Thoutonu Eigna Rut 3 - Buka Blahi Ka Cheke Holo

Naomi ne magnahaghei hironi kaisei khetogna Rut

¹ Naomi neke cheke eghu ka Rut, “Nanghona, iara magnahaghei te hironi kaisei khetomu iagho, mala taji nigho nei fiofilo nigho eghu.

² Fanomho fakeli ka iara iagho ia! Boas, mae funei te loku teu iagho baludi nogna gaꞌase gloku na are, naꞌa kaisei vike ngala ka mae biꞌo teke tolaghi iara ia. Eghume mana ngala tangomanau te tolaghi ka iagho na. Ginau bongi na mana na tei ka vido te mala fifliti khunedi balire.

³ Eghume iagho na tei apu nou ghiha sedi nei famane pipichi nou eghu ia! Eghuteuna iagho na tei ka vido aheva nate tei loku mana na eghu, nu iagho thosei tei fakakhana eghu. Te keli na iagho ofou ghilei gnafa ghamu nei koꞌu eghu mana.

⁴ Kate kaikaliti thuru eghu teu mana na iagho tei ka vido aheva te thuru teu mana na eghu. Iagho te pagli haghe thotoku ka ghahegna na, eghuteuna iagho lao thuru rhedi ghahegnare eghu. Eghuteuna mana ginauna na cheke ranghi nigho unha te mala eni iagho na.”

⁵ Rut ne cheke eghu, “Keli fara, iara na leghudi unha te chekedi iagho igre.”

⁶ Aonu Rut kegra haghe ne tei ka vido aheva te mala fifliti khunedi balire ne leghudi nogna cheke Naomi re.

Mae Boas magnahaghei te toghoni Rut

⁷ Ke leghugna ima nei koꞌu teu te boho na, mae Boas ne keli tagna ne tei ne thuru soru rhegnai bukrei bali na. Rut thoghei ne tei ne pagli haghe thotoku na ne tei thuru rhedi ghahegna mae Boas re.

⁸ Fari hotei bongiro kate figri te dofra haghe na, mae Boas ne jaglo nogna kaisei gaꞌase te thuru teu rhedi ghahegnare ne dofra haghe.

⁹ Mana ne ghusna eghu, “Ihei sagho ia?” Rut ne cheke eghu, “Iara Rut, kaisei nou gaꞌase gloku iagho. Iara magnahaghei nigho iagho te atha ghau iara mala khetomu iagho, naugna iagho vikegna ngala ihei teke tolaghi iara tagna tifa ia.”

¹⁰ Mae Boas nomhidi nogna cheke Rut igre ne cheke eghu ka naꞌa, “God te fablahi nigho, thuguo, naugna puhi te eni iagho igne tei la salaꞌuni fara unha teke eni iagho ranghini nanghomu Naomi ia. Eghume, iara thofno jaglo nogu fara te tirou hironi iagho kaisei mae te majaghani te thofno dedei ba mae majaghani te kuma, nu iagho na theome gaoghatho te mala tolaghi ka nafnata mae majaghani igre na.

¹¹ Naikno gna namono igne la kafe lase nigho iaghohi te kaisei gaꞌase keli fara iagho na. Eghume, iagho thosei mhaghu eghu, eigna iara ginauna na edi unha te toredi iagho igre.

¹² Tutuani fara, iara kaisei mae ka vike gna khetomu iagho na. Nu mae te au teu agne te thofno namo fara ke ulugu iarai ka mae teke tolaghi iagho tagna na te thofno nabagna te mala tolaghi ka iagho na.

¹³ Thofno keli fara te thuru teu iagho agne bongi gognaro gne. Iara na faghila tei hironi gaoghathogna mae ihei te chekeni iara igne. Jame te magnahaghei nigho mana na, thofno keli fara. Nu jame te tirogna teu mana na, iara cheke ka nanghagna Lord mae ihei te karha te tifa, iara ginauna tolaghi ka iagho. Iagho au agne ka iara ghilei hamerane nathuꞌu.”

¹⁴ Aonu Rut ne thuru ne ghilei rane jare rhedi phei ghahegna mae Boas re. Hamerane boibongi, mae Boas ne fadofrani Rut mala theome laseni kaisei naikno te mei thuru teu Rut jare na.

¹⁵ Mae Boas ne cheke eghu ka Rut, “Atha mei kaisei nou pohe mala pakra soru agne pari mala tofa soru iara keha bali malamu iagho.” Mae Boas ne tofa soru keha bali ka nogna pohe Rut na ne thokeni varadaki kilo. Mana ne toghoni Rut ne pala haghe ka naꞌa ne atha neke pulo ka suga na.

¹⁶ Kate posa lao Rut ka suga na, Naomi ne ghusna eghu ka naꞌa, “Nanghona, ne faꞌunha neu ngala iagho ia?” Aonu Rut ne toutonu ka Naomi gobigna lepo teke edi mae Boas ka naꞌa re.

¹⁷ Rut ne cheke eghu, “Boas na theome magnahaghei te sasama teke mei iara ka iagho na ne famei ka iara varadaki kilo igre.”

¹⁸ Naomi ne cheke eghu ka Rut. “Uve, tapa na ofoni kolho unha nate chekeni mae Boas na. Boas ginauna ghosei fadoglini puhi igne. Tapa theome laseni unha nate thakle mei ginauna.”