Letas Teke Riso Tei Mae Pol Ka Khiloau Rom 6 - Buka Blahi Ka Cheke Holo

Lehe ka nakhibo nu karha ka Kraes

¹ Eghume, faꞌunha eghu tahati cheke eigna te mala doglo ke ulugna God na? Nabada na tahati au fabrahu ka puhi nakhibo mala biꞌo salaꞌui ranghi ghita nogna khokofakasai God na?

² Theo fara! Tahati jateula mae te lehehira eghu theome eni kaisei nakhibo. Teuna, faꞌunha si tahati te au fabrahu teu ka nafnata puhi igne?

³ Ghotilo lasenihi eida tahati tela kafe apublahi te mala laseni tela kaiseihi tahati balugna Kraes gne. Kate eni igne, tahati jaola kaisei balugna mana kau glehegna.

⁴ Ka apublahida na, tahati jateula te lehe eghu balugna mana nei giugilu ghitahi balugna mana. Eghuteuna ka igne tahati jaola tangomana teke karha fapulo jateula Kraes eghu e mala au ka nakarha majaghani, eigna God Kmada neke fakarha fapuloni mana ka nogna nolaghi te biꞌo na.

⁵ Naugna tahati la kaiseihi balugna mae Kraes ka glehegna, God ginauna jaola fakarha fapulo ghita jateula mana teke fakarha fapuloni mae Kraes.

⁶ Tahati laseni fara igne. Nakarhada tifa na tahati jateula te tupijuru eghu balugna Kraes ke kligna gaju fafatha, mala tangomana God te roꞌeni nogna nolaghi nakhibo teke au ka nakarhada tifa na. Ka puhi igne nakhibo na theo kaisei nogna nolaghi te mala funei fruni ghita na.

⁷ Naugna ke leghugna teke lehehi naikno na, mana tangomana te snagla ka nogna nolaghi nakhibo.

⁸ Eghuteuna te lehehi tahati balugna Kraes na, tahati fatutuani ginauna jaola karha balugna mana.

⁹ Tahati laseni igne. Tutuani fara, Kraes kela karha fapulohi. Eghume tahati thofno laseni eigna mana theome tangomana mala teke fapea fata lehei na. Naugna glehe na theo kaisei nolaghi te mala funei frunini mana na.

¹⁰ Mana neke lehe kaisei fata ngala, tuana ngala naba te mala fagnafani u nogna nolaghi nakhibo na. Eghuteuna gognarona mana au ka karha, nei mana au ka karha kaisei balugna God tifa tifa.

¹¹ Eghume, jateula tuana eghu mala ghatho ghami themi. Eigna ghotilo mala kaisei balugna Jisas Kraes, jateula ghotilo te lehe balugna mana nei nakhibo na theo kaisei nolaghi ke klignami ghotilo, eghuteuna ghotilo tangomana te au ka karha balugna God.

¹² Eghume, thosei snakreni nakhibo mala funei frunidi thinimi are, eigna thinimi are ginauna lehe kolho. Na eghunu batu ghami nakhibo me leghudi ghotilo puhimi themi te diꞌare eghu.

¹³ Thosei snakreni kaisei vido ka thinimi are mala edi puhi te diꞌare. Naugna ghotilo neke karha fapulohi ka glehe. Nu snakre lao ghami themi ka God, nei snakre lao vido thinimi te gnafa are ka God mala edi glepo te doglore.

¹⁴ Nakhibo na theome tangomana te funei fruni ghami ghotilo te mala goigonidi nakarhamire, naugna ghotilo theome au ke parigna u nogna vetula mae Moses, nu ghotilo au ke parigna nogna khokofakasai God.

Tahati mae gloku te mala eni unha te doglo

¹⁵ Ka gaoghathodi u cheke teke chekedi iara ra, jame kaisei mae cheke eghu, “Gognarona tahati theome au ke parigna nogna vetula mae Moses, nu tahati au ngala ke parigna nogna khokofakasai God mala togho ghita. Eghume tahati eni fabrahu ngala nakhibo na eghu.” Cheke mana igre thofno doglo fara? Theo fara!

¹⁶ Ghotilo kulu lasenihi igne, eigna te snakre ghami themi ghotilo te au ke parigna kaisei mae te mala leghuni nogna cheke na, ghotilo ginauna leghuni kolho nogna cheke naikno tuana. Ghotilo ginauna jateula tuana eghu ka nakhibo na. Naugna jame te eghu na, ghotilo ginauna jateula nogna mae sneka eghu kolho nakhibo, ka puhi tuana nakhibo na ginau falehe ghami kolho. Nu jame au jateula nogna mae sneka God teu ghotilo te mala leghudi chekegna mana re, God ginauna togho ghami mala au doglo ghotilo ke ulugna thegna.

¹⁷ Tifa na, ghotilo neke loku ranghini nakhibo, nu gognaro na, ghotilo thofno leghudi cheke teke farirhiu ghami ghehati ra. Iara cheke fakelini God eigna igne!

¹⁸ God neke fasnagli ghami ka nogna nolaghi nakhibo, eghuteuna gognaro na ghotilo mae sneka mala eni unha te doglo na.

¹⁹ Iara cheke kau cheke naba igne eigna “mae sneka” te kafe laseni ghotilo, eigna gaoghathomi ghotilo re theome krepa. Tifa na, ghotilo neke snakredi vido thinimi fateo are mala nogna mae sneka puhi te diꞌa nei nafnata glepo te diꞌa tulao. Nu gognaro na ghotilo lisa lao vido thinimi fateo are mala nogna mae sneka puhi te doglo nei glepo te blahi eghu.

²⁰ Tifa na, kani sneka teku ka nakhibo na, ghotilo neke au khaba ka puhigna God te doglo na.

²¹ Tutuani, ghotilo neke theome hatini kaisei glepo te keli kolho ka nakhibo teke edi ghotilo re, eghuteuna ghotilo gognaro na mamaja nomi fara eidi puhi tuare. Thogheiro na nafnata puhi te diꞌa tuare mala fafnota ghami themi kolho ka God tifa tifa.

²² Nu gognaro na God hata fasnagla ghamihi ka nakhibo tuare mala nogna mae sneka mana. Eghume nakarhami ghotilo na mala blahi nei ginauna ghotilo hatini karha fei tifa na eghu.

²³ Tutuani ihei te tapla jafra ka nakhibo na, tabagna na u glehe ngala, u glehe te theo ka huigna na. Nu God neke tusu ranghi ghita u karha fei tifa na naugna ka glehegna Kraes noda Lord.