Thakle 11 - Buka Blahi Ka Cheke Holo

Phei profet nogna God

¹ Mare ne tusu mei kaisei gaju brahu ka iara mala fananaba, eghuteuna mare ne cheke eghu ka iara, “Kegra sagho mala fananaba Sugablahi nogna God ana balugna olta na. Iagho jaola na kahadi naikno te pogho soru ke lamnagna Sugablahi tuana.

² Nu iagho thosei fananaba vido ke kosigna Sugablahi ana, naugna vido tuana la snakrenihi mare ka hatimare mae te theome Jiu are. Mare ginauna goigoni ni Jerusalem naba phia tutu phei nhigra.

³ Eghuteuna ke lamnadi narane igre, iara ginauna tusu lao nolaghi ka phei nogu mae profet igre mala toutonuni phiamare chekegna God na. Phiamare ginauna pipichi pohe pipito teke hohoro ka khakla nanigot, fagaglana gna nodi diꞌanagnafa na.”

⁴ Phei mae profet igre phei gaju oliv nei phei juta biꞌo. Mare ginauna kegra ke ulugna mae funei gna nauthoglu igne.

⁵ Jame ihei te fariuriu goigonidi phei mae igre na, khaꞌaghi ginau jifla mei ka foflodi phei mae igre mala roꞌedi nei falehedi eghu nodi naokare.

⁶ Phei mae igre au nodi nolaghi te mala fothini maloa gne te mala theome soru mei nakhete kate toutonuni teu phiamare chekegna God na. Eghuteuna phiamare jaola au nodi nolaghi te mala figri khoꞌu na teke vuhai dadara na. Phiamare au nodi nolaghi te mala kuru meidi thua nafnata papara ka nauthoglu igne. Phiamare tangomana te eni igne niha fata phiamare te magnahagheni na.

⁷ Ke leghugna te toutonuni phiamare chekegna God na, bosu te au ka glave te mamhara fara na ginau jifla mei mala magridi phiamare. Bosu igne ginauna tapla sorudi nei falehedi eghu phiamare.

⁸ Eghuteuna thinidi phia mae igre ginauna thuru jare ka nabrou biꞌo gna namono na, eigna tifa na mare neke tupijuruni nei faleheni neku nodi mae funei phiamare na ka gaju fafatha. Nanghagna namono biꞌo igne, Sodom ba Ijep. Igne kaisei cheke naba eigna namono biꞌo Jerusalem.

⁹ Naiknodi namono te gnafa, vike te gnafa, cheke te gnafa, nei kokholo te gnafa teu igre ginauna filo ka thinidi phei mae igre naba thilo narane vidogna. Eghuteuna mare ginauna theome snakredi naiknore mala giugilui thinidi phiamare re.

¹⁰ Naiknogna nauthoglu igne ginauna gleale'a fara kate nomhini tela lehehi phei mae profet igre na. Aonu naiknore ginauna eꞌei gaghamu nei tufa namha fari thedi. Naugna phei mae profet igre neke paradi fara kmana naikno ka nauthoglu igne.

¹¹ Nu ke leghu thilo narane vidogna, God phaphanga lao ke klignadi neke fakarha fapulodi phiamare. Eghuteuna kate filodi phiamare teke nonolo na, naiknore ne mhaghu nodi fara.

¹² Aonu ka vido tuana phei mae profet igre ne nomhini kaisei cheke ne cheke mei funu kligna, ne eha eghu fabiꞌo, “Mei, haghe agne!” Kate filo leuleghu teu nodi naoka phiamare re, phiamare ne haghe kligna ke lamnagna kaisei grokho.

¹³ Ka vido tuanala ne kaisei nakheu biꞌo. Eghuteuna kaisei vidogna namono biꞌo na ne groꞌe, eghuteuna fitu thogha naikno ne lehe ka nakheu tuana. Eghuteuna naikno teke theome lehere mhaghu nodi fara ne cheke fakelini nanghagna God gna kligna na.

¹⁴ Igne gnafa gna fapea papara biꞌo na, nu ginauna theome raugha ke meigna fatilo papara te diꞌa na.

Fafitu engel na ne ifu nogna khufli na

¹⁵ Aonu fafitu engel na ne ifu nogna khufli na. Eghuteuna iara ne nomhidi cheke te mei funu kligna re, ne eha eghu fabiꞌo, “Nolaghi te mala funei frunidi naiknogna nauthoglu gne gognaro nogna noda Lord nei nogna Kraes. Mana ginauna funei frunidi fabrahu tifa tifa.”

¹⁶ Varadaki fati mae biꞌo ka khiloau te gnokro teu ka nodi sape nafnakno ke ulugna God igre turupuku ne pogho soru ka God.

¹⁷ Mare ne cheke eghu, “Lord God te thofno nolaghi, ghehati cheke fakeli nigho. Iagho au fabrahu funu tifa nei jaola gognaro. Ghehati cheke fakeli nigho naugna iagho la hatahi nou nolaghi te biꞌo na te mala funei frunidi naikno te gnafare!

¹⁸ Naikno te tirodi fatutuani nigho re ne thofno diꞌatadi fara, nu gognaro la mei nou narane iagho te mala diꞌa tamu na. Igne narane mala fatedi naikno tela lehehira. Igne narane mala tabadi nou mae gloku hatimare mae profet ra baludi nou naikno te gnafa teke ghatho tahu nigho, neuba mare ne mae nafnakno ba theome mae nafnakno. Igne narane te mala paradi naikno teke goigonidi naiknogna nauthoglu igne.”

¹⁹ Aonu grengathagna nogna Sugablahi God te au kligna na ne thora, eghuteuna iara ne filoni bokis te au nogna nhaꞌa cheke God teke rioriso ranghidi nogna naiknore. Ka vido tuana nakafli, fila, nakheu, nei nakhete thina eghu ne khoko soru mei ka maloa na.