Thakle 10 - Buka Blahi Ka Cheke Holo

Engel balugna kaisei buka ikoi

¹ Iara ne filoni kaisei engel te nolaghi fara ne soru mei funu kligna. Mana pipichi ka kaisei grokho balugna kaisei maja ka pha'ugna na. Eghuteuna tathagna na siasigla jateula naprai eghu, eghuteuna phei ghahegnare jateula khegra biꞌo te phae teu ka khaꞌaghira eghu.

² Engel igne ne louloku kaisei buka ikoi tela thorahi ka khamegna na. Aonu mana tapla lao ghahe nhetagna na ke kligna nhorora, eghuteuna ghahe mairigna na ke kligna glose te khapra.

³ Eghuteuna mana ne eha fabiꞌo jateula te ku'e lion neu. Kate eha mana na fitu filare ne cheke tughu.

⁴ Kate cheke te gnafa fitu filare, iara ne funu rioriso unha teke chekedi mare re. Nu ka vido tuana iara ne nomhini kaisei cheke ne soru mei funu kligna, ne cheke eghu, “Iagho thosei rioriso unha teke chekedi fitu filara. Nu iagho phophoru fakeli glepo igre.”

⁵ Aonu engel teke filoni iara te tapla ke kligna nhorora nei ke kligna glose te khapra teu igne, mana ne tusu haghe khame nhetagna na kligna.

^6-7 Ka vido tuana, mana ne eni kaisei nhaꞌa cheke ka nanghagna God mae ihei te karha te tifa tifa. Tutuani, God neke vuavuhani kligna nei pari nei nhorora nei thua lepo te au ke lamnadi. Aonu engel na ne cheke eghu ka nanghagna God, “Ka narane nate ifu fafitu engel nogna khufli na, nogna gaoghatho God teke poru teku igre ginauna horoghoto tutuani. Igne u Nonomho te Keli teke chekeni mana tifa ka nogna mae gloku, hatimare mae profet ra. Narane te mala ofo na la gnafahi!”

⁸ Aonu cheke teke nomhinihi iara teke soru mei funu kligna igne ne jaola ne cheke eghu mei ka iara, “Tei hata buka ikoi tela thorahi te au ka khamegna engel te kegra ke kligna nhorora nei ke kligna glose te khapra teu ana.”

⁹ Iara ne tei ka engel na, eghuteuna iara ne toreni ka mana buka ikoi na mala tusu mei ka iara. Mana ne cheke eghu ka iara, “Hata sagho buka igne mala ima. Iagho laseni, lamna ka foflomu iagho na ginauna mamahe fara jateula jurukuli eghu. Nu kate ima te gnafa iagho na, iagho ginauna haimini ka thi'amu na thono sorho fara.”

¹⁰ Iara hata ka mana buka ikoi na ne ima. Eghuteuna lamna ka foflogu iara na, ne thofno mamahe tutuani fara. Nu kate tomno soruni iara na, iara ne haimini ka thi'agu na ne thono sorho tutuani fara.

¹¹ Ka vido tuana mare ne cheke eghu ka iara, “God magnahaghe nigho iagho te mala ke toutonu eidi kmana naikno ka soasopai namono, kokholo te kmana, cheke te kmana, nei hatimare mae king te kmana.”