Thakle 14 - Buka Blahi Ka Cheke Holo

Nodi khoje iheire God tela fakarhidihi

¹ Aonu iara filo tei ne filoni Lam te kegra teu ke kligna gna Thogele Saion, eghuteuna kaisei gobi phiatutu fati thogha naikno kegra neu balugna mana. Nanghadi Lam ghe Kmagna re la kafe auhi ka greredire.

² Eghuteuna iara ne nomhini kaisei naogla gna kligna. U naogla igne jateula te oa'ongha galo ka thongna ba poha fila ka maloa eghu. Naogla te nomhini iara igne jateula naikno kmana te lalahu ka gitara eghu.

³ Kaisei gobi phiatutu fati thogha naikno igre mare kegra ke ulugna God mae ihei te gnokro teu ka nogna sape nafnakno nei ke uludi fati glepo te karhare nei hatimare mae biꞌo ka khiloaure. Eghuteuna naikno igre ne kojeni kaisei khoje majaghani. God neke foli fajifladi naikno igre ka naikno te gnafa ka nauthoglu igne. Mare ngala te tangomana te kojeni khoje igne.

⁴ Mae igre neke theome eni kaisei nakhibo jateula iheire te gnognoro. Nu mare au klino nodi fabrahu. Mare leghuni Lam fabrahu ka namono te gnafa aheva te tei mana na. God neke foli fajifladi ka naiknogna nauthoglu gne, mala thofno naikno malagna thegna nei malagna Lam.

⁵ Mae igre neke theo kaisei cheke chaichaghi te jifla mei ka foflodire. Tutuani fara, mare thofno doglo fara ka tathagna God na.

Thilo engel re ne eha

⁶ Iara ne filoni keha engel na ne flalo kligna ka maloa na. Mana hata balugna u Nonomho te Keli te au fabrahu te tifa te tifa na mala toutonu ranghidi naikno te au ka kokholo te gnafa, ka vike te gnafa, ka cheke te gnafa, nei ka namono te gnafa ka nauthoglu gne.

⁷ Engel na ne cheke eghu fabiꞌo, “Ghotilo mala ghatho tahuni God nei mala pala hagheni nanghagna na, naugna nogna narane mana te mala fatedi naiknore la meihi. Eghume ghotilo mala pogho soru ranghini mae ihei teke vuavuhani kligna nei nauthoglu nei nhorora nei glokha kho'ure.”

⁸ Aonu fapea engel na leghuni engel ulu lahu na ne cheke eghu, “Namono biꞌo Babilon te fnakno ia la groꞌehi! Naꞌa la diꞌahi! Puhidi naiknogna namono Babilon te gnognoro fara ra jaola khasidihi naikno ka namono te gnafare la theome doglo ka puhidire.”

⁹ Iara ne filoni fatilo engel na ne mei ke leghudi phei engel ulu lahu ra. Fatilo engel na ne eha eghu fabiꞌo, “Ihei te pogho soru ka bosu nei mumuju gna, nei lilisei nogna fagaglana bosu na ka greregna nei khame nhetagna teuna,

¹⁰ God ginauna parani naikno tuana. Tutuani, naikno tuana ginauna mala ko'uni kapu waen te fodu ka diꞌatagna God na. Waen tuana thono raha fara eghuteuna God ginauna jaola rahani fara kate paradire. Eghuteuna naikno tuana ginauna au papara ka khaꞌaghi te brana fara nei ka thina te ngaja ke uludi hatimare mae engel nei ke ulugna Lam.

¹¹ Eghuteuna gagahugna khaꞌaghi te paradi mare na ginauna haghe fabrahu tifa tifa. Iheire fateo te pogho soru ka bosu nei mumuju gna nei lilisei fagaglana gna nanghagna mana teuna, mare ginauna theome gnafa ka papara bongi narane.”

¹² Eghume te thokei mei puhi igre, ghotilo nogna naikno God te leghudi nogna vetula mana ra nei fatutuani nila mae Jisas teura, ghotilo mala kegra heta fabrahu.

¹³ Aonu iara ne nomhini kaisei cheke ne cheke eghu funu kligna, “Iagho rioriso soru cheke igre. ‘Funu gognaro, naikno teke falelehe mare eigna nodi fatutuani ka Lord na ginauna gleale'a fara.’ ” Tharunga te Blahi na ne cheke eghu, “Uve, tuana tutuani fara! Mare ginauna gnafa nodi ka gloku te biꞌora naugna tabagna unha teke eni mare na ginauna au fabrahu baludi.”

Nogna faefate God na thoke ka naiknogna nauthoglu

¹⁴ Ke leghu na iara ne filoni kaisei grokho vegha, eghuteuna ke kligna gna grokho igne iara filoni kaisei mae jateula mae teke mei funu ka God eghu filogna na. Mana ne gnokro neu ke kligna gna u grokho na. Ka pha'ugna na au kaisei khepi nafnakno teke hohoro ka gol, eghuteuna ka khamegna na louloku kaisei naflahi thagho te fnonu fara.

¹⁵ Aonu iara ne filoni kaisei engel ne jifla mei ka Sugablahi na. Mana ne eha eghu fabiꞌo ka mae te gnokro teu ka grokho na, “Fatedi naikno te diꞌa te au ka nauthoglu igne! Fate igne jateula kaisei mae te hata naflahi thagho te mala kato gano tela ghanohira eghu. Naugna gognaro thofno narane gna te mala eni igne, naugna naikno te gnafa ka nauthoglu gne la naba mala fatehi.”

¹⁶ Aonu ka narane tuana mae ihei te gnokro ke kligna gna grokho na ne fatedi naikno te gnafare ka nauthoglu gne.

¹⁷ Iara ne filoni keha engel na ne jifla mei ka Sugablahi na kligna. Mana jaola au kaisei naflahi thagho te fnonu fara.

¹⁸ Keha engel na ne jifla mei funugna ka olta na. Engel igne mala reireghi khaꞌaghi ka olta na. Mana tei kokoni olta na, ne eha eghu fabiꞌo ka keha engel te fnonu fara nogna naflahi thagho na, “Tei fatedi naikno te diꞌa ka nauthoglu gne eigna mare kaikaliti mala kegra ke ulugna fate na jateula sisi grep tela ghanohira eghu. U fate te eni iagho igne jateula kaisei mae te hata naflahi thagho te mala kato sisira eghu.”

¹⁹ Aonu mae engel ne fatedi naikno te gnafare te au ka nauthoglu igne naugna God ne diꞌatagna fara ka mare.

²⁰ Mana neke falehedi naikno te kmana te diꞌare ke kosigna namono biꞌo na. Kate lehe mare na, dadaradire ne thofa ne fodu ne haghe thokeni thilo gobi kilomita, sorugna na ne namo thokeni phei mita.