Thakle 15 - Buka Blahi Ka Cheke Holo

Hatimare mae engel ne tarabana eigna papara leghu lahu

¹ Ke leghu na iara ne filoni kaisei fagaglana biꞌo ka maloa na, ne jaglo nogu fara. Iara ne filodi fitu engel re ne hata ne mei fitu papara biꞌo. Igre papara leghu lahure. Naugna kate gnafa igre ginauna, diꞌatagna God na, na jaola gnafa.

² Aonu iara ne filoni kaisei nhorora jateula thiro balu khaꞌaghi eghu. Eghuteuna iara jaola ne filodi naikno te magra te tapla soruni bosu nei mumuju gna na nei mae te au figas nabagna nanghagna na. Mare ne kegra neu rhegna nhorora te jateula thiro teuna, eghuteuna mare ne hata gita teke tusu ranghidi God re.

³ Mare ne kojeni kaisei khoje teke rioriso mae Moses, nogna mae gloku God. Tutuani, mana kilo fnaknoni God naugna God neke toghodi mare ka nogna tothogho mae Lam, ne cheke eghu, “Nomi Lord God, te nolaghi fara, nou gloku iagho re thono biꞌo fara, eghuteuna ghehati ne jaglo nomi fara. Iagho nodi King namono te gnafa ka nauthoglu igne, eghuteuna puhimu iagho re doglo nei tutuani fara eghu.

⁴ Naikno te gnafare ginauna ghatho tahu nigho, eghuteuna pala hagheni nanghamu na. Naugna iagho themu ngala te blahi na. Naikno te gnafa ka namono te gnafa igre ginauna mei mala pogho soru nigho, naugna mare laseni nou gloku iagho te doglore.”

⁵ Ke leghudi glepo igre, iara ne filoni suga tapuale te au God tagna na kate thora Sugablahi kligna na.

⁶ Aonu fitu engel te hata te mei fitu papara biꞌo leghu lahu igre, mare ne jifla mei ka Sugablahi na. Mare ne pipichi pohe vegha te siasigla fara. Eghuteuna mare jaola ne haru kaisei nhugha teke hohoro ka gol ke paridi baedire.

⁷ Ka vido tuana kaisei ka fati glepo te karha igre ne tusu lao ka fitu engel igre fitu dis teke hohoro ka gol. Dis igre fodu ka diꞌatagna God mae ihei te karha fabrahu tifa tifa.

⁸ Ke lamnagna Sugablahi na fodu ka gagahu. Gagahu igne ne mei funu ka God, mae ihei te au nolaghi te biꞌo fara nei nafnakno. Eghuteuna theome tangomana kaisei naikno te ruma haghe ka Sugablahi igne ghilei sala'u ari fitu papara teke hata teke mei fitu engel igre.