heta fara uluni chekegna naikno, eghuteuna mana cheke eigna Thugna.

¹⁰ Ihei te fatutuani ni Thugna God na, mana laseni ka nagnafagna na cheke igne thofno tutuani fara. Nu ihei te theome fatutuani ni God na, unha God te chekeni eigna mae Thugna na, mana kiloni God kaisei mae chaichaghi, naugna mana theome fatutuani ni unha te chekeni God eigna mae Thugna na.

¹¹ Igne unha te chekeni God ka tahati na: God tusu ranghi ghita karha fei tifa, eghuteuna karha igne mei balugna Thugna.

¹² Eghume ihei te hatini Thugna God na hatini thofno karha na. Nu ihei te theome hatini Thugna God na theome hatini thofno karha na.

Tahati gognaro na hatini karha fei tifa na

¹³ Iara riso ari letas igne ka ghotilo naikno te fatutuani ni Thugna God ra. Iara riso ari ka ghotilo mala laseni gognaro ghotilo te hatini thofno karha na.

¹⁴ Tahati thofno laseni igne, mana ginauna na nomhi ghita kate toreni tahati unha te leghuni gaoghathogna.

¹⁵ God fanomho ka tahati leghu fata kate tore tahati na. Eghume tahati laseni mana tusu ranghi ghita glepo te toreni tahati ka mana na.

¹⁶ Jame kaisei naikno ka ghotilo filoni mae kheragna fofodu ka khiloau na tapla jafra ka nakhibo te theome nabagna te mala au ka glehe fei tifa na, tarai ka God eigna mae kheragna fofodu ka khiloau te tapla jafra ka nakhibo tuana. Eghuteuna God ginauna na tusu ranghini u karha. Iara cheke eidi naikno te tapla jafra ka nakhibo te theome nabagna te mala au ka glehe fei tifa na. Nu jare kaisei nafnata nakhibo nabagna te mala au ka glehe fei tifa na, eghuteuna iara theome chekeni ka ghotilo mala tarai ka God eigna nafnata nakhibo tuana.

¹⁷ Najafra fateote'o kafe nakhibo hui. Nu jare keha nakhibo theome nabagna te mala au ka glehe fei tifa na.

¹⁸ Tahati laseni ihei te thugna God na theome mala tapla jafra fabrahu ka nakhibo, naugna mae Jisas Thugna God na reireghi fakelini mana, eghuteuna mae Satan theome tangomana te habo lao ka mana.

¹⁹ Tahati lasenihi tahati goro thugna God nu mae Satan funei fruni nauthoglu tongana gne.

²⁰ Eghuteuna tahati lasenihi Thugna God ne mei tusu ranghi ghita glalase mala laseni tahati thofno God. Eghuteuna tahati au balugna mae ihei te tutuani, tulao balugna mae Jisas Kraes. Mana thofno God nei mae ihei te tusu ranghi ghita u karha fei tifa na.

²¹ Uve thuguro, reireghi fakeli ghami themi ka mumuju are. Me gnafa. Iara, mae Jone.