Letas Teke Riso Tei Mae Pol Ka Khiloau Rom 7 - Buka Blahi Ka Cheke Holo

Kaisei thotoghale eigna tholaghi

¹ Kheraguro, ghotilo ginauna laseni unha te chekeni iara tami na, naugna ghotilo thofno lasenihi nogna vetula mae Moses ia. Kate karha teu ngala naikno na, u vetula na au nogna nolaghi ke kligna gna mana.

² Jame kaisei gaꞌase tolaghi eghuteuna karha meu khetogna na teuna, u vetula eigna tholaghi na haruni gaꞌase igne ka khetogna na. Nu jame te lehehi mae nalhaꞌu na, gaꞌase na snaglahi ka vetula gna tholaghi na.

³ Aonu jame gaꞌase tholaghi na tei thuru balugna kaisei mae delei kate karha teu khetogna na, naꞌa huhughuni u vetula gna tholaghi na eghuteuna naꞌa khale ka tolaghi pedo. Nu jame te lehehi khetogna na, gaꞌase na snagla ka vetula gna tholaghi na, eghuteuna neubane tolaghi naꞌa ka kaisei mae delei, naꞌa theome huhughuni u vetula na.

⁴ Eghume ghotilo kheraguro, naugna Kraes neke lehe ke kligna gaju fafatha, nogna vetula mae Moses na theo kaisei nolaghi ke klignada. Tahati snaglahi ka vetula tuana jateula kaisei gaꞌase tholaghi te snagla ka vetula gna tholaghi ke leghu glehegna khetogna na. Naꞌa tangomana teke tolaghi ka kaisei mae delei na. Tutuani, gognaro na tahati kaisei ka Kraes mae teke karha fapulo ka glehe ia mala tangomana tahati te loku fakeli ranghini God na.

⁵ Nu kani leghudi teku kolho tahati puhida theda te diꞌa fara tifa ra, tahati neke thofno magnahaghei te leghuni koba unha te blahi fara ka u vetula na. Eghume, tahati neke snakre lao ghita theda kolho ka puhi te diꞌa nabagna te mala lehe na.

⁶ Tifa na u vetula neke loku famaku ghita fara, nu gognarona tahati snagla fei vetula na, naugna kate lehe Kraes tifa na tahati jaola lehe balugna mana. Eghuteuna gognarona tahati tangomana te loku ranghini mana ka puhi majaghani. Naugna tahati leghuni mae Tharunga te Blahi, theome leghuni puhi te risoni mae Moses ka vetula na.

Vetula ghe nakhibo

⁷ Ba, faꞌunha eghu tahati cheke eigna nogna vetula mae Moses gne? Tahati na chekeni, nogna vetula mae Moses gne mala batudi naiknore ka nakhibo signea eghu? Theo fara! Naugna nogna vetula mae Moses na mala falalase ghau iara te leghuni puhi te diꞌa na. Uve, kaisei cheke ka vetula na cheke eghu, “Thosei mamagnadi nodi keha naiknore.” Nu jame te theome laseni iara eigna cheke te risoni mare igne na, iara ginauna theome laseni puhi te diꞌa na.

⁸ Eghuteuna nakhibo na au nogna nabrou ka cheke te au ka vetula na igre na batu ghau iara ka nafnata gaoghatho te diꞌa te mala mamagna na. Jame te theo vetula na, u gaoghatho te mala eni nakhibo na theome au ka iara.

⁹ Tifa na, neubane theome laseni iara vetula na, nakarhagu iara na neke keli fara, naugna iara theome laseni nakhibo na. Nu kate funu laseni iara nogna vetula God na, iara neke filo glani u nakhibo na ke lamnagu iara na heta fara.

¹⁰ Eghuteuna iara ne lehe naugna nakhibo tuana. Tutuani fara, God neke lisei mei vetula na ka cheke igre mala togho ghau iara mala hatini iara u karha na neku, nu kate thakle ke lamnagu iara u cheke igre, iara filo glani glehegu na naugna iara ne fnota ka God.

¹¹ Eghuteuna puhi nakhibo na neke filoni kaisei nabrou ka nagnafagu iara na ne hata keha cheke ka vetula na ne saosagro ghau iara nei falehe ghau iara neu.

¹² Eghume, u nogna vetula God gne thono blahi fara, eghuteuna cheke te gnafa ka vetula na igre jaola blahi nei doglo nei keli eghu.

¹³ Ba, u vetula te keli igne site falehe ghau iara na ia? Theo fara! Nu iara neke lehe ke ulugna God, naugna iara neke leghuni u nabrou te jafra na. Neubane keli vetula na, puhigna nakhibo na salo fodu baludi vetula igre te mala kotu biꞌo ke lamnagu iara u gaoghatho te mala eni puhi nakhibo na. Ka puhi igne tahati filo glanini nakhibo na glepo diꞌa. Naugna u chekegna vetula na falalase puhigna nakhibo na thofno diꞌa fara kolho.

Vetula na theome tangomana te fakelini naikno na

¹⁴ Eghuteuna te laseni tahati na, u vetula gne neke mei funu ka God, nu naugna iara maegu ka nauthoglu igne naikno kolho, iara au jateula nogna mae sneka eghu nakhibo.

¹⁵ Iara theome lase fakelini puhigu thegu na. Naugna iara theome tangomana te eni unha te magnahaghei te eni iara na, nu leuleghu fata na iara eni unha te theome magnahaghei eni iara na.

¹⁶ Kate eni iara unha te theome magnahagheni iara na, iara huhughuni nogna vetula God na. Nu naugna iara theome magnahagheni te huhughuni vetula na, igne falalase gaoghathogu iara te keli fara vetula na.

¹⁷ Eghume theome iara thegu te eni glepo te diꞌa igne, nu nogna nolaghi nakhibo te au ka nagnafagu iara na.

¹⁸ Iara laseni, fei iara thegu na, iara maegu ka nauthoglu igne kolho, theo kaisei glepo te keli te au ke lamnagu iara na. Naugna neubane au ka iara gaoghatho te keli na, iara theome tangomana te eni puhi te keli na. Theo fara, iara theo nogu nolaghi te mala eni puhi te doglo na.

¹⁹ Eghuteuna unha te eni fabrahu iara na theome glepo keli te magnahagheni iara na eghu, nu glepo diꞌa te theome magnahagheni iara na te eni iara na.

²⁰ Eghuteuna naugna te eni kolho iara unha te theome magnahagheni iara na, iara laseni igne, theome thegu iara te eni puhi tuana, nu nogna nolaghi nakhibo te au ka nagnafagu iara.

²¹ Eghume, te laseni iara ka puhigu thegu na. Kate magnahaghei eni iara glepo te keli na, gaoghatho te diꞌa kolho te au ke lamnagu iara na. Iara theome tangomana te leghuni kaisei nabrou aheva nga.

²² Ka nagnafagu iara na, iara keli tagu ka nogna vetula God na nei iara magnahaghei te leghuni vetula na.

²³ Nu iara filoni puhi te diꞌa te loku ke lamnagna thinigu iara na magra ka nogna vetula God te au ka nagnafagu iara na. Nu puhi te diꞌa te au ka thinigu iara na huhuru ghau iara mala eni puhi te diꞌa na.

²⁴ Tutuani fara, iara gne theome gleale'a ka nagnafagu na, naugna iara gognaro na thono diꞌa fara! Ihei nate togho ghau iara te mala snagla iara ka puhi te diꞌa te au ka thinigu iara te batu ghau ka glehe gne?

²⁵ Tahati mala cheke fakelini God, eigna mana ginauna eni igne ka nogna gloku mae Jisas Kraes noda Lord! Eghume iara thegu na jateula igne eghu, ka gaoghathogu na, iara thofno magnahaghe te leghuni nogna mae gloku nogna vetula God. Nu naugna iara kaisei naiknogna nauthoglu igne kolho, iara leghuni u puhigna nakhibo te au ke lamnagu.