Letas Teke Riso Tei Mae Pol Ka Khiloau Rom 5 - Buka Blahi Ka Cheke Holo

Au doglo balugna God

¹ Naugna tahati neke fatutuani ni God, mana la fadoglo ghitahi ke ulugna thegna. Tutuani, noda Lord Jisas Kraes neke togho ghita mala au tahati kau pharikeli balugna God.

² Ka noda fatutuani ka mae Jisas, God tangomana te eni kaisei nabrou te mala laseni tahati nogna u khokofakasai na. Tutuani fara, tahati tangomana te au ke lamnagna thofno nakarha na naugna mana ne namha ghita. Eghume tahati au noda grouronu ka God te mala au balugna kligna.

³ Eghuteuna tahati jaola gleale'a kate au ke lamnadi hoholo te kmana igre, naugna tahati lasedi hoholo igre togho ghita mala au heta tahati.

⁴ Eghuteuna kate au heta fabrahu tahati na, God ginauna na jaola tangomana te gleale'a ka tahati na, mala tangomana tahati te thofno rouronuni te mala hata u nogna nhaꞌa cheke mana na.

⁵ Eghuteuna u grouronu igne theome mala fadiꞌa nagnafa ghita tahati. Naugna God neke falalasehi nogna namha na ka tahati nei mana neke kuru mei nogna Tharunga te Blahi na mala au ke lamnada.

⁶ Ka thofno narane teke vahini God na, Kraes neke lehe mala togho ghita tahati naikno te fodu ka nakhibo. Tutuani, tahati theo noda nolaghi te mala togho ghita theda na.

⁷ Ninhigrana fara ranghini kaisei naikno te magnahaghei lehe tughuni kaisei naikno te doglo na. Nu jame kaisei mae te frane, mana tangomana te lehe tughuni kaisei mae te keli fara na.

⁸ Neubane au neu tahati ka nakhibo, God neke fatakle ranghi ghita u nogna namha biꞌo na kate kuru meini Kraes mala lehe tughu ghita na.

⁹ Tutuani, gognaro na u dadaragna Kraes na togho ghitahi mala au doglo ka tathagna God na. Eghume te laseni tahati na, Kraes ginauna fakarhi ghita eigna God ginauna theome diꞌatagna ka tahati ka narane te mala fatedi naiknore.

¹⁰ Ulu lahu na tahati neke jateula nogna naoka God neku. Nu ka glehegna Thugna na, God neke togho ghita mala kheragna thegna. Eghume, naugna gognaro na tahati la kheragnahi God, tahati thofno laseni God na ginauna fakarha ghita, naugna Kraes te karha gognaro gne.

¹¹ Eghuteuna keha glepo na igne eghu, noda Lord Jisas Kraes na neke togho ghita mala au fodu balugna God, eghuteuna tahati gognaro na tangomana te au gleale'a ka God.

Mae Adam ghe Kraes

¹² Nakhibo na neke thakle mei ka nauthoglu igne leghuni nogna najafra kaisei mae kolho, eghuteuna mana neke lehe eigna nakhibo. Eghuteuna naugna ka nakhibogna mae igne, glehe na neke thakle mei ka tahati te gnafa naikno te thakle mei ke leghugna mana re. Naugna tahati te gnafa na jaola kafe au ka nakhibo.

¹³ Ame tusu mei nga God u vetula na ka mae Moses teku na, naikno te au ka nauthoglu igne neke kulu auhi ka puhi nakhibo. Nu kani theome au nga teku u vetula na, God neke theome ghathodi nakhibodi naiknore.

¹⁴ Nu funu ka narane gna mae Adam te posa ka narane gna mae Moses na, naikno te gnafare mala lehe kolho, neuba naiknore ne theome eni kaisei najafra jateula mae Adam teke huhughuni chekegna God na ia. Mae Adam gne jateula thotoghalegna eghu mae Jisas, mae ihei teke mei ke leghugna mana na.

¹⁵ Nu phiamare theome kaisei nanaba, naugna nakhibogna mae Adam na theome jateula khokofakasai teke tusu mei God ka tahati igne eghu. Neuba kmana naikno ne lehe ka nakhibogna mae Adam, tutuani fara kmana naikno na hatani u thofno karha te theo ka huigna na naugna nogna khokofakasai kaisei mae Jisas Kraes. Naugna nogna namha nei nogna khokofakasai teu God re glepo biꞌo fara uluni tulao nakhibogna mae Adam na.

¹⁶ Eghuteuna jaola keha glepo unha te jifla mei ka nakhibogna mae Adam na theome nanaba ka unha te jifla mei ka nogna khokofakasai God na. Ka narane teke tapla jafra kaisei mae Adam ngala ka nakhibo na, God neke fateni mana ne cheke eghu, “Iagho jafra tutuani.” Nu ke leghu kate edi kmana nakhibo naiknore, God ne snakreni nogna namha biꞌo na, nei tusu ranghidi u khokofakasai, ne cheke eghu, “Ghotilo doglou kolho.”

¹⁷ Neuba naikno te gnafare ne naba mala lehe ngau ka nakhibogna kaisei mae igne Adam, unha te eni God ka nogna gloku kaisei mae igne Jisas Kraes na, thofno biꞌo fara. Tutuani, God mae ihei te namhadi fara naiknore, nei iheire te hatani nogna namha na, mana ginauna toghodi mala doglo ka tathagna thegna na. Naikno igre hatani u thofno karha te jifla mei ka mae Jisas Kraes na mala au fnakno balugna kligna tifa tifa.

¹⁸ Eghuteuna jaola, eigna nakhibogna kaisei mae kolho, God neke fatedi naikno te gnafare ne cheke ka mare mala au ka glehe. Eghuteuna jateula tuana, ka nogna puhi te doglo kaisei mae, God neke eni kaisei nabrou ranghidi naikno te gnafare mala doglo nei hatani eghu thofno nakarha te tutuani na.

¹⁹ Tifa na mae Adam neke huhughuni chekegna God na. Naugna tuana, naikno te gnafare ne kafe leghuni mana ne tapla jafra ka puhi nakhibo. Ke leghu na, mae Jisas ne leghuni chekegna God na, eghuteuna naikno te gnafa te leghuni mana re ginauna kafe doglo ka tathagna God na.

²⁰ God neke tusu mei ka mae Moses u vetula na mala thofno laseni naiknore nodi najafra biꞌo na. Kate edi kmana najafra naiknore, nogna khokofakasai God na biꞌo ne salaꞌui ranghidi naiknore.

²¹ Eghume, neuba ne au nogna nolaghi nakhibo tifa na te mala falehedi naiknore, gognaro na nogna khokofakasai God na au nolaghi biꞌo te mala au doglo tahati ka tathagna thegna na, nei mala hatini u karha fei tifa na ka nogna gloku noda Lord Jisas Kraes.