Thakle 9 - Buka Blahi Ka Cheke Holo

¹ Aonu falima engel na ne ifu nogna khufli na. Eghuteuna iara ne filoni kaisei nathunu khoko funu kligna ne soru ka nauthoglu na. Mare ne tusu lao kaisei ki ka nathunu igne mala tothora grengathagna glave te mamhara fara na. Glave igne namonodi naitu te au ka sosolo.

² Kate tothora mana glave te mamhara igne, gagahu biꞌo na ne jifla mei ka glave na jateula gagahu khaꞌaghi te biꞌo fara neu. Eghuteuna gagahu te jifla mei ka glave na igne ne toku tafruni naphaegna naprai na ne romno fara maloa na.

³ Chechere ne jifla mei funudi ka gagahu tuana, ne soru mei ka nauthoglu gne. Eghuteuna mare tusu lao nolaghi ka cheche igre mala fakaukathu jateula khafrasege eghu.

⁴ Mare ne cheke eghu ranghidi chechere, “Thosei goigonidi buburu ba gaju ka nathua. Nu goigonidi kolho naikno te theo nogna fagaglana God ka greredire.”

⁵ Eghuteuna mare tangomana te paradi naiknore nabagna glima nhigra, nu mare theome tusu ranghidi nolaghi te mala falehedi naiknore. Eghuteuna khabru te haimini naiknore na jateula khabrugna te kathu khafrasege ia eghu.

⁶ Aonu ke lamnadi glima nhigra igre, naiknore ginauna fariuriu filoni kaisei nabrou te mala lehe nodi na, nu mare ginauna theome tangomana te filo deni na eghu. Tutuani, mare ginauna magnahaghei fara te lehe, nu mare ginauna theome tangomana kolho te lehe na.

⁷ Eghuteuna cheche igre jateula hose te kaikaliti te mala tei ka magra ia eghu. Ka pha'udire mare fahaghe glepo teke hohoro ka gol jateula khepi eghu. Eghuteuna tathadire jateula tatha naikno eghu.

⁸ Khakladire brahu jateula khakla gaꞌase eghu, eghuteuna khe'idire biꞌo jateula khe'i lion eghu.

⁹ Mare fahaghe phoko jateula phoko mala magra teke horo ka aean eghu. Eghuteuna taitanhidi baghidire jateula naogladi kmana hose nei chariot eghu te chari te tei ka magra ra eghu.

¹⁰ Eghuteuna cheche igre au seko mala faghughumhu jateula khafrasege eghu. Sekodire au nolaghi te mala goigonidi naiknore naba glima nhigra.

¹¹ Cheche igre au kaisei nodi mae King te mala funei frunidire. Mae igne kaisei mae engel, mana ngala mae biꞌo gna glave te mamhara fara igne. Eghuteuna ka cheke Hibru na, nanghagna engel igne mare kiloni mana, “Abadon”, nei ka cheke Griki na, “Apolion”. Eghuteuna ka cheke tahati na, “Mae mala goigonidi thua lepore.”

¹² Igne papara ulu lahu te diꞌa fara tela sala'u arihi na, nu phei papara te diꞌa langau nate mei teu ginauna.

¹³ Fafamno engel na ne ifu nogna khufli na. Aonu iara ne nomhini kaisei cheke te jifla mei ka fati sulukhugna olta teke hohoro ka gol te kegra teu ke ulugna God na.

¹⁴ Cheke igne ne cheke eghu lao ka fafamno engel na, “Fati engel teke haru mare ka Khoꞌu biꞌo Iufretis ra, iagho mala ke snakre teidi mare!”

¹⁵ Ka vido tuana, fafamno engel na ne snakre teidi fati engel igre mala aknu falehe fatilo naiknogna nauthoglu igne. Fati engel igre, mare neke kulu kaikalitihi tifa malagna narane gognaro gne ngala.

¹⁶ Te nomhini iara ka mare na, tothoghei mae soldia te gnokro ka hose na mare kaikaliti mala tei ka magra, mare thokeni phei gobi mola.

¹⁷ Aonu iara ne filodi hose igre baludi mae iheire te gnokro teu ke klignadi. Mare fahaghe phoko aean te ukru fara, pipito, nei rija eghu. Pha'udi hose igre jateula pha'u lion eghu. Hose igre jifla mei khaꞌaghi, gagahu, nei thina ngaja eghu ka foflodire.

^18-19 Mare ne falelehe fatilogna naikno na ka thilo papara biꞌo igre ka khaꞌaghi, ka gagahu, nei ka thina ngaja eghu teke mei ka foflodi hose igre. Hose igre jaola falelehe naikno ka sekodire naugna sekodire au pha'u jateula mogo eghu, igre glepo te mala goigonidi naiknore.

²⁰ Keha naikno ka nauthoglu igne re ne theome lehe ka papara biꞌo igre. Nu mare tirodi tughu nagnafa nei figri tagrudi eghu mumuju teke horo thedi ka khamedire. Tutuani, mare theome gnafa ka puhi te pogho soru ka naitu nei mumuju eghu teke hohoro ka gol, silva, bras, thina, nei gaju. Glepo igre theome tangomana te fifilo ba nonomho ba nonolo.

²¹ Naikno igre jaola theome tughu nagnafa nei figri tagrudi eghu puhi te faghoreho poru ba eni puhi te diꞌa ba blau ba edi meresin te diꞌa mala falehe naikno.