Thakle 22 - Buka Blahi Ka Cheke Holo

¹ Mae engel na ne falalase ka iara u khoꞌu te tusu mei karha na. Kho'u igne siasigla jateula thiro eghu nei fura mei ka nogna sape nafnakno God na nei nogna Lam

² te loloro soru farihotei nabrou biꞌo ka namono na. Gaju te tusu meini u karha ka iheire te ima sisigna na kotu ka phei gerigna khoꞌu na. Gaju igne ure leuleghu nhigra nabotho phei fata ure ke lamnagna kaisei finogha. Eghuteuna khaklagnare, naiknodi namono te gnafa ka nauthoglu gne tangomana te hata mala faghaotadi naikno te fogra re.

³ Eghuteuna gobigna lepo te diꞌare theome tangomana te au ke lamnagna namono biꞌo igne. Nu nogna sape nafnakno God nei nogna Lam eghu nate au ke lamnagna namono biꞌo igne. Eghuteuna nogna naikno gloku God re ginauna pogho soru ka mana.

⁴ Mare ginauna filoni God fabrahu, eghuteuna rioriso nanghagna mana na ka greredire.

⁵ Jare ginauna theome bongi. Tutuani, mare theome magnahaghei juta ba naprai, naugna noda Lord God ginauna tusu ranghidi u naphae. Mare ginauna funei fruni jateula king eghu fabrahu balugna God tifa tifa.

Meigna mae Jisas

⁶ Mae engel na neke cheke eghu ka iara, “Cheke igre tutuani fara, eghume iagho tangomana te fatutuanidi. Lord God mae ihei teke tusu lao nogna cheke na mala rioriso soru hatimare mae profet. Mana jaola neke kuru mei nogna engel na mala falalase ka nogna mae glokure glepo na theome raugha te thakle mei ginauna.”

⁷ Mae Jisas neke cheke eghu, “Iagho fanomho fakeli! Iara ginauna theome raugha ke pulo mei! Iheire te leghudi chekegna God te risodi ke lamnagna buka na igre, mare keli tadi fara.”

⁸ Iara mae Jone, iara neke nomhidi nei filodi neku glepo teke falalase mae engel ka iara igre. Aonu kate nomhidi nei filodi teu te gnafa iara glepo igre, iara neke tuturupuku ke ulugna mana, ne pogho soru ka mana.

⁹ Nu mana ne cheke eghu ka iara, “Ghema, theo, thosei pogho soru ka iara! Pogho soruni God kolho! Naugna iara kaisei mae gloku jateula iagho eghu kolho, nei mae thabusimu hatimare mae profet ra. Iara kaisei mae gloku jateula iheire te gnafa te leghudi u cheke te au ke lamnagna buka igne.”

¹⁰ Mae engel na ne cheke eghu ka iara, “Thosei pophoru chekegna God te au ke lamnagna buka na igre, naugna ginauna glepo igre na theome raugha thakle mei.

¹¹ Eghume naikno te diꞌa puhidi gre, mare ginauna edi fabrahu glepo te diꞌa igre naugna narane te mala tughu nagnafa na la gnafahi. Jaola naikno te chara puhidire, mare ginauna jateula tuana eghu chara fabrahu. Nu naikno te doglo puhidire, mare ginauna au doglo fabrahu, eghuteuna naikno te au blahi puhidire, mare ginauna au blahi fabrahu.”

¹² Mae Jisas ne cheke eghu, “Iagho fanomho fakeli! Iara ginauna theome raugha nake pulo mei! Iara ginauna hata mei balugu taba te mala tabadi nogu naiknore. Tutuani, iara ginauna tabadi leghuni unha teke eni mare na.

¹³ Iara kulu au neke vuavuha nga gobigna lepore nei iara na au fabrahu kate ari te gnafadi gobigna lepore.

¹⁴ “Naiknore te theo nakhibodi naugna Lam na neke thofa dadaragna na neke lehe, mare keli tadi tutuani fara. Naugna mare nabadi te ima sisigna gaju te tusu mei karha fei tifa na, eghuteuna mare naba dila te ruma ke lamnagna grengathagna namono biꞌo na mala au balugna God.

¹⁵ Nu keha naiknore theome nabadi te tei lamna na. Igre naikno te leghudi puhi te chara, nei iheire te au naitu khoraphaꞌu, nei iheire te gnognoro, nei iheire te falehe naikno, nei iheire te pogho soru ka mumuju, nei iheire te lase chaichaghi fara.

¹⁶ “Iara mae Jisas, iara neke kuru ari ka ghotilo nogu engel na mala toutonudi glepo igre ka ghotilo te au ka khiloau are. Iara neke karha mei ka vikegna mae kuꞌeda Devet. Iara jateula nathunu rane te siasigla ia eghu.”

¹⁷ Tharunga te Blahi ghe khetogna Lam na, repa ne cheke eghu, “Mei sagho!” Naikno te gnafa te nomhini cheke igne mala jaola cheke eghu, “Mei sagho!” Iheire te magnahaghei hatani u karha te theo ka gnafagna na, ghotilo mei mala koꞌu kolho ka khoꞌu te tusu mei karha igne.

Cheke leghu lahu eigna buka igne

¹⁸ Iara mae Jone cheke faheta ka ghotilo te nomhidi chekegna God te au ke lamnagna buka igne. Tutuani jame ihei teke lisei lao keha cheke baludi cheke tela auhi ka buka na igre, God ginauna nake lisei lao keha papara ka mana tela kulu chekenihi ka buka igne.

¹⁹ Eghuteuna jame ihei te hata fadelei keha chekegna God te au ke lamnagna buka na igre, God ginauna theome snakreni mana te mala hata fablahi te chekeni ka buka igne. Mae tuana ginauna theome au ka namono blahi na nei mana ginauna na theome tangomana te hata kaisei sisi ka gaju te tusu meini u karha te theo ka gnafagna na.

²⁰ Jisas mae ihei teke chekedi gobigna lepo te au ke lamnagna buka igne na ne cheke eghu, “Uve, tutuani fara. Iara ginauna theome raugha ke pulo mei.” Amen. Lord Jisas, mei!

²¹ Nogna khokofakasai noda Lord Jisas Kraes au balumi ghotilo tifa. Amen.