Thakle 12 - Buka Blahi Ka Cheke Holo

Gaꞌase nei kaisei mogo

¹ Aonu kaisei fagaglana biꞌo te mala fajaglodi naiknore ne thakle ka maloa na. Jare kaisei gaꞌase ne pipichi ka naprai. U glaba na au ke pari ghahegna, nei nabotho phei nathunure faligohoni pha'ugna na jateula kaisei nogna khepi nafnakno neu.

² Gaꞌase igne la buklahi eghuteuna naꞌa ne eha fabiꞌo kate namo karhagna thugna na, naugna ne kabru ghegna fara.

³ Eghuteuna keha fagaglana biꞌo na ne thakle ka maloa na. Jare kaisei pholi biꞌo te ukru. Mana au fitu pha'ugna nei nabotho honagna. Ka soasopa pha'u igre mana au kaisei khepi nafnakno.

⁴ Aonu sekogna na ne prosa ka maloa na ne khoko fatilogna nathunu na pari. Eghuteuna pholi na mei ne kegra ke ulugna gaꞌase te namo fakarha teu thugna na. Mana magnahaghei te ghamu thugna gaꞌase na kate karha mei majaghani na.

⁵ Aonu gaꞌase na ne fakakarha kaisei mae sua nalhaꞌu. Mae sua nalhaꞌu igne mala funei frunidi namono te gnafa ka nauthoglu gne balu nolaghi biꞌo. Nu kate karha sua na, mare hatani ne haghe ka God ka nogna sape nafnakno na.

⁶ Gaꞌase na ne rikha ne tei ka namono nagou aheva God teke kulu tarabanahi jare kaisei namono malagna naꞌa. Mare ginauna reireghi fakelini naꞌa ka vido tuana nabagna thilo finogha namno nhigra.

⁷ Aonu kaisei magra biꞌo na ne fufunu kligna. Mae engel biꞌo Maekol baludi nogna engel re ne magra ka pholi biꞌo na. Eghuteuna pholi biꞌo na baludi nogna engel re neke magra fapulo ka mare.

⁸ Nu pholi biꞌo na ne theome heta ka mare. Funu ka narane tuana, pholi biꞌo na baludi nogna engel re God ne theome snakredi te au kligna na.

⁹ Mare ne koko soruni pholi biꞌo na baludi nogna engel re ka nauthoglu gne. Pholi biꞌo tuana ngala mogo gna tifa te kiloni tahati mae Satan, mae funeidi naitu te gnafare. Eigna mana ne baubatudi naikno te gnafa ka nauthoglu gne ka nabrou te jafra.

¹⁰ Aonu iara ne nomhi kaisei cheke funu kligna, ne eha eghu fabiꞌo, “Gognaro na noda God la fakarha ghitahi! Mana ne falalasehi ka tahati nogna nolaghi te mala funei frunidi gobigna lepore, nei jaola falalasehi nogna Kraes te au nolaghi te mala funei frunidi. God la koko sorunihi mae Satan ka nauthoglu igne, mae ihei teke fathoro chaichaghidi naikno khiloaure ke ulugna God bongi narane.

¹¹ Hatimare mae kherada ka khiloau gne neke tapla sorunihi mana naugna Lam na neke thofa dadaragna na neke lehe. Hatimare jaola neke tapla soruni mana naugna mare neke toutonuni ni u cheke te tutuani na. Mare theome mhaghu mala lehe malagna God nu mare neke snakre lao nakarhadire ranghini mana.

¹² Naugna igne, kligna nei ghotilo hui te au jare ra mala kafe gleale'a! Nu nauthoglu nei nhorora teura fiofilo ghami! Naugna mae Satan, mae funeidi naitu te gnafare neke soruhi ka ghotilo. Mana thono diꞌatagna fara, naugna mana lasenihi te kmo'e farahi nogna narane te mala baubatudi naikno te gnafare ka nakhibo.”

¹³ Kate laseni pholi biꞌo te koko soruni mare ka nauthoglu igne, mana ne funu ngolhini gaꞌase teke karha majaghani thugna nalhaꞌu na.

¹⁴ Nu God ne tusu ranghini naꞌa phei baghi gaghata mala tangomana naꞌa te flalo te tei ka namono nagou te khaba ka pholi biꞌo na. Jare ka vido tuana mare ginauna reireghi fakelini naꞌa thilo finogha namno nhigra.

¹⁵ Aonu pholi biꞌo na ne lu'a fajifla khoꞌu ka foflogna na, ne britha jateula khoꞌu biꞌo neu ke leghugna gaꞌase na mala elo naꞌa.

¹⁶ Nu God na ne toghoni naꞌa. Mana neke tothora kaisei khora biꞌo ka glose na ne tomno soruni khoꞌu teke jifla mei ka foflogna pholi biꞌo na.

¹⁷ Aonu pholi biꞌo na ne diꞌatagna fara ka gaꞌase na ne tei magridi thugna naꞌa re. Thugna naꞌa igre iheire te leghuni fabrahu nogna vetula God nei fatutuanidi cheke te tutuani teke toutonudi mae Jisas re.

¹⁸ Eghuteuna pholi biꞌo na ne tei ne kegra ka nusu na.