Thakle 5 - Buka Blahi Ka Cheke Holo

Pepa brahu au fitu loke tagna

¹ Aonu iara ne filoni kaisei pepa brahu te louloku fei khame nhetagna mae ihei te gnokro teu ka nogna sape nafnakno mae King na. Pepa brahu igne mare haru phei gaju ikodi ka phei philegnare neke piphiri. Mare te rioriso ka phei philegnare. Eghuteuna, mare famamhaku pepa igne ka fitu loke.

² Eghuteuna iara ne filoni kaisei engel te nolaghi fara, aonu mana ne eha eghu fabiꞌo, “Ihei te nabagna te hata koko loke igre te mala tothora pepa igne?”

³ Nu jare na theo kaisei naikno te au kligna ba ka nauthoglu igne ba ka namonodi iheire tela lehehira nabagna te tothora te efra ke lamnagna pepa igne.

⁴ Ka vido tuana iara ne tanhi fabiꞌo, naugna mare ne theome filoni kaisei naikno nabagna te tothora te efra ke lamnagna pepa igne.

⁵ Nu kaisei mae biꞌo ka khiloau na ne cheke eghu ka iara, “Ghema, thosei tanhi. Filo sagho! Igne lion ka vikegna mae Juda. Mana neke karha mei ka vikegna mae King Devet mala baubatudi vikegna mae Juda, eigna mana la tapla sorudihi nogna naokare kau magra na. Eghume, mana nabagna te hata koko fitu loke igre te mala tothora pepa na.”

⁶ Aonu iara ne filoni kaisei Lam kegra teu ke ulugna nogna sape nafnakno mae King na farihoteidi fati glepo te karha igre nei hatimare mae biꞌo ka khiloau te kegra falithuini teu nogna sape nafnakno mae King na. Eghuteuna Lam igne jateula teke falelehehi mare eghu filogna na. Mana au fitu honagna nei fitu tathagna. Igre fitu tharunga keli nogna God teke kurudi mana te tei heva heva ka nauthoglu igne.

⁷ Mae Lam ne mei hata pepa na kau khame nhetagna mae ihei te gnokro teu ka sape nafnakno na.

⁸ Eghuteuna kate hata mae Lam pepa na, fati glepo te karha gre baludi hatimare varadaki fati mae biꞌo ka khiloaure mare ne pogho soru ke ulugna mae Lam ne kilo fnaknoni mana. Mare te gnafa na kafe hata gita biꞌo mala koje nei dis teke hohoro ka gol te fodu ka insens. Dis igre nodi tharai iheire te fatutuani ni God re.

⁹ Mare ne kafe kojeni kaisei khoje te majaghani ranghini mae Lam na, ne cheke eghu, “Iagho nabamu te hata pepa na te mala hata koko loke are. Naugna mare neke falehe nigho, eghuteuna dadaragna glehemu iagho na kaisei fafara mala foli fajifladi nogna naikno God re. Naikno igre mei funudi ka vike te gnafa, ka cheke te gnafa, ka namono te gnafa nei ka kokholo te gnafa ka nauthoglu igne.

¹⁰ Iagho eꞌeidi mare mala mae pris te mala toghodi nogna naiknore nei mala pogho soruni God Kmagna noda King. Mare ginauna funei frunidi naiknogna nauthoglu igne.”

¹¹ Kate filo lao iara na, iara ne nomhini khojedi kmana mola mola engel, theome tangomana te kahadi. Mare ne kegra falithuni nogna sape nafnakno mae King na baludi fati glepo te karhare nei hatimare mae biꞌo ka khiloaure.

¹² Mare ne koje eghu fabiꞌo, “Mae Lam igne naiknore neke faleheni mana. Tahati nabada te cheke fakelini mana, naugna mana au nolaghi biꞌo, dedei, gaoghatho te keli, nanheta, nafnakno nei fablahi!”

¹³ Aonu iara ne nomhidi gobigna lepo teke vuavuha God te au kligna ba ka nauthoglu igne ba ka namonodi iheire tekela lehehira ba ke lamna thongna. Mare ne kafe koje eghu, “Tahati cheke fakelini fabrahu mae ihei te gnokro ka nogna sape nafnakno mae King na nei balugna mae Lam tifa tifa. Tahati fafnaknodi phiamare nei pala haghe nanghadire, nei cheke fakelini nodi nolaghi te biꞌo nei nanheta.”

¹⁴ Aonu ka vido tuana fati glepo te karha igre ne cheke eghu, “Amen!” Eghuteuna hatimare mae biꞌo ka khiloaure turupuku ne pogho soru ka phiamare.