Thakle 6 - Buka Blahi Ka Cheke Holo

Mae Lam ne hata koko loke gna buka na

¹ Kate filo teu iara na, mae Lam na ne hata koko loke ulu lahu na ka fitu loke igre. Eghuteuna iara ne nomhini kaisei ka fati glepo te karha igre ne eha fabiꞌo jateula fila neu. Mana ne cheke eghu ka kaisei mae, “Mei sagho!”

² Aonu iara ne filoni kaisei mae balugna kaisei phaloho nei kaisei jata, mana saghe ka hose vegha na ne jifla mei. Eghuteuna mare jaola ne nhaꞌa lao kaisei khepi nafnakno ka pha'ugna mana na. Mana saghe ne tei ka hose na jateula kaisei mae teke ulu kau magra eghu, eghuteuna mana saghe ne tei mala ke uluni keha magra na.

³ Aonu iara ne filoni mae Lam na ne hata koko fapea loke gna buka na, eghuteuna iara ne nomhini fapea glepo te karha na ne cheke eghu ka kaisei mae, “Mei sagho!”

⁴ Aonu keha hose na ne jifla mei. Hose igne ukru fara. Eghuteuna kaisei mae te saghe ka thagrugna hose igne na, mare ne tusu lao kaisei naflahi biꞌo mala magra. Mana jaola ne hata nolaghi te mala fufunu magra ka nauthoglu igne, mala faghoreho fari thedi naiknore.

⁵ Mae Lam na ne hata koko fatilo loke na. Aonu iara ne nomhini fatilo glepo te karha na ne cheke eghu ka kaisei mae, “Mei sagho!” Iara filo lao ne filoni kaisei hose te pipito ne jifla mei. Eghuteuna mae te saghe ka hose na mana louloku kaisei skel ka khamegna na.

⁶ Aonu iara ne nomhini kaisei naogla farihoteidi fati glepo te karha igre ne cheke eghu, “Naiknore ginauna foli katha gano ikoi ka sileni te biꞌo fara! Thosei goigoni nodi oel nei waen teu mare re!”

⁷ Aonu mae Lam na ne hata koko fafati loke gna buka na, eghuteuna iara ne nomhini fafati glepo te karha na ne cheke eghu ka kaisei mae, “Mei sagho!”

⁸ Iara filo lao ne filoni kaisei hose ne jifla mei, eghuteuna thinigna hose tuana jateula teke lehehi eghu thono diꞌa fara filogna na. Nanghagna mae te gnokro ka hose tuana, “Glehe”. Eghuteuna “Hades”, namonodi naikno te lehehira, ne mei namo fara ke leghugna mana. Eghuteuna God ne tusu ranghidi ka Glehe ghe Hades u nolaghi te mala falelehe kaisei ka fati naikno te gnafa ka nauthoglu igne. Tutuani, Glehe ghe Hades tangomana te falehedi naiknore ka magra biꞌo, ka grofo, ka fogra nei ka bosu mata gna nauthoglu igne.

⁹ Mae Lam na ne hata koko falima loke gna buka na. Aonu iara ne filodi keha tharunga ke parigna olta na. Tharunga igre, tharungadi naikno teke falelehe mare tifa ra, naugna mare neke fatutuani ni fabrahu chekegna God na nei toutonuni eigna u cheke tuana.

¹⁰ Tharunga igre ne eha eghu fabiꞌo ka God, “Lord, iagho thofno blahi fara nei tajini fabrahu nou nhaꞌa cheke na. Thosei faraugha te mala fate falehedi naiknogna nauthoglu igne. Eigna mare ne jafra fara. Gognaro na iagho mala paradi mare, naugna mare neke falehe ghami ghehati!”

¹¹ Aonu mare ne tusu lao pohe vegha ka mae tharunga te gnafare, ne cheke eghu, “Ghotilo mala ofou katha vido kmoꞌei. Naikno khiloau te gnafa teke loku jateula ghotilo teu igre ginauna jaola na lehe jateula nomi mae naoka ghotilo teke falehe ghami ghotilo tifa ra eghu. Eghuteuna God ginauna nake foli fapulo ka mare nakarhami ghotilo te gnafare. Nu ulu lahu na ghotilo ofou ghilei kafe lehe naikno khiloau gre.”

¹² Aonu kate filo teu iara na, mae Lam na ne hata koko fafamno loke gna buka na. Kaisei nakheu biꞌo ne nghali tongana, eghuteuna naprai na ne theome agha. Heva te heva ka nauthoglu igne na ne kafe romno soru, eghuteuna glaba na ne ukru jateula dadara neu.

¹³ Eghuteuna nathunu ka maloa na re jaola ne khoko soru pari jateula sisi gaju khebu te khoko pari ka nuri biꞌo ia eghu.

¹⁴ Eghuteuna u maloa na jaola ne pipiri jateula khifra neu ne tei delei. Eghuteuna thogele te gnafa nei moumolu te gnafa teure ne riu fadelei ka mala au dire.

¹⁵ Aonu naikno te gnafa ka nauthoglu gne ne mhaghu nodi fara ne poru lamna gluma nei ke leghu thina biꞌo ke kligna thogele. Neuba hatimare mae king gna nauthoglu igne, baludi hatimare mae funei biꞌo nei hatimare mae funeidi mae armi, baludi naikno te dedei nei naikno te au nolaghi, baludi naikno te gnafa, neubane mae sneka ba theome sneka, naikno te gnafa ne poru.

¹⁶ Aonu mare ne eha eghu lao ka thogele nei ka thina teure, “Khoko soru ke klignami mala pophoru ghami ka ihei te gnokro kau nogna sape nafnakno mae King na ana nei ka mae Lam te diꞌatagna ana.

¹⁷ Naugna gognaro gne, la thokenihi nodi narane biꞌo phiamare te mala para ghami ghehati na! Theo kaisei naikno te tangomana te kegra fanograni glepo igne ginauna!”