Ululahu Jone 3 - Buka Blahi Ka Cheke Holo

Tahati goro thugna God

¹ Tahati thofno lasenihi unha nafnata namha biꞌo Mama te tusu ranghi ghita. Ka nogna namha biꞌo igne mana kilo ghita goro thugna. Eghuteuna tahati thofno Thugna mana. Nu naiknogna nauthoglu igne theome filo glani ghita te goro thugna God, naugna mare theome laseni mana.

² Uve kheraguro, gognaro na tahati goro thugna God, nu tahati theome laseni jateula unha teu thogheiro na. Nu tahati laseni kate thakle mei mae Kraes na, tahati ginauna na jateula mana. Naugna tahati ginauna na thofno filoni mana.

³ Eghuteuna iheire fateo te thofno fatutuani ni mae Kraes kate ofoni teu mana na fariuriu au klino, naugna mae Kraes na klino fara.

⁴ Ihei te tapla jafra ka nakhibo na, mana huhughuni fara nogna vetula God na, naugna nakhibo na huhughuni vetula na.

⁵ Ghotilo laseni mae Kraes neke mei mala hata fadeleidi nakhiboda, eghuteuna theo kaisei nakhibo ka mana.

⁶ Eghume naikno te au balugna Kraes na theome mala tapla jafra fabrahu ka nakhibo. Jame tapla jafra fabrahu ka nakhibo na, mana theome raꞌe filonihi mae Kraes ba theome lasenihi mana.

⁷ Uve thuguro, thosei snakreni kaisei naikno mala batu ghami ka puhi te diꞌa! Ihei te eni unha te doglo na mana doglo fara, jateula mae Kraes te doglo fara.

⁸ Nu ihei te tapla jafra fabrahu ka nakhibo na mana nogna mae Satan, naugna mae Satan tapla jafra fabrahu vuha tifa. Thugna God neke thakle mei malagna gaoghatho igne, mala roꞌeni nogna gloku mae Satan.

⁹ Ihei te thugna God na mana theome tapla jafra fabrahu ka nakhibo, naugna God tusu ranghini mana nakarha majaghani. Eghume mana theome tangomana te tapla jafra fabrahu ka nakhibo na, naugna mana kaisei thugna God.

¹⁰ Eghume tahati lasedihi iheire te thugna God nei iheire te thugna mae Satan. Iheire te theome eni unha te doglo na theome thugna God. Eghuteuna ihei te theome namhani kheragna fofodu na mana theome thugna God.

Fari namhai

¹¹ Igne vetula te nomhini ghotilo tifa na: Tahati mala fari namhai.

¹² Thosei jateula mae Kein, mana nogna mae Satan neke faleheni mae tahigna na. Mana faleheni mae tahigna naugna glepo te edi mana re diꞌa fara, eghuteuna glepo te edi mae tahignare keli fara.

¹³ Kheraguro, thosei jaglo nomi kate tirodi ghami naikno te leghuni puhigna nauthoglu igne.

¹⁴ Tahati laseni tela tei kokonihi glehe na eghuteuna mei rumahi kau karha. Tahati laseni igne naugna tahati namhani kherada fofodu na balugna mae Kraes. Ihei te theome namhani kheragna fofodu na mana au ngala ka glehe.

¹⁵ Ihei te tirognani kheragna fofodu na mae tuana kaisei naikno aknu poru ka nagnafagna na. Ghotilo lasenihi theo kaisei naikno aknu poru te hatani karha fei tifa na.

¹⁶ Ka igne te laseni tahati eigna u namha na: Mae Jisas neke lisa soru nakarhagna na malada tahati. Eghume tahati jaola nabada te lisa soru nakarhadare maladi kherada fofodu!

¹⁷ Jame kaisei naikno khiloau dedei eghuteuna filoni mae kheragna fofodu ka khiloau te kmoꞌei ka glepo na, eghuteuna theome kokhonini mae kheragna na teuna, nogna namha God na theo kolho ka nagnafagna naikno khiloau te dedei tuana.

¹⁸ Thuguro, noda namha na theome ka cheke kolho nu tahati thofno fatakleni noda namha ka unha te eni tahati ranghini kheragna fofodu.

^19-20 Eghume, ka puhi tuana tahati laseni te leghuni nabrou te tutuani na. Eghuteuna kate laseni tahati te eni unha te diꞌa ranghini kherada fofodu na ka nagnafadare, tahati tangomana te au teu ngala ka pharikeli ke ulugna God. Naugna nogna namha God na thofno biꞌo fara, eghuteuna mana lasedi gobigna lepore.

²¹ Uve kheraguro, jame theome fate ghita nagnafada na, tahati theome tangomana mhaghu te mei ka God.

²² Eghuteuna tahati na hata ka mana unha teke toreni. Naugna tahati leghuni nei eni unha te keli tagna mana.

²³ Mana cheke faheta ka tahati mala fatutuani ni Thugna, Jisas Kraes, nei fari namhai jateula te chekeni mae Kraes.

²⁴ Ihei te leghuni chekegna God na mana au balugna God, eghuteuna God au balugna mana. Faꞌunha laseni tahati God te au baluda na? Tahati laseni igne naugna God neke kuru meini mae Tharunga te Blahi na ka tahati.