Thoutonu Eigna Rut 1 - Buka Blahi Ka Cheke Holo

Khetogna nei thugna teu Naomi re ne kafe lehe ka kantri Moab

^1-3 Ka narane ame kegra king nga Israel teuna, vido te theo gano ka kantri tuana na ne thoke mei. Aonu mae Elimelek, kaisei maegna ka namono Betlehem ne tei au keha finogha ka kantri Moab. Mana ne jifla baludi khetogna nei thugna nalhaꞌu teure ne tei au jare. Nanghagna khetogna mae Elimelek na Naomi, eghuteuna nanghadi phei mae thugna mana re, mae Malon ghe mae Kilion. Naiknodi ka vikegna Efrata, ka namono Betlehem ka provins Juda. Mare au neu jare Moab ne ghilei lehe mae Elimelek. Naomi au soru jare baludi phei mae thugna re.

⁴ Aonu mae Kilion ne tolaghi ka Opa eghuteuna mae Malon ne tolaghi ka Rut neu, ne au soru jare nabotho finogha.

⁵ Ke leghu na mae Malon ghe mae Kilion gre ne jaola ne lehe jare Moab, eghuteuna Naomi ne theo khetogna nei thugna neu.

Naomi neke figri Betlehem

^6-7 Kate nomhini Naomi God te kokhonidi naiknodi Israel gre te toghodi ka gano na, naꞌa ne tarabana mala ke figri Juda baludi phei nanghognare. Aonu kate tei teu retilo ka nabrou na,

⁸ Naomi ne cheke eghu ka Opa ghe Rut, “Jame te keli na ghopa ke figri ka namono mala ke au keu ka kmami, idomi nei vikemi teure. Iara na toreni God mala falalase ranghi ghami nogna namha na, jateula te eni ghopa te namha ghau iara gne eghu. Phei thugu nalhaꞌu iara ra la lehehi eghu ra. Eghuteuna ghopa neke jaola neke keli ranghidi phei thugu nalhaꞌu iara ra.

⁹ God ginauna togho ghami ghopa mala ke tolaghi nei au fakeli eghu ghopa baludi khetomire.” Kate kubae te gnafa Naomi ka repa na, repa ne orio tanhi fabiꞌo.

¹⁰ Aonu repa ne cheke eghu ka Naomi, “Theo, neuba ngau, ghepa na tei ngala balumu iagho mala tei au baludi vikemu iagho re.”

¹¹ Nu Naomi ne cheke eghu ka repa, “Theo, theome raꞌe keli jame te mei ghopa balugu iara na. Te keli na ghopa ke figri, naugna iara gne na theome tangomanahi nate ke au sua nalhaꞌu mala teke tolaghi ghopa na.

^12-13 Ke figri ka namono si ghopa. Eigna iara gne la kaekave noguhi la theome nabahi teke tolaghi na. Naugna neubane cheke eghu ngau iara ka ghopa, ‘Ofou ngala si ghopa, iara gne ginauna nake au phei thugu nalhaꞌu signea mala ke tolaghi ghopa!’ Cheke te edi iara igre theome mala ke lhoti ghami ghopa mala teke tolaghi na eghu. Ba, jame neubane tolaghi ngala iara ginau bongi na ne au phei thugu nalhaꞌu, ghopa theome tangomana te ofo teu te ghilei biꞌo repa na. Nu glepo igre thofno ninhigrana fara! Naugna God na la theome filo meihi ka iara gognaro na.”

¹⁴ Aonu repa neke funu orio tanhi fabiꞌo, kate tanhi te gnafa na, Opa ne kubae ka Naomi tanhi neke figri. Nu Rut ne tirogna tei kokoni Naomi.

¹⁵ Aonu Naomi ne cheke eghu ka Rut, “Filo sagho, kheramu gaꞌase ia keli figri hila ka kheragna nei nogna god eghu te pogho soruni naꞌa Moab na. Eghume, jame te keli na iagho ke figri balugna.”

¹⁶ Nu Rut ne cheke eghu ka Naomi, “Ido, iara theome magnahaghei te tei koko nigho iagho na, iara gne magnahaghei te tei ngala balumu iagho. Thosei ke kuru fafigri ghau iara. Aheva te tei iagho na, iara na jaola tei jare. Kheramu iagho re mala jaola kheragu iara, eghuteuna nodi God mae Israel te pogho soruni iagho na jaola pogho soruni iara.

¹⁷ Ka vido aheva te lehe iagho na, iara mala jaola lehe jare mala giugilu balumu iagho ka vido tuana. Eghume, thofno glepo te tutuani na ngala te cheke arini iara ka iagho igne. Theo kaisei glepo te tangomana ni te fota ghita, nu kaisei glehe ngala te tangomana ni te mala fota ghita na eghu. Jame te cheke chaichaghi nogu kolho iara ke ulumu iagho na, God ginauna fate ghau iara.”

¹⁸ Kate filo glani ni Naomi te lao gaoghathogna fara Rut te mala te tei balugna na, Naomi ne theome cheke.

¹⁹ Aonu Naomi ghe Rut ne jifla jare Moab ne tei Betlehem. Kate filodi repa te posa ka namono na, goro gaꞌasere ne eha eghu fabiꞌo, “Ihei signea? Naomi na kela pulo mei ka tahati!”

²⁰ Nu Naomi ne cheke eghu ka reꞌe, “Uve, iara Naomi ngala, nu ghotilo thosei ke kilo ghau iara Naomi gognaro na eghu. Eigna gaoghathogna nangha Naomi teu igne, ‘Glealeꞌa’ eghu. Te keli na ghotilo kilo ghau iara Mara, gaoghathogna na, ‘diꞌanagnafa’ eghu. Naugna God mae ihei te au nolaghi na ne fadiꞌa nagnafa ghau iara.

²¹ Kate jifla kokoni iara namono igne, iara neke jifla balugu kmana glepo. Nu gognaro na iara ke pulo mei sasama. Nu gognaro na, kate batu fapulo ghau iara God agne na, God atha fadelei gobigna lepo fateote'o re ka nakarhaghu iara na.”

²² Thoutonu igne eigna Naomi te jifla kokoni kantri Moab. Naꞌa neke figri balugna Rut gaꞌasegna Moab. Repa neke pulo Betlehem ka narane teke katogna mare nagare bali na.