Thakle 8 - Buka Blahi Ka Cheke Holo

Lam na ne hata koko fafitu loke na

¹ Kate hata koko Lam fafitu loke gna buka na, kligna na ne muana katha vido.

² Iara ne filodi fitu engel re ne kegra neu ke ulugna God. Hatimare ne tusu lao fitu khufli ka mare.

³ Aonu kaisei engel mei ne kegra ka olta na. Eghuteuna mana louloku kaisei tapera teke hohoro ka gol te fodu ka insens. Hatimare ne tusu ranghini mana kmana insens mala salo fodu baludi nodi tharai nogna naikno God re. Eghuteuna mana ne fafara ka olta teke hohoro ka gol te kegra teu ke ulugna nogna sape nafnakno mae King na.

⁴ Gagahugna insens baludi nodi tharai nogna naikno God re haghe ne thoke ka God funu ka tapera ikoi te au ka khamegna engel na.

⁵ Aonu engel na ne hata tapera insens na ne fafodu khaꞌaghi ka olta na ne koko soru ka nauthoglu na. Ka vido tuana nakafli nei fila nei nakheu biꞌo.

Namno engel re ne kufli

⁶ Aonu fitu engel re teke hata fitu khufli, kaikaliti mala ifu.

⁷ Engel ulu lahu na ne ifu nogna khufli na. Aonu nakhete thina nei khaꞌaghi balu dadara ne thofa soru ka nauthoglu na. Eghuteuna ke lamnagna nauthoglu na, kaisei vido biꞌo gna glose baludi buburu te gnafa nei fatilo gaju gna nathua na ne nhako ka khaꞌaghi.

⁸ Aonu fapea engel na ne ifu nogna khufli na. Eghuteuna kaisei glepo jateula kaisei thogele biꞌo te nhako ka khaꞌaghi, ne tei khoko lamna nhorora. Eghuteuna kaisei vido biꞌo gna nhorora na ne vuhai dadara,

⁹ eghuteuna fatilogna sasa ke lamnagna nhorora na ne lehe. Jaola fatilogna vaka ke lamnagna nhorora na ne thono diꞌa fara.

¹⁰ Fatilo engel na ne ifu nogna khufli na. Eghuteuna kaisei nathunu biꞌo jateula juta jeklo teu filogna na ne soru mei ka maloa na ne khoko soru ke kligna fatilogna khoꞌu biꞌo nei glokha.

¹¹ Eghuteuna nanghagna nathunu biꞌo igne mare ne kiloni “Raha”. Fatilodi kho'ure ne raha fara, eghuteuna kmana naikno ne lehe, naugna mare ne koꞌu ka khoꞌu te raha tuana.

¹² Aonu fafati engel na ne ifu nogna khufli na. Eghuteuna kaisei vido biꞌo ka naprai na nei kaisei vido biꞌo ka glaba na eghu ne kafe blalho. Eghuteuna fatilodi nathunure jaola ne blalho. Eghume kaisei vido biꞌo ka narane na ne theome phae, eghuteuna kaisei vido biꞌo ka bongi na ne jaola.

¹³ Kate filo teu iara na, iara ne nomhini kaisei gaghata ne flalo ka maloa na kligna fara. Gaghata tuana ne eha eghu fabiꞌo fara, “Puhi biꞌo! Puhi biꞌo! Puhi biꞌo ranghidi iheire te au ka nauthoglu! U puhi biꞌo igne ginau fufunu ka naogladi nodi khufli thilo engel kate ifu teu igre!”