Letas Teke Riso Tei Mae Pol Ka Khiloau Rom 4 - Buka Blahi Ka Cheke Holo

Nogna fatutuani mae Ebraham

¹ Unha te laseni tahati eigna fatutuani kate filoni tahati nakarhagna mae kuꞌeda Ebraham tifa ia?

² Ba, God neke toghoni mae Ebraham mala doglo mana ke ulugna eidi gloku te keli teke edi mana re? Jame teuna mana au gaoghathogna te mala fahaehaghe na! Theo, mana theome tangomana te cheke fahaehaghe ke ulugna God na.

³ Naugna u grioriso te blahi na cheke eghu, “Mae Ebraham neke fatutuani ni God. Naugna igne God ne cheke eghu, ‘Mae Ebraham gne kaisei mae doglo fara ke ulugu iara.’ ”

⁴ Mae ihei te loku fakeli na, mana hata nogna taba, nogna taba mana igne theome jateula kaisei namha eghu. Nu mana hata taba eigna nogna gloku na.

⁵ Mae te theome ronuni nogna gloku te keli nu fatutuani ni God mae ihei tangomana te toghoni ihei te diꞌa te mala doglo ke ulugna God na, God ginauna toghoni mana. Eigna God ginauna filo glanini mana jateula kaisei mae te doglo eghu kate fatutuani ni mana na.

⁶ Mae King Devet jaola neke chekeni igne. Mana neke chekeni eidi naikno te gleale'a nodi fara kate filodi God jateula naikno te doglo teu ke ulugna thegna na, naugna mare fatutuani ni mana theome naugna te loku fakeli mare na.

⁷ Mae King Devet neke cheke eghu, “Naikno te hata fadelei God najafradire, nei koko fahui nakhibodire teure, mare au gleale'a fara.

⁸ Mae ihei God te theome ghathodi nakhibognare, mana au gleale'a fara.”

⁹ Ba, puhi te mala au gleale'a ke ulugna God igne maladi mae Jiu kolho? Theo. Mala dila iheire te theome mae Jiu. Tahati filonihi ka grioriso te blahi na ne cheke eghu, “Mae Ebraham na neke fatutuani ni God. Naugna igne God neke filo glanini mae Ebraham jateula kaisei mae te doglo.”

¹⁰ Niha God teke filo glanini mae Ebraham jateula kaisei mae te doglo teuna? Kani theome tohi fagaglana ngau mana, ba kate tohi fagaglanahi mana na? God neke filo glanini igne kani theome tohi fagaglana nga neku mae Ebraham.

¹¹ Kani theome tohi fagaglana nga teku na, mae Ebraham neke fatutuani ni God. Eghuteuna God filo glanini mae Ebraham jateula kaisei mae te doglo. Ke leghugna igne, mae Ebraham neke hata fagaglana gna tohi fagaglana jateula kaisei thotoghale eigna te mae doglo mana na. Naugna igne, mae Ebraham gne kafe ku'edi naikno te theome tohi fagaglana re, nu fatutuani ni God eghuteuna God ne filo glanidi jateula naikno te doglo.

¹² Eghuteuna mae Ebraham gne jaola kuꞌeda tahati mae Jiu te tohi fagaglana gre nei jaola te fatutuani ni God. Tutuani fara, tahati fatutuani ni God mala fadoglo ghita jateula mae kuꞌeda Ebraham teke fatutuani funu ka narane teke theome tohi fagaglana teku na.

Nogna nhaꞌa cheke God na maladi iheire te fatutuani

¹³ God nhaꞌa cheke ka mae Ebraham nei goro thugna na te mei ginau ke leghugna mana, u nauthoglu igne mala nodi mare. Nu God neke eni nhaꞌa cheke igne ka mae Ebraham theome eigna te eni mana unha te chekeni ka nogna vetula mae Moses na. Theo. Naugna mae Ebraham gne neke fatutuani ni God, God ne filo glanini mana jateula kaisei mae te doglo.

¹⁴ Jame tusu lao God u nhaꞌa cheke igne ka naikno te leghuni unha te chekeni vetula na kolho meuna, gaoghathogna na fatutuani ni God igne glepo theo nafugna kolho. Eghuteuna nhaꞌa cheke igne jaola glepo theo nafugna kolho.

¹⁵ Tutuani nogna vetula mae Moses na ne cheke eghu, “God ginauna paradi naikno te theome leghuni u vetula na.” Nu jame te theo kaisei vetula na, naiknore ginauna jaola theome huhughuni vetula na.

¹⁶ Eghume naiknore hata nogna nhaꞌa cheke God na ka nodi fatutuani kolho. God neke eni u nhaꞌa cheke igne mala horoghoto ka nogna khokofakasai na. U nhaꞌa cheke igne theome maladi kolho naikno te leghuni nogna vetula mae Moses na. Nu jaola nodi naikno te gnafa te fatutuani ni God na jateula mae Ebraham eghu. Naugna mana ngala mae kuꞌeda tahati te gnafa na.

¹⁷ Jateula te chekeni ka grioriso te blahi na, “Iara vahi nigho mala ku'edi vike te kmanare.” Eghume te laseni tahati na mae Ebraham gne thofno mae kuꞌeda tahati te fatutuani ni God. Tutuani fara, God na au nolaghi te mala tusu lao karha ka iheire tela lehehi nei au nolaghi te mala vavuha glepo te theome vavuha nga teu.

¹⁸ Neuba mae Ebraham ghe Sera ne naikno biꞌohi ne theome naba te au thudi na, God neke vahini mana mala ku'edi vike te kmanare. God neke cheke eghu ka mae Ebraham, “Thumu iagho re ginauna kmana fara jateula nathunu ka maloa na are eghu.” Glepo igne ninhigrana fara ka gaoghathogna na, nu mae Ebraham ne fatutuani ni fabrahu chekegna God na.

¹⁹ Ka narane tuana mae Ebraham namo thokeni kaisei gobi finogha, theome naba te au sua na naugna thinigna mana na la glaꞌe farahi jateu tela lehehi eghu. Eghuteuna Sera na ne khara jaola ne theome tangomana te au sua na. Nu neubane laseni mae Ebraham igne, mana theome nigra soru ka nogna fatutuani na.

²⁰ Kate ghathoni nogna nhaꞌa cheke God na, mana theome khoko nogna fatutuani na nei theome ghatho peapea eigna igne, nu nogna fatutuani mana na biꞌo fara. Eghuteuna mana cheke fakelini koba nogna nolaghi te biꞌo God na.

²¹ Naugna mae Ebraham thofno laseni ngala God te theome ghatho ihoni nogna nhaꞌa cheke na.

²² Eghuteuna ka nogna fatutuani mae Ebraham na, mare ne rioriso eghu ka buka te blahi na, “God filoni mana jateula kaisei mae te doglo eghu.”

²³ Cheke te, “God filoni mae Ebraham jateula kaisei mae te doglo teu igne,” theome cheke eigna mae Ebraham kolho.

²⁴ Theo, jaola cheke eida tahati naikno te fatutuani ni God te au mei ke leghugna mana re. Tutuani fara, God na au nolaghi neke fakarha fapuloni noda Lord Jisas Kraes kau glehe. Tahati fatutuani ni mana, eghuteuna mana ginauna jaola filo ghita jateula naikno te doglo eghu.

²⁵ God neke snakreni noda Lord Jisas mala lehe eidi nakhiboda. Eghuteuna God fakarha fapuloni mana kau glehe mala tangomana tahati te au doglo ka tathagna God na.