Thakle 2 - Buka Blahi Ka Cheke Holo

Letas ranghini khiloau Efesus

¹ Mae igne ne cheke eghu ka iara, “Iagho rioriso kaisei letas ranghini engel gna khiloau Efesus, eghuteuna iagho cheke eghu ka mana: Igne nogu cheke iara mae te louloku fitu nathunu fei nhetagu, nei nonolo farihoteidi fitu juta teke hohoro ka gol gre teuna.

² Iara lase ghamihi ghotilo thofno loku heta fara ranghi ghau iara nei au heta ka nomi fatutuani na eghu kolho. Iara jaola lase ghami ghotilo te theome magnahaghedi naikno te leghudi puhi te diꞌare. Eghuteuna iara lase ghami ghotilo te lasedihi iheire te chaichaghi te kilodi thedi mae khuru, nei ghotilo la glanidihi te chaichaghi kolho mare re.

³ Iara jaola lase ghami ghotilo te thofno kegra heta na, nei theome ke blela, neuba naiknore ne para ghami naugna ghotilo ne leghu ghau iara.

⁴ Nu kaisei glepo ngala te theome magnahagheni iara ka ghotilo na. Ghotilo la kokohi puhi te keli teke namha ghau iara tifa ia.

⁵ Iara tore ghami mala ke ghatho fapuloni aheva te ari te jafrani ghotilo na. Tughu nagnafa nei ke pulo ka iara eghu mala tangomana ghotilo te namha ghau iara na, jateula teke eni ghotilo tifa ia eghu. Jame te theome tughu ghotilo na, iara ginauna ari hata fadelei nomi juta ghotilo na.

⁶ Nu kaisei glepo te gleale'ani iara ka ghotilo na, ghotilo theome magnahagheni puhidi naikno te leghuni nogna farirhiu mae te diꞌa Nikolas gne. Iara jaola theome magnahaghedi puhidi naikno tuare.

⁷ Ihei te magnahaghei te lase fakelini unha te chekeni iara na, mana fanomho fakeli ka unha te chekedi mae Tharunga te Blahi na ka khiloau igre. Iheire te leghu ghau fabrahu te ghilei lehe na, iara ginauna snakredi mala ghamu sisigna gaju te tusu mei karha te kotu kau nagare te khuakhuda te au tagna God na.”

Letas ranghini khiloau Smana

⁸ Mae igne ne cheke eghu ka iara, “Iagho rioriso kaisei letas ranghini engel gna khiloau Smana, eghuteuna iagho cheke eghu ka mana: Igne nogu cheke iara mae ihei te kulu au neke vuavuha nga gobigna lepore nei au fabrahu kate ari te gnafadi gobigna lepore. Tutuani, tifa na iara neke lehehi, nu gognaro na iara kela karha fapulo.

⁹ Iara lase ghami ghotilo te au ka puhi biꞌo nei ghotilo kuma fara. Nu ghotilo jaola dedei fara, naugna God ne togho ghami ghotilo mala leghuni thegna! Eghuteuna iara jaola laseni nodi cheke naikno te cheke fadiꞌa ghami ghotilo re. Mare te chekeni na mare mae Jiu mala leghuni God fabrahu eghu, nu mare theome thofno mae Jiu tutuani eghu. Mare au ka tothoghei te kilo fnaknoni Satan.

¹⁰ Ghotilo thosei mhaghuni kaisei glepo neubane para ghami mare. Filo si ghotilo! Satan ginauna fariuriu ghami ghotilo mala laseni te thofno leghuni mana kate lilisei ka suga sosolo keha naikno ka tothoghei ghotilo gne. Eghuteuna ghotilo ginauna au papara jare nabagna nabotho narane. Nu ghotilo mala fatutuani ghau iara ngala, neuba mare falelehe ghami ghotilo. Eghuteuna naugna te eni iagho igne, iara ginauna tusu ari nakarha te theo huigna na ka ghotilo, jateula mare te tusu lao taba biꞌo ka mae ihei te uluni fangenghele ia eghu.

¹¹ Ihei te magnahaghei te lase fakelini unha te chekeni iara na, mana fanomho fakeli ka unha te chekedi mae Tharunga te Blahi na ka khiloau igre. Iheire te leghu ghau iara fabrahu te ghilei lehe na, mare ginauna na theome au papara kate kafe au papara naikno te diꞌare kau khaꞌaghi te theo ka huigna.”

Letas ranghini khiloau Pegamum

¹² Mae igne ne cheke eghu ka iara, “Iagho rioriso tei kaisei letas ranghini engel gna khiloau Pegamum, eghuteuna iagho cheke eghu ka mana: Igne nogu cheke iara mae ihei te au naflahi te fnonu piepile na.

¹³ Iara lase ghami ghotilo te au ka vido aheva te funei fruninihi mae Satan. Neuba ngau, ghotilo leghu ghau iara fabrahu. Tutuani fara, iara keli tagu fara ka ghotilo, naugna ghotilo theome khoko nomi fatutuani na ka iara, neuba mare ne faleheni mae Antipas jare. Kani karha teku mana na, mana neke theome gnafa te toutonu eigu iara na.

¹⁴ Nu kaisei glepo langau te theome magnahagheni iara ka ghotilo na. Keha naikno ka ghotilo re leghuni nogna farirhiu mae Belam. Tifa na mana neke farirhiuni mae King Balak mala chaichaghidi naiknodi Israel re, naugna mana magnahaghedi naiknore te tapla jafra ka nakhibo. Mana farirhiudi mala ghamu gano teke fafara ka mumuju na, eghuteuna batudi kau puhi gnognoro.

¹⁵ Keha ka ghotilo jaola neke leghuni nogna farirhiu mae te diꞌa Nikolas na.

¹⁶ Eghume, ghotilo koko puhimi te diꞌare. Nu jame te eni fabrahu ghotilo nakhibo na, iara ginauna theome raugha ari ka ghotilo mala magridi naiknore ka naflahi te fnonu piepile te jifla mei ka foflogu iara na.

¹⁷ Ihei te magnahaghei te lase fakelini unha te chekeni iara na, mana fanomho fakeli ka unha te chekedi mae Tharunga te Blahi na ka khiloau igre. Iheire te leghuni fabrahu mae Kraes te ghilei lehe na, iara ginauna tusu ranghini mana u gano te kiloni ‘manna’ mala ghamu. Naiknore neke pophoru ‘manna’ igne tifa na. Eghuteuna iara ginauna jaola tusu ranghini kaisei thina vegha te rioriso kaisei nangha majaghani tagna. Nangha majaghani igne, theo kaisei naikno te laseni, nu mae ihei te hatini thina igne ngala te laseni u nangha igne na.”

Letas ranghini khiloau Taetira

¹⁸ Mae igne neke cheke eghu ka iara, “Iagho rioriso tei kaisei letas ranghini engel gna khiloau Taetira, eghuteuna iagho cheke eghu ka mana: Igne nogu cheke iara mae Thugna God na. Tathagu iara re jateula khaꞌaghi te ngaja ia eghu, eghuteuna ghahegu iara re siasigla jateula bras eghu.

¹⁹ Iara lase ghamihi ghotilo te namhadi naiknore nei fatutuani ghau la iara. Eghuteuna iara jaola laseni te fari totoghoi ghotilo fari themi na, nei kegra heta fabrahu ka nomi fatutuani na, neuba mare ne para ghami. Famane gloku te edi ghotilo gognaro gre thofno uludi fara gloku teke edi teke mei ghotilo tifa ra.

²⁰ Nu kaisei glepo ngala te theome magnahagheni iara ka ghotilo na. Eigna ghotilo ne snakreni Jesebel ne eni unha te magnahagheni naꞌa na. Jesebel gne kaisei gaꞌase gnognoro fara nu naꞌa chaichaghi ne cheke eghu, ‘Iara kaisei nogna profet God.’ Tutuani, Jesebel gne ne korho fadeleidi nogu naikno iara re mala leghuni nogna farirhiu thegna te jafra fara na. Naꞌa baubatudi naiknore mala gnognoro nei ghamu gano teke fafara ka mumujure eghu.

²¹ Iara neke lilisei ranghini naꞌa narane mala tughu nagnafa na, nu naꞌa ne tirogna kolho.

²² Naugna igne, iara ginauna parani fara naꞌa eghuteuna naikno teke gnognoro balugna naꞌa re ginauna jaola au papara fara. Iara ginauna eni igne gognaro na jame te theome figri mare ka najafra teke edi balugna naꞌa re.

²³ Iara ginauna jaola falehedi iheire te leghuni naꞌa re. Aonu khiloau te gnafare ginauna lase ghau iara te tangomana te filo glanidi unha te au ke lamnagna nagnafadi naikno te gnafare. Eghuteuna iara ginauna jaola foli fapulo ghami ghotilo hui leghuni ngala unha teke eni ghotilo na, te keli ba te diꞌa.

²⁴ Iara theome tusu ranghi ghami kaisei glepo te ninhigrana te mala leghuni ghotilo na. Nu iara magnahaghei te chekeni ka ghotilo khiloau te gnafa ka namono Taetira te theome leghuni farirhiu te diꞌa na, nei tiromi te magnahaghei laseni puhi te kiloni mare, ‘Nogna thofno cheke poru mae Satan.

²⁵ Uve, te chekeni iara ka ghotilo na, loku famaku ka puhi te keli te au ka ghotilo are ghilei thokeni narane nate ke pulo mei iara na.’

²⁶ Iheire te leghu ghau fabrahu te ghilei lehe, nei edi nogu gloku iara re teu te ghilei hui nauthoglu igne na, iara ginauna tusu ranghidi nolaghi te mala funei frunidi namono te gnafa te au ka nauthoglu igne.

²⁷ Mare ginauna heta fara kate funei frunidi naiknore, nei mare ginauna thofno roꞌe sorudi nogna naoka God re jateula tahati tangomana te rurhuja kapura eghu kolho.

²⁸ Naugna nolaghi teke tusu mei mae Mama ka iara igne, iara jaola nake tusu lao ka mare. Eghuteuna iara ginauna jaola tusu lao ka mare u Nathunu Rane igne.

²⁹ Ihei te magnahaghei te lase fakelini unha te chekeni iara na, mana fanomho fakeli ka unha te chekedi mae Tharunga te Blahi na ka khiloau igre.”