Thakle 1 - Buka Blahi Ka Cheke Holo

¹ Igne buka thoutonu eigna narane God ginauna nate funei frunidi gobigna lepore. Glepo te au ke lamnagna buka igne theo kaisei naikno teke lasedi tifa re, nu gognaro na mae Jisas Kraes la famane fataklehi. Tutuani, God neke fatakleni igne ka mae Jisas mala ke tathakle mana ka nogna mae glokure eigna glepo igre na theome raugha thakle meidire. Kraes neke kuruni nogna engel na mala fatakle glepo igre ka iara nogna mae gloku na.

² Aonu iara mae Jone neke rioriso glepo teke filodi thegu igre. Chekegna God na thofno tutuani fara teke cheke mei mae Jisas Kraes igre.

³ Mae ihei nate iu'ijudi chekegna God igre ginauna gleale'a fara. Eghuteuna iheire te nomhini nei leghuni teu chekegna God igre mare na jaola gleale'a fara. Naugna narane te mala thakle meidi glepo igre ranghidi naiknore la namohi.

Mae Jone ne riso tei ka fitu khiloaure

⁴ Iara riso ari ka ghotilo fitu khiloau te au ka provins Esia ra. Iara toreni God te mala tusu ranghi ghami ghotilo nogna khokofakasai nei pharikeli teuna. Tutuani, God mae ihei teke au tifa, gognaro gne, nei nake pulo mei nathuꞌu nauriha. Khokofakasai nei pharikeli teu igre jaola mei funu ka fitu tharunga te keli te au ke ulugna nogna sape nafnakno mae King na.

⁵ Eghuteuna khokofakasai nei pharikeli teu igre jaola mei funu ka mae Jisas Kraes mae ihei teke toutonuni chekegna God na ka thofno puhi te tutuani fabrahu tifa tifa. Mae ihei teke kulu karha fapulo kau glehe, nei au nolaghi ke klignadi hatimare mae king te gnafa ka nauthoglu igne. Mana namha ghita fara, nei lehe jateula kaisei fafara mala foli fajifla ghita gnafa ka nakhibo.

⁶ Mana eꞌei ghita mala pris te mala toghodi nogna naiknore nei mala pogho soruni God Kmagna noda King. Tahati ginauna pala hagheni nanghagna na kligna, eghuteuna kilo fnaknoni fabrahu nogna nolaghi biꞌo na tifa tifa. Amen.

⁷ Filo si ghotilo, mae Jisas na ginauna nake pulo mei balu grokho ka maloa na. Naikno te gnafare ginauna filoni mana, eghuteuna naikno teke jaꞌini mana tifa ra ginauna jaola filoni mana. Naikno ka namono te gnafa ka nauthoglu igne ginauna diꞌanagnafa balu tanhi fabiꞌo kate filoni mana na naugna mana au nolaghi biꞌo fara. Uve, ginauna jateula tuana eghu. Amen.

⁸ Noda Lord God neke cheke eghu, “Iara teke au tifa, gognaro gne, nei nake pulo mei nathuꞌu nauriha balu nolaghi fateote'o tifa tifa.” Tutuani, mana kulu au neke vuavuha nga gobigna lepore nei mana na au fabrahu kate ari te gnafadi gobigna lepore.

Mae Jone neke filoni mae Jisas Kraes

⁹ Iara mae Jone, kaisei mae kherami ghotilo ka khiloau eigna tahati te gnafa na kafe fatutuani ni mae Jisas. Kraes na noda King eghuteuna tahati mala kegra heta fodu, neubane para ghita naiknore. Tutuani, mare lilisei ghau iara ka suga sosolo ka moumolu ikoi Patmos, eigna iara ne toutonuni chekegna God na nei cheke ka tutuani eigna mae Jisas.

¹⁰ Ka kaisei narane Sade, nogna nolaghi Tharunga te Blahi na neke mei ka iara mala batuni gaoghathogu iara na. Ka narane tuana iara neke nomhini naoglagna God te cheke fabiꞌo ke leghugu iara jateula kaisei khufli neu.

¹¹ Mana ne cheke eghu ka iara, “Ghema Jone, iagho rioriso soru unha teke filodi iagho re, eghuteuna fatei buka igne ka khiloau te au ka fitu namono igre, Efesus, Smana, Pegamum, Teatira, Sadis, Filadelfia, nei Leodisia.”

¹² Aonu iara ne figri mala filoni mae ihei te cheke mei ka iara igne. Kate filo lao iara na, iara ne filodi fitu juta teke hohoro ka gol te kegra teu jare.

¹³ Eghuteuna farihoteidi juta igre, iara filoni kaisei mae filogna na jateula “Mae teke mei funu ka God” eghu. Mana pipichi kaisei pohe te brahu posa ka glose na, eghuteuna mana haru kaisei nhugha teke hohoro ka gol ke pari baegna.

¹⁴ Pha'ugna nei khaklagna teu mana re vegha fara jateula khakla sipu eghu, eghuteuna phei tathagnare jateula deudeplu khaꞌaghi eghu.

¹⁵ Phei ghahegnare jaola sigla jateula bras te ngire ka khaꞌaghi eghu siasigla fara, eghuteuna naoglagna na oa'ongha jateula galo biꞌo ka thongna eghu.

¹⁶ Mana louloku fitu nathunu fei khame nheta, nei kaisei naflahi te fnonu piepile ne jifla mei ka foflogna na. Eghuteuna tathagna na siasigla fara jateula naprai farihotei aublatha eghu.

¹⁷ Kate filo lao iara ka mana na, iara ne mhaghu nogu fara ne uka ke uludi ghahegna mana re jateula kaisei mae tela lehehi neu. Nu mana ne loku ka iara khame nhetagna na, ne cheke eghu, “Thosei mhaghu. Iara kulu au neke vuavuha nga gobigna lepore nei iara na au fabrahu kate ari te gnafadi gobigna lepore.

¹⁸ Iara mae ihei te karha tifa te tifa. Tutuani! Tifa na iara neke lehehi, nu gognaro na iara kela karha fapulo mala au fabrahu tifa tifa. Iara au nolaghi te mala cheke ranghini ihei te mala au ka glehe nei ihei te mala au ka karha na. Iara jaola au nolaghi te mala cheke ranghini ihei nate tei Hades ka namonodi naikno tela lehehira.

¹⁹ “Eghume, iagho mala rioriso soru glepo te thakle mei ka iagho gognaro gre neu glepo nate thakle mei teu thogheiro.

²⁰ Iagho filodi fitu nathunu te louloku iara fei khame nhetagu gre, nu iagho theome laseni gaoghathodi fitu nathunu igre. Uve, fitu nathunu igre gaoghathogna na hatimare mae engel ka fitu khiloau gre. Eghuteuna iagho jaola filodi fitu juta teke hohoro ka gol. Fitu juta igre gaoghathogna na eidi fitu khiloau tuare kolho.”