Thakle 4 - Buka Blahi Ka Cheke Holo

Maedi kligna re kilo fnaknoni God

¹ Ke leghudi glepo igre, iara ne filoni kaisei grengatha ne thora kligna. Ka vido tuana iara neke nomhila naogla teke cheke meila ka iara ulu lahu ia, biꞌo fara jateula khufli eghu, ne cheke eghu ranghi ghau iara, “Iagho haghe agne, iara ginauna falalase ka iagho glepo na te theome raugha te thakle mei nathuꞌu nauriha na.”

² Aonu nogna nolaghi Tharunga te Blahi na ne ghosei ne mei ka iara mala batuni gaoghathogu iara na. Eghuteuna iara ne filoni kaisei nogna sape nafnakno mae King te au kligna te gnokro teu kaisei mae tagna na.

³ Eghuteuna mae ihei te gnokro teu ka nogna sape nafnakno mae King na igne, iara filoni thinigna mana na siasigla jateula phei famane thina jaspa nei konilian eghu. Eghuteuna falithuni nogna sape nafnakno mae King igne iara jaola filoni kaisei maja te siasigla jateula kaisei famane thina emaral.

⁴ Eghuteuna falithuni nogna sape nafnakno mae King na, varadaki fati sape nafnakno aula jare. Aonu ka sape nafnakno igre iara filodi varadaki fati mae biꞌo ka khiloaure ne gnokro neu ke klignadi. Eghuteuna mare pipichi pohe vegha, nei fahaghe khepi nafnakno teke hohoro ka gol.

⁵ Iara jaola ne filodi nakafli nei nomhidi naogladi fila biꞌo eghu ne mei funudi ka nogna sape nafnakno mae King na. Ke ulugna nogna sape nafnakno mae King na iara ne filodi fitu juta te deudeplu fabrahu, igre fitu tharunga te keli nogna God.

⁶ Eghuteuna ke ulugna nogna sape nafnakno mae King na au glepo jateula nhorora eghu, nu jateula thiro eghu te tangomana iara te filo laoni. Aonu fati glepo te karha ne kegra falithui ka fati philegna nogna sape nafnakno mae King na. Glepo te karha igre au kmana tatha ka thinidire, ke ulu nei ke leghu.

⁷ Glepo te karha ulu lahu na jateula kaisei lion eghu. Fapea na jateula kaisei sua buluka. Fatilo na jateula tatha naikno. Fafati na jateula gaghata biꞌo te flalo teu eghu.

⁸ Fati glepo te karha igre sopa au namno baghi. Glepo te karha igre thinidire iko tongana ka tatha, ke lamna nei ke kosi. Bongi narane na mare theome gnafa te kojeni, “Blahi, blahi, blahi Lord God thofno nolaghi, teke au tifa, nei gognaro gne nei nake pulo mei nathuꞌu nauriha.”

⁹ Glepo te karha igre ne koje ranghini mae ihei te gnokro teu ka nogna sape nafnakno mae King na, mae ihei te karha tifa tifa. Mare ne koje eghu, “Ghehati pala hagheni nanghamu na, fafnakno nigho, nei cheke fakeli nigho! Iagho au nolaghi ke klignadi gobigna lepo te gnafa ka nauthoglu igne!”

¹⁰ Kate kojeni mare khoje igne na, hatimare varadaki fati mae biꞌo ka khiloaure ne pogho soru ke ulugna mae ihei te gnokro teu ka nogna sape nafnakno mae King na. Mare tufru soru ne lilisei nodi khepi nafnaknore ke ulugna nogna sape nafnakno mae King na ne cheke eghu,

¹¹ “Nomi Lord God, iagho neke vuavuhadi gobigna lepo ka nauthoglu igne, eghuteuna tusu lao karha tadi. Naugna igne unha teke magnahaghei eni iagho na. Eghume nabami ghehati te koje te mala pala hagheni nanghamu na nei kilo fnakno nigho nei cheke fakeli nigho eigna nou nolaghi te biꞌo.”