Thakle 21 - Buka Blahi Ka Cheke Holo

Maloa majaghani nei nauthoglu majaghani

¹ Ke leghu na, iara ne filoni kaisei nauthoglu majaghani balugna kaisei maloa majaghani, nu theo kaisei nhorora te au teu jare na. Eghuteuna nauthoglu balugna maloa teke kulu au ra ne dofidi.

² Eghuteuna iara ne filoni kaisei namono blahi funugna ka God ne soru mei. Namono blahi igne Jerusalem majaghani. Namono igne neke kulu tarabanahi jateula kaisei gaꞌase te mala tolaghi te pipichi famane pohe te tarabana teu te mala tei balugna khetogna na te mala tolaghi ia eghu.

³ Aonu iara ne nomhini kaisei cheke ne jifla mei ka nogna sape nafnakno mae King na, ne eha eghu fabiꞌo, “Filo si ghotilo, gognaro na God au baludi nogna naiknore. Tutuani fara, God thegna ginauna au baludi mala nodi God mare.

⁴ Mana ginauna ghiha koko kholo te gnafa ka tathadire. Jare ginauna theo kaisei naikno tangomana teke lehe na, ba teke diꞌanagnafa na ba teke tanhi na ba teke papara na. Naugna glepo te gnafa tifa re la theohi.”

⁵ Aonu mae ihei te gnokro ka nogna sape nafnakno mae King na ne cheke eghu, “Filo sagho, iara nake hohoro famajaghani thua lepore!” Aonu mana neke cheke eghu ka iara, “Iagho rioriso soru cheke igre, naugna cheke igre thofno tutuani fara eghuteuna iagho tangomana te fatutuanidire.”

⁶ Mana ne cheke eghu ka iara, “Uve, gognaro na iara funei frunidi gobigna lepore naugna iara ne tapla sorudi nogu naoka re. Iara kulu au neke vuavuha nga gobigna lepo igre nei iara na au fabrahu kate ari te gnafadi gobigna lepore. Jame ihei te magnahaghei karha te tifa na, iara ginauna snakreni mana mala koꞌu kolho ka glokha khoꞌu te tusu mei karha na.

⁷ Tutuani, iheire te leghu ghau fabrahu te ghilei lehe na, iara ginauna tusu ranghini karha te theo ka gnafagna. Eghume iara ginauna nogna God mana, eghuteuna mana thugu iara.

⁸ Nu naikno te diꞌa te gnafare ginauna tei au ka kholo khaꞌaghi. Tutuani, iheire te tirodi leghu ghau iara igre, naugna mare ne mhaghuni u glehe, nei iheire te theome fatutuani, nei iheire te edi puhi te diꞌa, nei iheire te falehe naikno, nei iheire te gnognoro, nei iheire te au khoraphaꞌu, nei iheire te pogho soru ka mumuju, nei iheire te chaichaghi fara teu igre, ginauna thokedi kholo biꞌo te dudulu ka khaꞌaghi te ngire ka thina ngaja na. Kholo khaꞌaghi igne jaola kiloni fapea glehe na.”

Jerusalem majaghani

⁹ Aonu kaisei engel ne mei ka iara. Igne kaisei mae ka fitu engel teke hata fitu dis te fodu ka fitu papara leghu lahu ra. Mana ne cheke eghu ka iara, “Mei sagho mala falalase nigho iara gaꞌase khetogna Lam na.”

¹⁰ Nogna nolaghi Tharunga te Blahi na mei ka iara, eghuteuna engel na batu ghau iara ne haghe ka kaisei thogele biꞌo te tei fara kligna. Mana ne falalase ka iara namono blahi, Jerusalem, funugna ka God ne soru mei.

¹¹ Eghuteuna siasigla gna nogna nolaghi God na ne siasigla lao ka namono na. Siasigla fara jateula kaisei famane thina jaspa te klino fara jateula thiro eghu.

¹² Namono biꞌo igne au kaisei gringni thina biꞌo te haghe fara kligna. Eghuteuna, gringni thina igne au nabotho phei grengatha, eghuteuna nabotho phei engel te kegra te mala riereghidi nabotho phei grengatha igre. Eghuteuna nanghadi nabotho phei vikegna Israel re rioriso ka grengatha igre.

¹³ Ke maghati thilo grengatha, ke mata thilo grengatha, ke raru thilo grengatha, ke mosu thilo grengatha.

¹⁴ Gringnigna namono igne mare babana ke klignadi nabotho phei thina. Ke klignadi thina igre mare rioriso nanghadi nabotho phei nogna khuru mae Lam.

¹⁵ Engel te cheke mei ka iara igne au kaisei gaju brahu te horo ka gol mala fafaja namono biꞌo igne balugna gringni thina na, nei nabotho phei grengatha re eghu.

¹⁶ Namono biꞌo igne au fati sulukhugna, eghuteuna krepagna na nanaba ngala ka brahugna na. Aonu engel na ne fafaja namono biꞌo igne ne thokeni phei thogha fati gobi kilomita. Brahugna na nei krepagna na nei haghegna na eghu ne kaisei nanaba ngala.

¹⁷ Engel na jaola ne fafaja gringni thinagna namono biꞌo na. Haghegna na thokeni tolufulu namno khangafa. Engel na ne fafaja leghuni unha te eni koba naikno na.

¹⁸ Gringni thina igne mare neke horo ka famane thina jaspa, eghuteuna namono na mare horo ka gol ne siasigla jateula thiro neu.

¹⁹ Eghuteuna thina te babana mare gringni thina igne thofno keli fara filogna na, naugna ne au famane thina tagna. Thina ulu lahu na jaspa, fapea na safae, fatilo na aghit, fafati na emaral.

²⁰ Falima na onikis, fafamno na konilian, fafitu na kuots, fahana na beril, faheva na tapas, fabotho na kalsedoni, fabotho kaisei na tokuoes, fabotho pea na amitis.

²¹ Eghuteuna nabotho phei grengatha biꞌo igre mare horo ka nabotho phei buli. Kaisei grengatha na horo ka kaisei buli biꞌo. Eghuteuna nabrou biꞌo ke lamnagna namono biꞌo na mare horo ka gol te klino fara jateula thiro neu.

²² Iara theome filoni kaisei Sugablahi ke lamnagna namono biꞌo na. Naugna noda Lord God mae ihei te nolaghi na phiamare Lam au fabrahu baludi naiknore, eghuteuna naikno te gnafare pogho sorudi phiamare heva heva ke lamnagna namono tuana.

²³ Naprai ba glaba theome phae soru ke kligna gna namono biꞌo tuana, naugna nogna nolaghi biꞌo God na siasigla mei fabrahu tagna. Eghuteuna Lam na u naphaegna namono tuana.

^24-26 Eghuteuna naiknodi namono te gnafa ka nauthoglu gne ginauna nonolo ka naphae te siasigla mei ka namono biꞌo igne. Eghuteuna hatimare mae king gna nauthoglu igne nei naiknodi namono te gnafare, ginauna hata mei nodi dedeire ke lamnagna namono igne mala tusu ranghini God. Naugna dedei igre thofno nogna God. Keha na, grengatha ka namono te gnafa ka nauthoglu igne bibilakhi koba kate plulugna naprai na. Nu ka namono igne grengatha ka gringni na ginauna theome tangomana te bibilakhi na. Naugna jare na theome bongi.

²⁷ Nu glepo te thona ba naikno te edi unha te diꞌa ba te chaichaghi koba teu igre theome nabadi te mei ke lamnagna namono biꞌo igne. Nu naikno te rioriso nanghadire ka nogna buka Lam na igre ngala nate au fabrahu tifa tifa ke lamnagna namono biꞌo igne.