Thakle 7 - Buka Blahi Ka Cheke Holo

Fagaglana ka naiknodi Israel

¹ Ke leghugna igne, iara ne filodi fati engel kegra neu ka fati sulukhugna nauthoglu gne. Mare kegra fanogradi fati nuri ka nauthoglu gne mala thosei ghaghafa mei ka namono ba gaju ba ka nhorora.

² Aonu iara ne filoni kaisei engel ne thakle mei ke maghati. Mana louloku kaisei glepo te mala eni fagaglana ne lilisei ka greredi nogna naikno God re. Engel igne ne eha fabiꞌo ka keha fati engel re. God neke tusu lao nolaghi ka fati engel igre mala goigonidi glose nei nhorora.

³ Mana ne cheke eghu ka fati engel re, “Thosei goigonini glose ba gaju ba nhorora. Ghehati na kulu lilisei fagaglana ka greredi iheire te loku fabrahu ranghini noda God.”

⁴ Aonu iara ne nomhidi niha naikno te au nogna fagaglana God tadire, thokeni kaisei gobi phiatutu fati thogha naikno. Mare jifla mei ka vike te gnafa gna Israel.

^5-8 Igre nanghadi vike te gnafa Israel re: mae Juda, mae Ruben, mae Gad, mae Asa, mae Naftali, mae Manase, mae Simion, mae Livae, mae Isakar, mae Sebulun, mae Josep, mae Benjamin. Ke lamnadi soasopai vike igre mae engel na ne lilisei fagaglana ka greredi nabotho phei thogha naiknore.

Nakhapru biꞌo kligna

⁹ Ke leghugna igne, iara ne filodi kmana naikno fara, te theome tangomana kaisei naikno te kahadire. Naikno igre mei funudi ka tharakna te gnafa nei ka vike te gnafa nei ka namono te gnafa nei ka cheke te gnafa teu ka nauthoglu igne. Mare ne kafe kegra ke ulugna nogna sape nafnakno mae King na nei ke ulugna Lam. Mare pipichi pohe vegha nei louloku grege thubo ka khamedire mala kilo fnaknoni God.

¹⁰ Aonu mare ne eha eghu fabiꞌo, “Noda God te gnokro teu ka nogna sape nafnakno mae King na balugna Lam, phiamare mala fakarha ghita.”

¹¹ Aonu hatimare mae engel re ne kegra falithuini nogna sape nafnakno mae King na nei falithuidi hatimare mae biꞌo ka khiloau nei fati glepo te karha igre. Mae engel re ne turupuku ke ulugna nogna sape nafnakno mae King na ne pogho soru ranghini God,

¹² ne cheke eghu, “Uve, tutuani! Nomi God, ghehati cheke fakeli nigho nei pala hagheni nanghamu na nei fafnakno nigho. Ghehati cheke fakeli nigho eidi nou gaoghatho te keli nei nou nolaghi te biꞌo nei nou nanheta te au fabrahu tifa tifa. Amen!”

¹³ Aonu kaisei mae ka hatimare mae biꞌodi ka khiloau gre ne ghusna eghu ka iara, “Ghema, iheire si naikno te pipichi pohe vegha igrea? Neke mei funudi aheva?”

¹⁴ Iara ne cheke eghu ka mana, “Mae biꞌo, iara theome lasedi. Iagho ngala te lasedire.” Mana ne cheke eghu ka iara, “Naikno igre neke theome lehe ka papara biꞌo. God neke hata fadelei nakhibodire naugna Lam na neke thofa dadaragna na neke lehe. Eghume gognaro na mare klino fara ke ulugna God.

¹⁵ Naugna igne mare kegra ke ulugna nogna sape nafnakno God na mala fafnaknoni mana. Mare theome gnafa bongi narane na pogho soru ranghini mana ke lamnagna nogna Sugablahi igne. Eghuteuna God mae ihei te gnokro ka sape nafnakno na ginauna au baludi mala reireghi fakelidi.

¹⁶ Mare ginauna theome tangomana te rofo nei theome tangomana te roi koꞌu. Eghuteuna nabranagna naprai na nei nabranadi keha glepore eghu ginauna theome tangomana nate goigonidi mare na.

¹⁷ Naugna Lam na te au ka nogna sape nafnakno mae King na, mana ginauna reireghidi jateula kaisei mae te reireghidi nogna sipura eghu. Mana ginauna baubatudi mala tei koꞌu ka khoꞌu glokha te tusu ranghidiu u karha. Eghuteuna God ginauna nuju koko kholo te gnafa ka tathadire mala theome tangomana mare te diꞌanagnafa na.”