Letas Teke Riso Tei Mae Pol Ka Khiloau Rom 3 - Buka Blahi Ka Cheke Holo

¹ Keha naiknore nomhinihi kate cheke eghu iara igne, “U tohi fagaglana gne theome mala fadoglo ghita ke ulugna God.” Eghume, jame mare na cheke eghu, “Ba, glepo keli fara site hata tahati nangha Jiu gnea? Ba theo kaisei gaoghathogna kolho? Jaola, u puhi tohi fagaglana igne glepo tutuani mala togho ghita ba theo?”

² Uve, puhidi mae Jiure keli fara, naugna glepo mala togho ghita ka thua nafnata puhi fateo. Glepo te ulu na igne: te laseni naikno te gnafare, chekegna God na neke tusu lao ka khamedi mae kuꞌeda tahati mae Jiura.

³ Eghuteuna naikno Jiure neke eni kaisei nhaꞌa cheke ka God mala leghuni fabrahu teke eni mana ranghidi mare igne. Nu kmana naikno theome leghuni kolho u nhaꞌa cheke tuana. Ba, gaoghatho tuana mala jaola mana theome leghuni u nhaꞌa cheke teke eni mana ka mae Ebraham te mala fablahini vikegna mana na?

⁴ Theo fara. Neubane chaghi naiknore, God ginauna tutuani fabrahu ka unha te chekedi mana re, jateu te chekeni ka grioriso te blahi na, “God, te chekeni iagho kate tapla jafra ghehati ka nakhibo na, ghehati laseni nou cheke iagho na thofno doglo fara. Eghuteuna kate ghaoghatho mala fate nigho teuna, naiknore ginauna filo glani nigho te doglo fabrahu iagho na.”

⁵ Keha naiknore cheke eghu, “Kate eni tahati puhi te diꞌa na, tahati falalase ranghidi naiknore puhigna God te doglo fara. Eghume tahati laseni God te theome doglo na naugna mana ne para ghita kate leghuni puhi te diꞌa na!” Keha naiknore ne cheke eghu agne kate leghuni kolho mare gaoghathogna naikno na.

⁶ Nu igne theome tutuani. Naugna jame te theome doglo God na, faꞌunha eghu mana fatedi naikno te gnafa ka nauthoglu gne?

⁷ Jame keha naiknore cheke eghu, “Neuba tahati ne theome fatutuani ni nogna cheke mana na ba theome eni unha te chekeni mana na, tahati thofno laseni God te tajini nogna nhaꞌa cheke te mala fablahi ghita na. Eghume kate eni nakhibo na, tahati tusu ranghidi naiknore gaoghatho te mala cheke fakelini God nei chekeni God na keli fara naugna mana ne tajini nogna nhaꞌa cheke na.” Ba, igne tutuani? Theo fara! Nu jame neuba keha naiknore ne leghuni gaoghatho tuana ba cheke eghu ka God, “Naugna unha iagho ne para ghami ghehati eidi nakhibomi gre? Eigna ghehati laseni puhimu iagho na thofno tutuani fara!”

⁸ U nafnata cheke tuana jateula cheke igne eghu, “Tore, tahati na eni fabrahu puhi te diꞌa na. Kate eni tahati tuana, kmana puhi te keli na thakle mei funu ka God.” Nu nafnata cheke tuana thofno diꞌa fara. Nu neuba, keha naiknore cheke fadiꞌa ghami ghehati nei chekedi ka ghehati nafnata cheke igre. Te keli na God ginauna fatedi naikno te chekedi nafnata cheke igre.

Theo kaisei naikno te doglo na

⁹ Ba, tahati mae Jiu gre doglo fara ke uludi keha tothoghei naikno gre ka tathagna God na? Theo fara! Tahati neke chekenihi God ginauna fatedi naikno te gnafare, naugna tahati naikno Jiu nei iheire te theome Jiu teu gre, kafe leghuni koba u puhigna nakhibo na.

¹⁰ Eigna tuana mare cheke eghu ka grioriso te blahi na, “Tutuani fara, jare na theo kaisei naikno kolho te doglo na.

¹¹ Jare na theo kaisei naikno te thofno laseni God na, ba toreni God te mala toghoni na.

¹² Naikno te gnafa te tei kokoni nabrou te doglo na edi glepo te jafra re. Tutuani, jare na theo kaisei naikno te eni kaisei glepo te keli na.”

¹³ “Unha te chekeni mare na, naiknore nabadi na mala lehe.” “Naugna mare cheke chaichaghi koba nei chekedire jateula mogo neu ne goigonidi naiknore.”

¹⁴ “Foflodire fodu ka cheke te diꞌa te jifla mei kate diꞌa tadi te fadiꞌa nagnafadi naiknore.”

¹⁵ “Mare ghosei ne tei falehedi naiknore,

¹⁶ eghuteuna kate tei ka namono te gnafa aheva te tei na, mare ne lalamadi namonore nei jaola fadiꞌadi naiknore.

¹⁷ Mare theome laseni puhigna pharikeli na,”

¹⁸ “eghuteuna mare theome ghatho tahuni God.”

¹⁹ Tahati lasenihi, naikno te gnafa te au ke parigna nogna vetula God na mala leghuni unha te chekeni ka nogna vetula God na. Eghume theo kaisei naikno tangomana te chekeni ne theo nakhibogna teuna, nu God ginauna fatedi naikno te gnafa ka nauthoglu igne.

²⁰ Theo kaisei naikno te doglo ka tathagna God na, jame te leghuni kolho mana vetula na. Naugna vetula na mala falalase kolho nakhibodare.

Mala au doglo ke ulugna God

²¹ Nu gognaro na God la kulu falalasehi nabrou te mala doglo tahati ke ulugna thegna na. Nogna vetula mae Moses nei nodi cheke hatimare mae profet mare cheke eigna nabrou igne. Nu mare theome chekeni tahati doglo ke ulugna God kate leghuni u nogna vetula mae Moses! Theo kolho.

²² Igne u nabrou te chekeni iara na. Naikno te gnafa te fatutuani ni mae Jisas Kraes re, God au kaisei nabrou te mala fadoglodi ke ulugna thegna. God theome edi phei nabrou, kaisei maladi mae Jiu nei kehana maladi mae te theome Jiu.

²³ Theo. Naugna naikno te gnafa ka nauthoglu igne kafe tapla jafra ka nakhibo. Eghume mare kafe au khaba ka God mae ihei te doglo fabrahu.

²⁴ Nu God na namha ne eni kaisei nabrou te mala doglo tahati na. Eghuteuna mana neke eni igne ka nogna khokofakasai na neke kuru meini mae Jisas Kraes mala hata fasnagladi ka nakhibo.

^25-26 God neke kuru meini mana mala lehe jateula kaisei fafara. Tutuani, dadara ka glehegna na mala hata fadeleidi nakhibodi naikno te gnafa te fatutuani ni mae Jisas. God neke eni igne mala laseni tahati te eni mana unha te doglo na. Naugna tifa na God neke sasaꞌani te ofo na, eghuteuna mana neke theome ghosei paradi naiknore eigna nakhibodire. Nu gognaro na God jaola falalase ranghi ghita mana te eni unha te doglo na, naugna mana neke snakreni mae Jisas mala lehe. Tutuani, mana neke eni igne mala falalase ranghidi iheire te fatutuani ni mae Jisas kaisei nabrou mala au doglo ke ulugna thegna.

²⁷ Eghume jateula tuana eghu, te cheke fahaehagheni tahati ne doglo ke ulugna God teuna. Ba naugna te leghuni tahati nogna vetula mae Moses na? Theo! Kaisei glepo te cheke fahaehagheni tahati na naugna tahati fatutuani ni Kraes, theome eigna te leghuni tahati nogna vetula mae Moses na.

²⁸ Tahati lasenihi God na fadogli ghita ke ulugna thegna, naugna tahati ne fatutuani, theome eigna te leghuni tahati nogna vetula mae Moses na.

²⁹ Ba, God na nodi God mae Jiu kolho? Theo! Mana jaola nodi God iheire te theome Jiu,

³⁰ naugna God na kaisei ngala. Eghuteuna mana ginauna kafe toghodi gnafa iheire te fatutuani ni Kraes, neubane mae Jiu ba theome Jiu, mala doglo ke ulugna mana.

³¹ Nu kate nomhini ghotilo cheke igne, thosei cheke eghu ghotilo, “Naugna tahati ne fatutuani ni mae Jisas, tahati na theome leghuni u vetula na. Naugna ka puhi fatutuani gne, puhi vetula gne ginauna hui.” Theo. Vetula na kaisei glepo biꞌo fara. Tuani, kate fatutuani ni mae Jisas na tahati thofno leghuni gaoghathogna nogna vetula mae Moses na.