Thakle 16 - Buka Blahi Ka Cheke Holo

Leghu lahudi fitu papara nogna God

¹ Aonu iara ne nomhini kaisei cheke ne jifla mei ka Sugablahi na, ne eha eghu fabiꞌo ka fitu engel re, “Tei totofa fitu dis te fodu ka diꞌatagna God are ke kligna nauthoglu.”

² Mae engel ulu lahu na jifla ne tei totofa nogna dis na ke kligna nauthoglu. Eghuteuna thubu te diꞌa fara na ne thokedi naikno te au nogna fagaglana bosu na nei iheire te pogho soru ka mumuju gna bosu na.

³ Fapea engel na ne tei ne totofa nogna dis na ke kligna nhorora. Eghuteuna nhorora na ne vuhai dadara, jateula phuki dadaragna naikno te lehe neu. Gobigna lepo teke karha ke lamna nhorora re ne kafe lehe.

⁴ Aonu fatilo engel na ne tei ne totofa nogna dis na ke kligna khoꞌu ba glokha. Eghuteuna khoꞌu nei glokha teure jaola ne kafe dadara.

⁵ Iara ne nomhini engel te reireghidi kho'ure ne cheke eghu, “God, iagho blahi fara. Iagho au fabrahu funu tifa nei jaola au gognaro. Naiknore lasenihi iagho doglo fara naugna iagho ne kuru meidi papara biꞌo igre.

⁶ Mae teke falehedi nou mae profet ra nei nou naikno blahi ra, iagho gognaro ke figri khoꞌu ana nei glokha ana eghu ka dadara mala koꞌu mare. Tuana ngala puhi te doglo te mala ke foli fapulo iagho nabadi unha teke edi mare re.”

⁷ Aonu, iara ne nomhini kaisei cheke ne jifla mei funu ka olta na, ne cheke eghu, “Uve, tuana tutuani fara! Nomi Lord God te nolaghi fara, puhimu iagho te mala fatedi naiknore tutuani nei doglo eghu!”

⁸ Fafati engel na ne tei ne totofa nogna dis na ke kligna naprai. Eghuteuna God ne snakreni naprai na mala thunu naiknore naugna brana fara.

⁹ Neubane thunu ngau, naiknore heta ghedi te cheke faparini nanghagna God mae ihei te au nolaghi frunidi papara biꞌo igre. Nu naiknore ne tirodi tughu nagnafa nei tirodi pala hagheni neu nanghagna God na.

¹⁰ Falima engel na ne tei ne totofa nogna dis na ke kligna gna nogna sape nafnakno bosu na. Eghuteuna namono te gnafa te funei frunidi bosu na ne kafe romno soru. Eghuteuna naiknodi namono igre ne funu kakathu glapidire naugna ne kabru ghedi fara.

¹¹ Eghuteuna naiknore ne funu cheke faparini God gna kligna na, naugna khabru nei thubu biꞌo eghu ne au ka thinidire. Nu mare tirodi tughu nagnafa nei figri tagrudi eghu unha glepo te diꞌa teke edi thedire.

¹² Aonu fafamno engel na ne tei ne totofa nogna dis na ke kligna khoꞌu biꞌo te kiloni Iufretis. Eghuteuna khoꞌu na ne khapra. Eghume te khapra igne kaisei nabrou mala teidi hatimare mae king di ke maghatire.

¹³ Eghuteuna iara jaola ne filodi thilo naiture ne jateula groma neu. Thilo groma igre ne jifla mei, kaisei ka foflogna pholi biꞌo na, nei kaisei ka foflogna bosu na, nei kaisei ka foflogna mae profet te chaichaghi na.

¹⁴ Thilo naitu igre au nodi nolaghi mala eꞌei kofubobhoi. Aonu thilomare ne tei mala filodi hatimare mae king te gnafa ka nauthoglu gne, mala salo fodudi mare ka narane tuthuana na mala magra balugna God, mae ihei te au nolaghi fateote'o.

¹⁵ Aonu mae Jisas ne cheke eghu, “Fanomho fakeli! Tutuani, iara ginauna nake pulo mei ka ghotilo ka narane te theome ghathoni ghotilo na jateula kaisei mae te blau te mei ka narane te theome ghathoni naiknore. Mae ihei te tarabana teu teke pulo mei iara na, mana ginauna gleale'a fara kate filo ghau iara na. Mana jateula kaisei mae te ofoni teu ke pulo meigna mae kheragna na. Mana ginauna pipichi, dofrau nei gleale'a eghu kate filoni mana na. Jame te tarabana teu iagho teke pulo mei iara na, iagho na theome mamaja nou kate filo ghau iara na. Tutuani, iagho theome mamaja nou jateula iheire te soesole teu ka glalaba na ia eghu.”

¹⁶ Aonu, thilo naiture ne salo fodudi hatimare mae king ka kaisei vido te kiloni mare ka cheke Hibru na, “Amagedon.”

¹⁷ Fafitu engel na ne tei ne totofa nogna dis na ka maloa na. Eghuteuna kaisei cheke ne jifla mei ka mae ihei te gnokro ka nogna sape nafnakno mae king te au ka Sugablahi na, ne eha eghu fabiꞌo, “La gnafahi!”

¹⁸ Ka vido tuana ne nakafli, fila, nei nakheu biꞌo. Nakheu igne ngala te thofno biꞌo fara na. Funu ka narane teke vuvuhani God naikno na te mala au ka nauthoglu igne, theo kaisei nakheu te biꞌo jateula igne teuna.

¹⁹ Aonu namono biꞌo Babilon na ne fnota ka thilo vido. God ne ghathodi nakhibo te gnafa teke edi naiknodi Babilon re. Aonu mana ne paradi fara naiknore. Eghuteuna keha namono te gnafare ka nauthoglu igne jaola ne phaꞌe soru pari.

²⁰ Eghuteuna moumolu te gnafa nei thogele te gnafa teure ne dofidi.

²¹ Eghuteuna ka vido tuana nakhete thina na ne soru mei ka naiknore funu kligna ka maloa na. Galotodi nakhete thina igre tahudire jame glimafulu kilo. Ka vido tuana naiknore ne cheke faparini God kate kuru meini mana nakhete thina igne, naugna papara igne ne thofno diꞌa fara tulao.