Ululahu Jone 2 - Buka Blahi Ka Cheke Holo

Mae Jisas mala togho ghita

¹ Uve thuguro, iara riso ari letas igne ka ghotilo mala thosei tapla jafra ka nakhibo. Nu jame ihei te tapla jafra ka nakhibo na, tahati au mae Jisas Kraes kaisei mae te doglo fara mala togho ghita. Mana mala tore ghita ke ulugna God Mama.

² Mae Jisas ngala u fafara te mala hata fadeleidi nakhibodare, theome malada tahati kolho, nu jaola maladi naikno te gnafa ka nauthoglu gne.

³ Te leghuni tahati unha te magnahaghei God na, tahati thofno laseni mana.

⁴ Jame kaisei naikno cheke eghu, “Iara laseni God!” nu theome leghuni chekegna God teuna, mana kaisei mae chaichaghi. Eghuteuna cheke tutuani na theome au ke lamnagna mana.

^5-6 Nu ihei te leghuni chekegna God na, tahati laseni ka nakarhagna na mana te namhani God. Ka igne tahati laseni mana te leghuni God: Ihei te chekeni ne au balugna God teuna mana nabagna te au jateula teke eni mae Jisas Kraes ia eghu.

Vetula majaghani

⁷ Uve kheraguro, iara theome riso ari ka ghotilo kaisei vetula majaghani. Nu vetula te nomhihi ghotilo funu tifa ia kolho.

⁸ Neuba, vetula igne majaghani fabrahu, jateula te filonihi ka mae Jisas Kraes nei ka ghotilo. Naugna gromno na sala'u ari, eghuteuna thofno naphae na la siasigla mei.

⁹ Neuba ihei ka ghotilo ne cheke eghu, “Iara auhi ka naphae!” nu te tirognani mana mae kheragna fofodu na, mana au ngala kate romno fabrahu ghilei posa gognaro.

¹⁰ Mae ihei te namhani kheragna fofodu na, mana au kate phae, eghuteuna jare na theo kaisei nafugna te mala eni mana kaisei najafra na.

¹¹ Nu ihei te tirognani kheragna fofodu na, mana au kate romno, nei theome laseni aheva te tei na naugna gromno na fadofuni mana.

¹² Iara riso ari ka ghotilo glepo igre thuguro, naugna God hata fadeleihi nakhibomire ka nanghagna mae Jisas.

¹³ Iara riso ari ka ghotilo mamare, naugna ghotilo lasenihi God, mae ihei te au fabrahu funu tifa ka vuvuhagna nauthoglu gne. Iara riso ari ka ghotilo mae majaghani ra, naugna ghotilo tapla sorunihi mae Satan.

¹⁴ Iara riso ari ka ghotilo goro sua nalhaꞌu nei goro sua gaꞌase teura, naugna ghotilo lasenihi Mama. Iara riso ari ka ghotilo mamare, naugna ghotilo lasenihi God, mae ihei te au fabrahu funu tifa ka vuvuhagna nauthoglu gne. Iara riso ari ka ghotilo mae majaghani ra, naugna ghotilo heta fara. Eghuteuna chekegna God na au balumi nei ghotilo tapla sorunihi mae Satan.

¹⁵ Thosei namhani puhigna nauthoglu igne ba glepo gna nauthoglu igne. Jame ihei te namhani puhigna nauthoglu na, nogna namha Mama na theome au ka mana.

¹⁶ Igre glepo diꞌa ka nauthoglu igne: magnahaghei glepo diꞌa te keli tagna thini, magnahaghei glepo diꞌa te filoni ka tatha, nei fahaehaghedi fara eidi glepo te au tada. Nu glepo igre funudi ka puhigna nauthoglu igne, theome funudi ka God Mama.

¹⁷ Nauthoglu igne na ginauna hui. Eghuteuna gobigna lepo te magnahaghedi naikno ka nauthoglu igne na hui. Nu ihei te eni unha te magnahagheni God na karha tifa tifa.

Nogna naoka mae Kraes

¹⁸ Uve thuguro, narane leghu lahu na la namohi! Ghotilo nomhinihi nogna naoka mae Kraes la namo mei. Tutuani fara, gognaro na kmana nogna naoka mae Kraes auhi agne! Eghume tahati laseni u narane leghu lahu la namo meihi.

¹⁹ Nogna naoka mae Kraes gre neke au baluda tahati. Nu gognaro na mare la jifla koko ghitahi. Naugna mare theome thofno nogna tothoghei tahati gne. Jame thofno nogna tothoghei tahati gne na, mare au ngau baluda tahati. Nu mare tei koko ghita tahati, eghume gaglana fara te theo kaisei mae ka mare tarabana te mala leghuni mae Kraes baluda tahati na.

²⁰ Nu ghotilo theome jateula mare eghu, eigna mae Tharunga te Blahi neke meihi ke klignami ghotilo. Eghume ghotilo te gnafa na laseni cheke te tutuani na.

²¹ Iara theome riso ari ka ghotilo naugna ne theome laseni cheke te tutuani na. Theo. Iara riso ari ka ghotilo naugna ghotilo lasenihi cheke te tutuani na, eghuteuna ghotilo lasedihi chaichaghi ghe tutuani gre theome tei fodu.

²² Eghume ihei gne naikno te chaichaghi na eghu? Naikno te chekeni mae Jisas na theome mae Kraes teu igne. Nafnata naikno tuana nogna naoka mae Kraes. Mana theome fatutuani ni Mama ba Thugna.

²³ Jame kaisei naikno te theome fatutuani ni Thugna na, mana theome fatutuani nila Mama. Naikno te fatutuani ni Thugna na, mana fatutuani nila Mama.

²⁴ Hati nhetami na leghuni fabrahu farirhiu teke nomhini ghotilo tifa ia. Jame leghuni fabrahu ghotilo farirhiu tuana, ghotilo ginauna na au baludi Thugna ghe Mama.

²⁵ Eghuteuna igne unha teke nhaꞌa chekeni thegna mae Kraes te mala tusu ranghi ghita tahati na, eigna u karha fei tifa.

²⁶ Iara riso ari ka ghotilo letas igne eidi iheire te fariu batu fadiꞌa ghami ghotilo.

²⁷ Nu mae Kraes neke kuru meini mae Tharunga te Blahi na ka ghotilo. Mae Tharunga te Blahi gne au ngala balumi ghotilo mala farirhiu ghami gobigna lepore. Eghume ghotilo theome magnahagheni kaisei mae velepuhi delei te mala farirhiu ghami na. Mae Tharunga te Blahi gne tutuani fara, theome chaichaghi. Eghume heta ghemi au balugna mae Kraes, jateula mae Tharunga te Blahi teke farirhiu ghami ghotilo ia eghu.

²⁸ Uve thuguro, au fabrahu balugna mana. Te eni tahati igne na, tahati theome tangomana te mhaghu ka narane nate pulo mei mae Kraes. Tahati ginauna theome tangomana te poru ba mamaja kate mei mana na.

²⁹ Ghotilo kafe laseni God na mae keli fara nei eni fabrahu unha te doglo na. Eghume ghotilo kafe laseni iheire te eni unha te doglo na mare goro thugna God.