Thakle 13 - Buka Blahi Ka Cheke Holo

Kaisei bosu ne thakle ka nhorora na

¹ Ke leghu na iara ne fapea fata filoni bosu na ne thakle ka nhorora na. Bosu tuana au fitu pha'ugna nei nabotho honagna. Ka honagnare kafe au khepi nafnakno nei ka pha'ugnare jaola au teke rioriso mare nangha te thofno cheke faparini God.

² Bosu te filoni iara tuana jateula lepad eghu fifilogna na. Eghuteuna ghahegnare jateula ghahe bea eghu. Eghuteuna foflogna na jateula foflo lion eghu. Aonu pholi biꞌo na ne tusu lao ka bosu na nogna nanheta na. Eghume naikno te gnafare ne leghudi phiamare.

³ Kaisei pha'ugna bosu tuana ne fnera, jateula teke falelehe hira eghu. Nu nafnera ka pha'ugna na kela mafohi. Eghuteuna naikno te gnafa ka nauthoglu gne thono jaglo nodi fara ka bosu tuana, ne leghuni puhigna bosu na.

⁴ Naiknore ne pogho soru ka pholi biꞌo na naugna mana neke tusu lao nogna nolaghi na ka bosu na. Eghuteuna mare jaola pogho soru ne cheke fakelini bosu na, “Theo kaisei naikno te nheta jateula bosu igne teuna! Jaola theo kaisei naikno te naba te mala magra nei tapla soruni teu bosu tuana!”

⁵ God ne snakreni bosu tuana mala cheke fahaehaghe nei mala cheke faparini eghu thegna naba thilo finogha namno nhigra. God jaola snakreni mana mala eni unha mana te magnahagheni kate funei frunidi naiknore.

⁶ Mana ne tothora foflogna na mala cheke faparini God. Mana cheke faparani nanghagna God na nei cheke faparini vido aheva te au mana na, nei cheke faparidi iheire te au balugna mana kligna re.

⁷ God ne snakreni mana mala magridi nei tapla sorudi eghu nogna naikno God re. God jaola tusu ranghini mana nolaghi te mala funei frunidi naiknore ka vike te gnafa nei ka namono te gnafa nei ka cheke te gnafa nei ka kokholo te gnafa.

⁸ Aonu naikno te gnafa ka nauthoglu gne, mare ginauna pogho soru ranghini bosu te diꞌa tuana. Nu iheire teke rioriso soru nanghadire ka nogna buka God na, mare ngala nate theome pogho soruni bosu na. Igne nogna buka Lam, mae ihei God teke ghaoghaho eigna mana kani theome vuvuha nga teku nauthoglu gne te mala ginauna lehe ranghidi nogna naiknore.

⁹ Mae Jisas ne cheke eghu, “Ihei te magnahaghei te lase fakelini unha te chekeni iara na, mana fanomho fakeli ka unha te chekedi mae Tharunga te Blahi na ka khiloau igre.

¹⁰ Jame ihei teke snakreni God te mala tei ka suga sosolo na, tutuani mana ginauna mala au ka suga sosolo. Jame ihei teke snakreni God te mala lehe ka naflahi na, tutuani mana ginauna mala lehe ka naflahi. Eghume, te thoke mei puhi igre ka ghotilo na, ghotilo nogna naikno God ra mala kegra heta, nei mala fatutuani heta eghu ka God.”

Fapea bosu na ne thakle haghe ka glose na

¹¹ Aonu iara ne filoni fapea bosu na ne thakle haghe ka glose na. Mana au phei honagna, jateula honagna Lam eghu. Nu chekegna mana na heta fara jateula chekegna pholi biꞌo eghu.

¹² Aonu fapea bosu na ne mei kegra ke ulugna bosu ulu lahu te diꞌa na. Bosu ulu lahu na ne tusu lao nolaghi ka fapea bosu na mala funei frunidi kmana naiknore. Fapea bosu na ne huhurudi naikno te gnafa ka nauthoglu gne mala pogho soru ka bosu ulu lahu te au nafnera glehe ka pha'ugna na te kela mafo fapulohi na.

¹³ Eghuteuna fapea bosu na ne edi kofubobhoi biꞌo mala filoni naiknore nogna nolaghi na. Tutuani, kate filo teu naiknore, mana tangomana te eꞌei khaꞌaghi te mala soru mei ka nauthoglu igne funu kligna.

¹⁴ God snakreni fapea bosu na mala edi kofubobhoi igre ke ulugna bosu ulu lahu na. Eghuteuna naugna te edi mana kofubobhoi igre, mana ne chaghidi naikno te gnafa ka nauthoglu igne mala leghuni mana. Mana chekedi naiknore mala fafnaknoni bosu ulu lahu na kate eni mare kaisei mumuju jateula bosu ulu lahu. Bosu gne neke falelehe mare ka naflahi nu kela karha fapulohi teu na eghu.

¹⁵ Ke leghu na, God ne snakreni fapea bosu na mala phanga lao nuinuri ka mumuju gna bosu ulu lahu na. Ka puhi igne, mumuju gna bosu ulu lahu na neke karha ne hata nolaghi te mala cheke na nei mala falehedi eghu naikno te theome pogho soruni mumuju gna thegna na.

¹⁶ Fapea bosu na jaola ne huhurudi naikno te gnafare, neubane ikoi ba te biꞌo, te dedei ba te kuma, te snagla ba te sneka mala hata fagaglana fei khame nhetadi ba ka greredire.

^17-18 Tutuani fara, ihei te theome au tagna u fagaglana igne, mana theome tangomana te foifoli ba sabiri kaisei glepo na. Fagaglana igne u nanghagna bosu, ba figas nabagna u nanghagna bosu na. Uve, igne jaola nogna figas kaisei mae. Nogna figas mana na namno gobi namno salei namnoi. Ihei te lalase na, mana tangomana te filo glanini gaoghathogna u figas igne.