Thakle 20 - Buka Blahi Ka Cheke Holo

Kaisei thogha finogha

¹ Iara ne filoni kaisei engel ne soru funu kligna. Mana louloku ki grengathagna glave te mamhara fara na. Mana jaola louloku kaisei chen biꞌo.

^2-3 Aonu, mae engel na ne hata pholi biꞌo na ne haru ka chen biꞌo. Pholi igne, pholi gna tifa, te kiloni tahati mae Satan ba mae funeidi naitu te gnafare. Engel na ne koko soru pholi biꞌo na lamna glave te mamhara fara na ne bibilakhi famaku grengathagna glave na. Pholi biꞌo igne ginauna au fabrahu lamna glave balu chen ghilei thokeni kaisei thogha finogha. Ke lamnadi narane igre mana ginauna theome tangomana te chaichaghidi naikno te gnafa ka nauthoglu igne te mala eni puhi te diꞌa na. Nu ke leghugna te gnafa kaisei thogha finogha na, God ginauna nake snakre fajiflani pholi biꞌo igne katha vido kmoꞌei kolho.

⁴ Iara ne filodi keha nodi sape nafnakno mae king. Tharungadi naikno teke kusu mare pha'udire tifa ra gnokro neu jare. Nogna naoka God re neke falehedi mare naugna mare neke fatutuani ni fabrahu chekegna God na nei toutonuni eigna u cheke tuana. Mae igre neke theome pogho soru ka bosu ba ka mumuju gna na. Eghuteuna mare jaola neke theome hata nogna fagaglana bosu na ka greredire ba ka khamedire. Nu mare neke karha fapulo mala funei fruni balugna Kraes kaisei thogha finogha.

⁵ Igne narane ulu lahu teke fakarha fapulodi God naikno teke lehehira. Keha naikno teke lehere God na theome fakarha fapulodi ka narane tuana, nu mare na ofou ghilei thokeni kaisei thogha finogha.

⁶ Naikno teke kulu fakarha fapulodi God kau glehe igre mare keli tadi fara, naugna mare ginauna na theome papara kate kafe papara naikno te diꞌare kau khaꞌaghi te theo ka gnafagna. Mare nogna naikno blahi God. Mare ginauna jaola mala nogna mae pris God nei nogna Kraes, eghuteuna mare ginauna funei fruni balugna Kraes kaisei thogha finogha.

Magra leghu lahu

⁷ Kate sala'u kaisei thogha finogha igre, mare ginauna nake snakre fajiflani mae Satan ka sosolo.

⁸ Mana ginauna jifla mala ke chaichaghidi naiknore ka namono te gnafa ka nauthoglu igne. Mare kilodi namono igre Gog ghe Magog. Mae Satan ginauna salo fodu naiknodi namono te gnafa igre mala magra ka nogna naikno God re. Naikno te phile ka mae Satan gre ginauna kmana fara jateula nusu ka glilihi na are eghu.

⁹ Aonu mare ginauna tei heva heva ka namono te gnafa ka nauthoglu igne, eghuteuna mare ginauna kegra faligohodi namono aheva te au nogna naikno God re. Tuana namono biꞌo te namhani fara God na. Neuba, khaꞌaghi na ginau soru mei funu kligna mala nako fahuidi nogna naoka God re.

¹⁰ Aonu mare ginauna koko laoni mae Satan ka kholo khaꞌaghi te ngire ka thina te ngaja fara. Satan, mae ihei te chaichaghidi naiknore, ginauna au baludi bosu ghe mae profet chaichaghi. Thilomare na au jare mala papara bongi narane tifa tifa.

God ginauna fatedi naikno te gnafa ka nauthoglu gne

¹¹ Aonu iara ne filoni kaisei nogna sape nafnakno biꞌo mae King te vegha fara na, eghuteuna iara jaola filoni mae te gnokro teu tagna na. Eghuteuna nauthoglu ghe maloa re ne rikha kokoni mana ne dofidi.

¹² Eghuteuna iara ne filodi naikno te gnafa teke lehe ra, mae teke fnakno ba mae teke theome fnakno tifa ra, mare kegra ke ulugna nogna sape nafnakno mae King na. Eghuteuna mare ne tothora bukare mala toutonudi unha teke edi teke mei naikno te gnafare ka nakarhadire. Aonu mare jaola ne tothora nogna buka God na. Mana neke rioriso soru nanghadi naikno te mala karha fabrahu tifa tifa ka buka igne. Mana ne kafe fatedi naiknore leghudi unha teke edi mare re.

¹³ Glehe ghe namono Hades ne snakre haghedi naikno te gnafa teke lehe te au ke lamnadire, eghuteuna nhorora na jaola ne snakre haghedi naikno te gnafa te au ke lamnagna. Mana ne fatedi naikno igre leghuni unha teke edi teke mei mare ka nakarhadire.

¹⁴ Aonu mana ne koko laodi glehe ghe namono Hades ke lamnagna kholo te deudeplu khaꞌaghi na. Kholo te deudeplu ka khaꞌaghi igne u fapea glehe na.

¹⁵ Eghuteuna ihei te theome rioriso soru nanghagna na ke lamnagna nogna buka God na, mala koko lao ke lamnagna kholo te deudeplu ka khaꞌaghi na.