Letas Teke Riso Tei Mae Pol Ka Khiloau Rom 2 - Buka Blahi Ka Cheke Holo

God ginauna fatedi naiknore

¹ Ghotilo iheire te lase fate naiknora, ghotilo theome tangomana te chekeni kaisei glepo na. Kate fatedi ghotilo keha naiknore, ghotilo cheke fapari ghami themi kolho, naugna ghotilo jaola edila glepo te diꞌa te edi mare igre.

² Tahati laseni God na doglo fara kate fatedi naikno te edi koba nafnata glepo te diꞌa igre.

³ Nu ghotilo edi koba la glepo te fatedi ghotilo keha naikno gre! Ba, gaoghathomi na theome fate ghami God ginauna neu si ghotilo ia? Theo! God ginauna fate ghami!

⁴ Jau ghotilo ghatho faꞌikoini kolho puhigna God na, eigna mana au kmu fara nei theome faghose diꞌatagna, nu mana ofou kolho. Ba, ghotilo theome filo glanini kolho God te au kmu fara na, naugna mana magnahaghei ghami ghotilo te mala tughu nagnafa na eghu sia?

⁵ Nu ghotilo patugama fara nei theome magnahaghei tughu nagnafa. Eghume u fate ginauna biꞌo fara ke klignami ghotilo. Eghuteuna fate igne ginauna thoke mei ka ghotilo ka narane God nate falalase diꞌatagna na, nei puhigna te doglo na eghu mala fatedi naikno te gnafare.

⁶ Naugna God ginauna kafe tabadi ba fatedi eghu naiknore ka unha teke edihi mare re.

⁷ Iheire ngala te edi koba gloku te keli, nei iheire te magnahagheni God te fafnaknoni nanghadi, nei ghatho tahudi, nei toghodi mala theome lehe tifa te tifa. Igre ngala God nate tusu ranghidi u thofno karha tutuani te theo ka huigna.

⁸ Nu iheire te ghathodi thedi kolho re, nei theome magnahagheni unha te thofno tutuani na, nu leghudi kolho puhi te diꞌare teuna, God ginauna diꞌatagna fara nei mana ginauna fatedi mare.

⁹ Naikno te gnafa te edi koba glepo te diꞌare, glepo diꞌa nei hoholo eghu na thokedi mare ginauna. Tutuani fara, mare ginauna kabru nei au papara eghu. Glepo igne na kulu thoke mei ka naikno Jiu, eghuteuna ginauna jaola thoke mei ka iheire te theome Jiu.

¹⁰ Nu naikno te gnafa te edi koba glepo te kelire, God ginauna fafnaknodi nanghadire nei ghatho tahudi nei tusu ranghidi u pharikeli. Igne na kulu thoke mei ka naikno Jiu, eghuteuna ginauna jaola thoke mei ka iheire te theome Jiu.

¹¹ God tangomana te eni igne ka naiknore, naugna naikno te gnafare kaisei nanaba ngala ka God.

¹² Naikno Jiu te hata nogna vetula mae Moses na, nu tapla jafra ka nakhibo teuna, vetula tuana ginauna fatedi mare. Aonu naikno te theome Jiu te theome hata nogna vetula mae Moses na. Kate tapla jafra naikno igre ka nakhibo na, God na fatedi mare neuba mare ne theome hata u vetula na.

¹³ Iheire te fiti fanomho kolho ka vetula na, mare theome doglo ke ulugna God, nu iheire te leghuni unha te chekeni ka vetula na, God ginauna fadoglodi ke ulugna.

¹⁴ Iheire te theome Jiu, theome hata nogna vetula mae Moses. Nu kate leghudi kolho mare nagnafadi thedire, eghuteuna jaola eni unha te chekeni ka vetula na teuna, igne glola fara te au nogna vetula God na ka nagnafadire, neuba mare ne theome laseni u nogna vetula mae Moses na.

¹⁵ Tutuani, mare tathakle kaisei vetula na au ka nagnafadire, eigna mare laseni unha te doglo na nei unha te jafra na, jateula te chekeni ka vetula na ia eghu. Eghuteuna mare jaola tathakle igne ka puhi te haimini mare eigna te doglo nei jafra. Keha fata gaoghathodire cheke ranghidi najafra te eni mare na. Eghuteuna keha fata gaoghathodire cheke ranghidi te doglo te eni mare na.

¹⁶ God ginauna tusu lao nolaghi ka mae Jisas Kraes mala fatedi naikno te gnafare. Mana ginauna fatedi, kehare na fate fadoglodi nei kehare mala fate falehedi. Igne ginauna thoke mei ka narane God nate fatedi gobigna lepo te poru teku ke lamnadi naiknore. Eghuteuna igne leghuni u Nonomho te Keli te toutonuni iara gne.

Nodi vetula mae Jiu

¹⁷ Gognarona eimi ghotilo mae Jiu. Ghotilo fatutuani God ginauna fakarhi ghami, naugna ghotilo leghuni fara nogna vetula mae Moses na. Eghuteuna ghotilo fahaehaghe, naugna ghotilo nogna naikno God.

¹⁸ Ghotilo laseni gaoghathogna God na, eghuteuna ghotilo tangomana te vahidi unha glepo te famane doglore nei unha te theome doglore, naugna u vetula na cheke ranghi ghami ghotilo.

¹⁹ Ghotilo thofno laseni igne, eigna ghotilo tangomana te falalase ka naiknore u nabrou te mala tei thoke ka God na, jateula mae ihei te batuni naikno te dofu eghu. Eghuteuna ghotilo mala jateu kaisei juta eghu ka iheire te au teu kate romno.

²⁰ Eghuteuna ghotilo thofno ghathoni igne, eigna ghotilo nodi mae velepuhi iheire te jafra gaoghathodi nei iheire te iho. Naugna ghotilo la hatahi nogna vetula mae Moses na. Eghume, unha te chekeni ghotilo na, ghotilo falalase ka keha naiknore eigna teke hata glalase fateote'o ghotilo na, nei cheke te tutuani fateote'o kau vetula na.

²¹ Ghotilo farirhiudi keha naiknore, naugna unha ne theome farirhiu ghami themi?! Ghotilo cheke ka naiknore mala thosei blau, nu ghotilo themi na blau la ngala.

²² Ghotilo cheke ka mare mala thosei tolaghi pedo, nu ghotilo themi na tolaghi pedo la ngala. Ghotilo tiromidi fara mumujure, nu ghotilo blau la ngala ke lamnadi nodi Sugablahi mumujure.

²³ Ghotilo cheke fahaehaghe ghami fara eigna nogna vetula God te au ka ghotilo na, nu ghotilo lalamani nanghagna God na kate tiromi leghuni u vetula na.

²⁴ Naugna eimi ghotilo mae Jiu, grioriso te blahi na cheke eghu, “Iheire te theome naikno Jiure, mare na cheke faparini nanghagna God na.”

²⁵ Jame te leghuni ghotilo unha te chekeni ka vetula na igre, nomi puhi ghotilo te tohi fagaglana te mala laseni te nogna naikno God na thofno au gaoghatho te keli tagna. Nu jame te huhughuni ghotilo u vetula na, nafnata puhi te tohi fagaglana igne theo kaisei gaoghatho te keli kolho tagna.

²⁶ Naikno te theome Jiure mare theome tohi fagaglana. Nu te leghuni mare unha te chekeni ka vetula na, God ginauna ghatho tahudi mare, eigna mare la tohi fagaglana hi kau gaoghatho te keli.

²⁷ Ka puhi igne God la fate ghamihi ghotilo. Naugna ghotilo ne huhughuni fabrahu nogna vetula na, neubane hatahi ghotilo nogna vetula mae Moses na ba tohi fagaglana hi ghotilo. Nu ihei te theome mae Jiu te leghuni unha te chekeni ka vetula na, neuba mana ne theome thofno tohi fagaglana fei thini, God ghatho tahuni mana.

²⁸ Mae te Jiu ka nangha kolho na, mana theome thofno mae Jiu ba nogna God. Eghuteuna puhi tohi fagaglana na theome glepo fei thini kolho.

²⁹ Nu God fadoglonihi nagnafagna mae ihei te thofno Jiu na ka nogna nolaghi mae Tharunga te Blahi. Naugna thofno gaoghathogna u tohi fagaglana na la horoghotohi ka nakarhagna naikno na kate leghuni mae Tharunga te Blahi na, theome kate leghuni mana u vetula na. Eghuteuna God tangomana te ghatho tahuni nafnata mae igne, neuba keha naiknore ne theome tangomana te ghatho tahuni mana na.