Thakle 19 - Buka Blahi Ka Cheke Holo

Naiknodi klignare ne koje gleale'a

¹ Ke leghudi glepo igre, iara ne nomhidi kmana naikno te au klignare ne eha eghu fabiꞌo, “Tahati cheke fakelini God! Noda God mae ihei teke fakarhi ghita, nanghagna na fnakno fara, nei mana au nolaghi biꞌo!

² Tahati cheke fakelini God! Naugna puhigna te mala fatedi naiknore tutuani nei doglo fara. Mana neke fatenihi namono biꞌo Babilon igne, ihei te goigonidi gaoghathodi naiknogna nauthoglu igne balu puhigna te gnognoro igne. God neke parani gaꞌase igne eigna naꞌa neke falehedi nogna mae gloku God re.”

³ Mare ne eha fabiꞌo ne cheke eghu, “Tahati cheke fakelini God! Naugna khujogna khaꞌaghi te nhako teu namono biꞌo na ne haghe fabrahu theome tangomana te gnafa na.”

⁴ Aonu varadaki fati mae biꞌo ka khiloaure baludi fati glepo te karha igre, mare turupuku ne pogho soru ka God mae ihei te gnokro teu ka nogna sape nafnakno na. Eghuteuna mare ne cheke eghu, “Amen! Tahati cheke fakelini God!”

Nogna gaghamu tholaghi mae Lam

⁵ Iara ne nomhini kaisei cheke ne mei funugna ka nogna sape nafnakno mae King na, ne cheke eghu, “Ghotilo cheke fakelini noda God, ghotilo te gnafa te au nolaghi ba te theo nolaghi, iheire te loku ranghini mana nei ghatho tahuni mana teuna.”

⁶ Aonu iara ne nomhidi kmana naikno fara ne eha eghu fabiꞌo. U naogla igne jateula oa'onghadi galo biꞌo ka thongna, nei jateula fila biꞌo neu ne cheke eghu, “Tahati cheke fakelini God! Noda Lord God mae ihei te au nolaghi te gnafa, iagho ngala mae King na ke uludi naikno te gnafare.

⁷ Tahati keli tada nei gleale'a fara eghu, nei tahati pala hagheni nanghagna na. Naugna narane mala gaghamu tholaghi gna Lam na, nei khupi na la tarabanahi mare te mala tolaghi na.

⁸ Mare la tusu laohi ka khupi na pohe keli mala pipichi naꞌa, te vegha nei siasigla fara teuna.” Gaoghathogna pohe te keli igne, glepo te doglo teke edi nogna naikno God re.

⁹ Mae engel na ne cheke eghu ka iara, “Rioriso soru sagho cheke igre, ‘Naikno teke kilodi God te mala mei ka gaghamu tholaghi gna Lam na, mare tangomana te gleale'a na.’ ” Eghuteuna engel na neke cheke eghu ka iara, “Cheke igne thofno chekegna God.”

¹⁰ Iara ne tuturupuku soru ke ulugna engel na mala pogho soru ka mana, nu mana ne cheke eghu ka iara, “Thosei pogho soru ka iara! Iagho pogho soruni God kolho! Naugna iara kaisei nogna mae gloku God kolho jateula iagho nei hatimare mae thabusida ka khiloau gne teke fatutuanidi thofno cheke teke toutonudi mae Jisas ra.” Mana ne chekeni igne naugna thofno cheke teke toutonudi mae Jisas igre ngala teke thofno toutonudi la hatimare mae profet ra.

Mae te gnokro ke kligna hose vegha

¹¹ Aonu iara ne filoni maloa na ne thora, eghuteuna iara ne filoni kaisei hose vegha. Mae te saghe ka hose na nanghagna na, “Mae ihei te eni fakeli nogna gloku na, nei nogna cheke na doglo fabrahu.” Kate fatedi naiknore nei kate tei ka magra teuna, puhigna mana na jaola doglo fara kolho.

¹² Tathagnare siasigla jateula khaꞌaghi eghu, eghuteuna mana au kmana khepi nafnakno ka pha'ugna na. Kaisei nangha na mare rioriso ka greregna mana na, nu theo kaisei naikno te laseni na eghu, thegna mana ngala te laseni na nangha tuana.

¹³ Eghuteuna pohe te pipichi mana na bothu ka dadaradi nogna naoka teke tapla sorudi kau magra na. Mare kiloni mae igne nanghagna na, “Chekegna God.”

¹⁴ Hatimare mae soldia di klignare mare saghe ka hose vegha na tei ke leghugna mana, eghuteuna mare ne pipichi famane pohe te vegha nei siasigla fara eghu.

¹⁵ Mae igne au kaisei naflahi te fnonu fara te jifla mei ka foflogna na te mala tapla sorudi namono te gnafare. Eghuteuna mana ginauna heta fara kate funei frunidi naiknore. Tutuani mana ginauna fate falehedi nogna naokare te mala thokedi mare diꞌatagna God te biꞌo te au nolaghi na.

¹⁶ Ka nogna pohe nei boebokegna teure mare rioriso nangha igne, “Mae King te funei frunidi King te gnafa nei Lord te funei frunidi Lord te gnafa.”

¹⁷ Ke leghu na iara ne filoni kaisei engel kegra neu ke kligna naprai. Mana ne eha eghu fabiꞌo ka nanghaji te flalo tafri teu ka maloa re, “Khapru mei ka nogna gaghamu biꞌo God igne!

¹⁸ Khapru mei mala ghamu nafnahidi hatimare mae king nei hatimare mae funeidi armi nei mae biꞌo ka nauthoglu nei nafnahidi hose nei nafnahidi mae iheire te saghe teu ke klignadi. Uve, ghotilo mei mala ghamu nafnahidi naikno te gnafare, mae sneka nei mae te snagla, nei mae te au nolaghi nei mae te theo nolaghi.”

¹⁹ Aonu iara ne filoni bosu ulu lahu na baludi hatimare mae king gna nauthoglu igne nei hatimare mae soldia ne salofodu kaisei vido mala magra. Mare tarabana mala magra ka mae ihei te saghe ka hose vegha na, baludi hatimare nogna mae soldiare.

²⁰ Nu kate magra na, mae ihei te saghe ka hose vegha na igne ne hata bosu na, balugna mae profet chaichaghi na. Mae profet chaichaghi igne mana neke eꞌei kofubobhoi ke ulugna bosu na tifa. Eghuteuna ka puhi igne mana chaichaghidi fara naiknore teke hata mare fagaglana gna bosu na nei pogho soru ka mumuju gna na. Aonu mae profet chaichaghi ghe bosu gre karha neu ne koko lao mare ka kholo khaꞌaghi te ngire ka thina te ngaja na.

²¹ Eghuteuna mae te saghe ka hose na igne ne falehedi hatimare mae soldiare ka naflahi te jifla mei ka foflogna na. Eghuteuna nanghajire ne soru ka thinidire ne ghamu ne boho.