Thoutonu Eigna Rut 2 - Buka Blahi Ka Cheke Holo

Rut ne tei hiro gano

¹ Mae Boas gne khetogna Naomi. Mana kaisei mae dedei nei mana jaola kaisei mae biꞌo eghu ka namono tuana.

² Aonu Rut ne cheke eghu ka Naomi, “Iara magnahaghei tei loku ka nagare mala salo keha bali kate kato soru te lilisei te tei goro nalhaꞌure are. Jame te keliu ngala teu rehati na, iara ginauna tei ke leghudi reꞌe mala salo tei bali te ikodi are.” Naomi ne cheke eghu ka naꞌa, “Keliu ngala, tei sagho.”

³ Aonu Rut ne tei ka nagare na. Naꞌa ne tei ke leghudi mae glokure ne salo phaꞌudi bali te lilisei faleghu teke tei mae glokure. Nu Rut theome laseni nagare igne te nogna nagare mae Boas, vikegna mae Elimelek teu na.

⁴ Ke leghugna igne, mae Boas jifla ka namono na ne mei ka nagare na ne cheke eghu, “Hamerane keli,” neu ka nogna mae gloku te kato bali teure ne cheke eghu, “Lord te au balumi.” Aonu mare ne cheke eghu, “Lord te fablahi nigho.”

⁵ Mae Boas ne ghusna eghu ka mae funeigna gloku na, “Ghema, vikegna mae ihei si gaꞌase majaghani ana ia?”

⁶ Mae funeigna gloku na ne cheke eghu ka mae Boas, “Gaꞌase ana thaugna Moab neke mei agne balugna Naomi.

⁷ Naꞌa neke tore ka iara mala tei ke leghudi mae glokure mala salo tei phaꞌudi bali are. Naꞌa loku funugna hamerane na la ghilei posa gognaro gne. Gognaro na naꞌa ke gnafa lao ghu katha vido ka grorofe ana.”

⁸ Mae Boas ne cheke eghu ka Rut, “Thughuo, fanomho sagho ka iara, iagho thosei tei salo phaꞌu bali ka keha nagare are. Iagho mala atha phaꞌu bali ka nagare igne kolho. Iagho au agne mala loku baludi nogu gaꞌase gloku iara igre.

⁹ Filo fakeli ka vido aheva te loku mae nalhaꞌu nei gaꞌase teu are mala tei ke leghudi gaꞌase gre. Iara chekehi mala thosei eni naiknore kaisei puhi ka iagho. Eghuteuna glahula te rou koꞌu na, iagho tei koꞌu ka botol tela tohohi goro gaꞌase na are eghu.”

¹⁰ Eghuteuna Rut tufru soru pari ne cheke eghu ka mae Boas, “Iara gaꞌasegu ka keha vidoi. Naugna unha sagho te keli fara ranghi ghau iara gnea?”

¹¹ Nu mae Boas ne cheke eghu ka Rut, “Iara la nomhidihi unha te edi iagho ranghini nanghomu ia, funu ke leghugna teke lehe khetomu ia tela ghilei mei posa ka narane gognaro gne. Iara laseni te tei kokodi iagho idomu nei kmamu teura, nei iagho jaola jifla kokoni thofno namonomu na tela mei au balumi ghehati ka namono aheva iagho te theome lasedi puhidi naikno igre.

¹² God gna Israel ginauna taba nigho eidi unha gloku te keli teke edi iagho ra. Eghuteuna mana ginauna reireghi fakeli nigho, naugna iagho ne mei ka mana jateula kaisei sua nanghaji te deni nogna vido mala poru na ia neu.”

¹³ Aonu Rut ne cheke eghu ka mana, “Mae funei, iagho thofno keli fara ranghi ghau iara, neubane theome kaisei nou naikno gloku iagho ngau iara, iagho ne thoghei ne famane cheke ranghi ghau iara. Eghume iara gognaro na thofno glealeꞌa fara gaoghathogu na.”

¹⁴ Ka vido te ima teu mare na, mae Boas ne cheke eghu ka Rut, “Mei atha kaisei bret mala titihi ka waen igre mala famane mamahe mala ima.” Eghume, Rut leghuni nogna cheke mae Boas igne ne atha bret na ne mei gnokro baludi mae glokure ne ima baludi mare. Aonu mae Boas ne atha keha bali teke gahuhi ka khaꞌaghire ne tusu lao ka naꞌa. Rut ima ne boho ne salaꞌui keha gano.

^15-16 Ke leghugna ima te boho na, Rut kegra haghe neke funu salo phaꞌudi balire. Mae Boas ne cheke eghu ka nogna mae glokure, “Ghotilo lisa soru keha ka naꞌa na mala haru teu ghotilo are mala salo naꞌa, thosei khini naꞌa.”

¹⁷ Aonu, Rut salo phaꞌudi balire ne ghilei plulu naprai na. Kate salo te gnafa na, naꞌa gnokro soru ne fifliti khunedire ne atha ganodire. Tahudi re jame gijana nabotho kilo.

¹⁸ Rut gnafa gloku ne atha ne posa balugna vido gano teke ima kokodi naꞌa fari hotei aublatha re ka Naomi.

¹⁹ Aonu, Naomi ne ghusna eghu ka Rut, “Ba? Iagho neke tei atha bali aheva? Ka nagare ihei? God te fablahini ihei te ghatho nigho igne!” Rut ne cheke eghu ka Naomi, “Uve, iara neke tei loku ka nogna nagare mae te kiloi Boas.”

²⁰ Naomi ne cheke eghu, “Tutuani fara, Lord na fablahini mae igne! Lord na thofno keli fara ranghi ghita, eghuteuna mana theome ghatho ihoni nogna nhaꞌa cheke teke eni mana ka iheire tela lehehira nei ka iheire te karha nga teu gre eghu.” Naomi ne cheke eghui, “Uve, thau igne kaisei vike ngala ka thau teke tolaghi iara tagna ulu lahu ia. Eghume jame mana meu ngala jame te gijagna te mala reireghi ghita tapa na eghu.”

²¹ Aonu Rut ne cheke eghu, “Uve, tutuani fara, mae funei na neke cheke eghu langau ka iara, ‘Iagho mala loku fabrahu agne baludi goro gaꞌase nei mae gloku igre eghu mala ghilei gnafa salogna bali igne.’ ”

²² Naomi ne cheke eghu ka Rut, “Thofno keli fara, iagho na tei mala loku baludi rehati kolho, eigna glahula jame te tei loku iagho baludi keha naiknoi na, reꞌe ginauna edi keha puhi te theome keli ka iagho.”

²³ Aonu Rut ne loku fabrahu baludi goro gaꞌase te loku ka mae Boas ne ghilei gnafa katogna bali nei wit teure. Eghuteuna Rut au fabrahu neu repa Naomi.