Ululahu Jone 4 - Buka Blahi Ka Cheke Holo

Mae velepuhi chaichaghi

¹ Uve kheraguro, gognaro na kmana mae profet chaichaghi ka nauthoglu gne. Eghume kate toutonu naiknore, thosei fatutuani nodi cheke te gnafare, nu faglanidi eghu glahula gaoghatho te au ka mare tuare neke mei funu ka God.

² Nu jame mae ihei te cheke eghu na, “Iara fatutuani ni mae Jisas Kraes, mana mei ka nauthoglu gne neke vuhai naikno.” Ka puhi tuana, ghotilo tangomana te laseni gaoghatho teke mei funu ka mae Tharunga te Blahi na. Tutuani, gaoghatho tuana neke funu mei ka God.

³ Keha naiknore tirodi chekeni tuana eigna mae Jisas. Nodi gaoghathore theome funu mei ka God, nu funu mei ka nogna naoka mae Kraes. Ghotilo nomhihi nogna naoka mae Kraes ginau mei. Tutuani fara, gognaro na mana auhi ka nauthoglu gne.

⁴ Uve thuguro, ghotilo nogna God, eghuteuna ghotilo tapla sorudihi mae profet chaichaghi gre, naugna mae Tharunga te Blahi te au balumi ghotilo na au nolaghi fara uluni mae Satan, mae ihei te au ka naikno te leghuni puhigna nauthoglu gne.

⁵ Mae igre nogna nauthoglu igne. Naugna igne mare cheke eigna puhigna nauthoglu, eghuteuna naiknogna nauthoglu gne fanomho ka mare.

⁶ Nu tahati nogna God. Ihei te laseni God na fanomho ka tahati, nu ihei te theome nogna God na theome fanomho ka tahati. Eghume, igne puhi te mala laseni tahati gaoghatho te tutuani ba chaichaghi.

Namha mei funu ka God

⁷ Uve kheraguro, tahati fari namhai, naugna namha na mei funu ka God. Ihei te namha na thugna God nei laseni God.

⁸ Ihei te theome namhadi keha naiknore theome laseni God, naugna namha na mei funu ka God.

⁹ God fatakle nogna namha na ke lamnada kate kuru mei kaisei thofno Thugna ngala ka nauthoglu gne mala fakarhi ghita.

¹⁰ Ka gloku igne tahati filoni thofno namha na, theome eigna tahati ne namhani God, nu God namha ghita nei kuru mei Thugna jateula kaisei fafara mala hata fadelei nakhiboda.

¹¹ Uve kheraguro, eigna God namha ghita jateula igne teuna, tahati jaola nabada te fari namhai.

¹² Theo kaisei naikno te filoni God, nu te fari namhai tahati na, God au baluda nei nogna namha na thofno horoghoto ke lamnada.

¹³ Tahati laseni tahati au balugna God nei mana au baluda tahati, naugna mana neke kuru mei tada nogna Tharunga te Blahi na.

¹⁴ Tahati filonihi mana nei toutonuni ka naikno eigna Mama te kuru meini Thugna mala fakarhidi naikno te gnafa ka glehe.

¹⁵ Ihei te fatutuani nei chekeni Jisas na Thugna God, God au balugna mana nei mana au balugna God.

¹⁶ Eghume tahati lasenihi nei fatutuanihi nogna namha ranghi ghita. Namha na funu mei ka God. Eghume, ihei te au ka namha na au balugna God nei God au balugna mana.

¹⁷ Ka igne nogna namha na horoghoto ke lamnada mala frane tahati ka narane te mala fate ghita na. Naugna ka nauthoglu gne tahati jateula mana.

¹⁸ Theo kaisei namhaghu ka thofno namha na. Nu thofno namha na brue fadeleini namhaghu. Eghuteuna ihei te ofoni fate na au balu mhaghu. Eghume ihei te mhaghu na, thofno namha na theome horoghoto ka mana.

¹⁹ Tahati namha, naugna God neke kulu namha ghita.

²⁰ Jame kaisei naikno cheke eghu, “Iara namhani God,” nu tirognani kheragna fofodu na teuna, mana kaisei mae chaichaghi. Eigna mana theome tangomana te namhani God, mae ihei mana te theome filoni, jame te theome namhani mana mae kheragna fofodu na, mae ihei mana te filoni.

²¹ Mae ihei te namhani God na mana jaola namhani mae kheragna fofodu na. Vetula igne teke tusu ranghi ghita mae Kraes na.