Thakle 18 - Buka Blahi Ka Cheke Holo

God ne goigoni ni namono Babilon

¹ Ke leghudi glepo igre, iara ne filoni keha engel na ne soru mei funu kligna. Engel igne au nolaghi biꞌo, eghuteuna siasigla gna nogna nolaghi mana na ne siasigla faligohoni mana, ne tei thoke ka namono te gnafa ka nauthoglu igne.

² Mana ne eha eghu fabiꞌo, “Namono biꞌo Babilon te nafnakno fara ia, la groꞌehi! La diꞌahi! La sugadihi naitu te gnafa nei namonodihi nanghaji te diꞌa te gnafa!

³ Puhidi naiknogna namono Babilon te gnognoro fara igre la khasidihi naiknodi namono te gnafare la theome doglo langau. Tutuani, naiknogna nauthoglu igne ne fodu ka nakhibo naugna mare ne leghuni fabrahu puhigna naꞌa te diꞌare. Eghuteuna hatimare mae king gna nauthoglu igne la enihi puhi te diꞌa na balugna naꞌa, nei iheire te foifoli ka nauthoglu igne mare la thono dedei fara naugna mare foifoli nei sabiri neu baludi naiknodi namono gna Babilon.”

⁴ Aonu iara ne nomhini keha cheke na ne cheke eghu mei funu kligna, “Ghotilo nogu naikno iara ra, jifla Babilon! Naugna iara theome magnahaghei ghami ghotilo te gnognoro jateula te edi naikno igre eghu. Iara theome magnahaghei te para ghami ghotilo jateula naꞌa eghu.

⁵ Naugna nakhibognare pagu fara ghilei posa kligna. Eghume, God na theome tangomana te ghatho ihodi unha najafra teke edi naꞌa re eghu.

⁶ Ghotilo mala ke foli fapulo unha teke edi naꞌa ranghi ghami re, nu ghotilo mala foli fapulo phei fata ke tulaodi glepo te diꞌa teke edihi naꞌa ka ghotilo ra.

⁷ Ghotilo parani naꞌa nanaba ka puhigna naꞌa te fafnaknoni kolho thegna nei gleale'a kate snori nogna ka gobigna lepo te magnahaghedi naꞌa re. Uve, iagho tangomana te mala fakabruni naꞌa, naugna naꞌa ne cheke eghu koba, ‘Iara gne au jateula nakrupe biꞌo eghu. Iara theome jateula thau glehe kokoi eghu mala au diꞌanagnafa nei tanhi eghu.’

⁸ Naugna igne kmana papara biꞌo ginauna thokeni naꞌa ke lamnagna kaisei narane kolho. Tutuani ginauna fograre nei glehe rofo na mei, eghuteuna naꞌa ginauna tanhi fabiꞌo eigna te kabru ghegna na. Eghuteuna naꞌa ginauna nhako ka khaꞌaghi. Naugna Lord God mae ihei te fateni namono igne thono nafnakno fara.”

⁹ Kmana mae king neke eni puhi te diꞌa balugna naꞌa nei neke gleale'a fara te hata gobigna lepo te keli fara ka naꞌa. Tutuani mare ginauna tanhi fara nei diꞌanagnafa fara eghu, kate filoni khujogna khaꞌaghi te nhako namono igne.

¹⁰ Mare ginauna kegra delei kolho, naugna mare mhaghuni fara papara te thokeni namono igne. Eghuteuna mare ginauna cheke eghu, “Icho idomi, puhi biꞌo na mei ka ghotilo naikno te au Babilon! Ghotilo te au ka namono biꞌo te nolaghi nei dedei fara, nu ka katha vido kolho te thoke ghami ghotilo papara na.”

¹¹ Eghuteuna hatimare mae te foifoli ka nauthoglu igne mare ginauna jaola tanhi nei diꞌanagnafa fara eghu. Naugna gognaro theo kaisei naikno nate folidi nodi glualuja mare re.

¹² Tifa na mare foifoli gol, silva, famane thina, buli, famane pohe te vegha, te pipito, nei te ukru. Pohe igre biꞌo fara silenidire. Mare foifoli thua nafnata gaju te famane fara nei thua nafnata glepo teke hohoro ka khe'i elefant nei teke hohoro ka nafnata gaju te ulu fara. Mare fofoli bras, aean, nei famane thina mabol.

¹³ Mare jaola foifoli keha nafnata glepo te sisiri nonghari nei insens nei waen nei oel nei flaoa nei wit nei buluka nei sipu nei hose nei chariot nei naikno sneka. Nu gognaro naikno te foifoli glepo igre theome tangomanadi.

¹⁴ Mare na cheke eghu ginauna, “Ghotilo naikno te au Babilon, kokhoni ghami fara! Glepo keli te magnahaghedi fara ghotilo ra la tei koko ghami. Glepo teke dedei fara ghotilo tadira nei keli tamidi teku ra, la dofidihi ka ghotilo. Eghuteuna ghotilo ginauna nake theome filodihi glepo igre.”

^15-16 Mae te dedei fara kate foifoli mare glualuja igre ka namono tuana na, mare ginauna mhaghu nodini fara u papara te thokeni namono tuana. Mare ginauna kegrau delei balu tanhi nei diꞌanagnafa eghu na cheke eghu, “Icho idomi, ghotilo te au ka namono biꞌo, puhi biꞌo na mei ka ghotilo! Tifa na ghotilo neke pipichi famane pohe te vegha nei te pipito nei te ukru. Ghotilo neke fahaehaghe ghami fara ka glepo te keli ka gol nei ka famane thina nei ka famane buli.

¹⁷ Nu nomi thua glepo te keli ghotilo igre na ghosei dofidi ke lamnagna ka katha vido kolho.” Eghuteuna hatimare mae kapten baludi mae pasenja nei hatimare mae boskru nei keha mae te loku ka vaka, mare ginauna jaola kegra filou kolho delei.

¹⁸ Eghuteuna kate filoni mare khujogna khaꞌaghi te nhako teu namono na, mare ginauna eha eghu, “Icho idomi, theo kaisei namono biꞌo te nanaba ka namono biꞌo igne na!”

¹⁹ Aonu mare na ghiha keha glose ka pha'udire naugna mare ne diꞌanagnafadi fara na cheke eghu balu tanhi, “Icho idomi, ghotilo te au namono biꞌo, puhi biꞌo na mei ka ghotilo! Naikno te gnafa te tei tafri ka thongna ka nodi vakare, mare dedei nodi fara naugna mare neke fofoli ka ghotilo kmana glepo te keli. Nu namono biꞌo na thono diꞌa fara ke lamnagna ka katha vido kolho.”

²⁰ Eghuteuna engel ne cheke eghu, “Gleale'a ka ghotilo te au kligna baludi nogna naikno God ra! Gleale'a ka ghotilo hatimare mae khuru nei hatimare mae profet! Naugna God neke fateni namono igne eidi puhi te diꞌa teke edi naꞌa ka ghotilo ra.”

²¹ Aonu kaisei engel te nolaghi na ne hata kaisei thina biꞌo ne koko soru ka thongna na ne cheke eghu, “Babilon, iagho namono biꞌo. Ka puhi jateula igne eghu kolho, mare ginauna koko soru nigho mala luvu fabrahu kolho iagho.

²² Tutuani, ginauna theo kaisei naikno nate lalahu gita nei koje nei ifu nei kufli teu ke lamnagna nou namono iagho na. Ginauna theo kaisei naikno nate loku ke lamnamu iagho na, eghuteuna ginauna theo kaisei naikno te eni flaoa ka bret na.

²³ Ginauna jaola theo kaisei juta nate phae na, eghuteuna ginauna theo kaisei naikno nate tangomana te jaola te tolaghi ke lamnamu iagho na. Tifa na, nou mae mala foifoli iagho re neke mae biꞌo fara ka nauthoglu igne. Eghuteuna iagho neke chaichaghidi naiknodi namono te gnafare te mala leghudi kolho nou cheke themure nei mala ghatho ihoni God.”

²⁴ Papara igne thokeni Babilon naugna naiknogna namono tuana neke falehedi hatimare mae profet nei keha nogna naikno God teke au ka namono tuana. Tutuani, mare neke falehedi naikno te gnafa ka nauthoglu igne.