Letas Teke Riso Tei Mae Pol Ka Khiloau Rom 16 - Buka Blahi Ka Cheke Holo

Cheke fakeli

¹ Iara magnahaghei te chekeni ka ghotilo eigna greghada Febi kaisei thau keli fara. Naꞌa loku mala toghodi naikno khiloau ka namono Kenkria.

² Iara tore ghami ghotilo te mala toghoni naꞌa ka puhigna khiloau. Eghuteuna jame te kmo'e naꞌa ka unha glepo na, ghotilo mala toghoni naꞌa, naugna naꞌa la toghodihi kmana naikno nei jaola togho ghau iara.

³ Ghotilo kubaedi Prisila ghe mae Akuila, eigna repa neke loku balugu iara malagna mae Jisas Kraes.

⁴ Repa theome mhaghuni glehe kate loku heta mala togho ghau iara na, eghuteuna iara cheke fakelidi repa. Eghuteuna nodi khiloau hatimare mae te theome Jiu jaola cheke fakelidi repa.

⁵ Iara jaola magnahaghei kubaedi naikno khiloau te salo fodu ka sugadi repa na. Ghotilo kubaeni thofno kheragu iara mae Epaeneta, mana mae ulu lahu te leghuni Kraes ka Provins Esia.

⁶ Ghotilo kubaeni Meri, naꞌa loku heta te mala togho ghami ghotilo na.

⁷ Eghuteuna ghotilo kubaedi mae Adronika ghe mae Junia, eigna phiamare mae Jiu, jateula iara eghu, eghuteuna phiamare neke au balugu iara ka suga sosolo. Hatimare mae khuru filo faꞌuludi phiamare ke lamnadi mae khuru, eghuteuna phiamare neke kulu fatutuani ni Kraes ke ulugu iara.

⁸ Ghotilo kubaeni mae Abliata, mae kheragu keli iara, mana jaola kaisei mae nogna Lord.

⁹ Eghuteuna ghotilo kubaeni mae Abana, mana kaisei mae nogna gloku Kraes baluda tahati. Eghuteuna ghotilo jaola kubaeni mae kheragu keli iara mae Staki.

¹⁰ Eghuteuna ghotilo kubaeni mae Apeli. Kate fariuriuni mare na, mana falasenihi te thofno leghuni Kraes na. Eghuteuna ghotilo kubaeni tharaknagna mae Aristobula.

¹¹ Eghuteuna ghotilo kubaeni mae Herodion, mana mae Jiu jateula iara eghu. Eghuteuna ghotilo kubaedi naikno khiloau ka tharaknagna mae Nasisa.

¹² Ghotilo kubaedi Traefina ghe Traefosa eigna repa loku heta ranghini Lord. Eghuteuna ghotilo kubaeni kheragu iara Pesisi, eigna naꞌa kaisei gaꞌase te loku heta fara ranghini Lord.

¹³ Eghuteuna ghotilo kubaeni mae Rufas, eigna mana kaisei mae keli fara mala loku ranghini Lord. Eghuteuna kubaeni idogna mana te taji ghau jateula thugna teu.

¹⁴ Eghuteuna ghotilo kubaedi mae Asigrita nei mae Fligon nei mae Hemis nei mae Patroba nei mae Hemasi nei keha naikno khiloau te au baludi.

¹⁵ Ghotilo kubaeni mae Filoga balugna Julia nei mae Neria balu greghagna nei mae Oliba nei nogna naikno God te gnafa te au baludi.

¹⁶ Kubaedi kherada ka namono Rom balu namha. Nogna khiloau te gnafa Kraes re kubae ghami ghotilo.

Nogna cheke leghu lahu mae Pol

¹⁷ Kheraguro, iara cheke heta ka ghotilo mala fiofilo ghami ka iheire te magnahaghei fotani u khiloau gne. Mare tangomana te goigonidi nomi fatutuani ghotilo re baludi keha glepo te jafra ka farirhiu tela nomhidihi ghotilo ra. Thosei fanomho ka mare.

¹⁸ Nafnata naikno igre theome loku ranghini Kraes noda Lord, nu mare leghudi kolho unha te magnahaghei thedire. Mare lase cheke famaemahe nei lase chaichaghidi iheire te theome raꞌe filo glanidi puhi te diꞌare.

¹⁹ Naikno te gnafare nomhinihi eigna te kegra heta ghotilo ka nomi fatutuani na. Iara gleale'a fara ka ghotilo eigna igne. Nu iara magnahaghe ghami ghotilo te mala thofno lase fakelidi mala edi glepo te kelire, nei iara magnahaghe ghami ghotilo te mala thosei ghathodi mala edi kolho glepo te diꞌare.

²⁰ Ginauna theome raugha, God mae ihei te tusu lao pharikeli ka nogna naiknore ginauna togho ghami ghotilo mala tapla soruni mae Satan. Iara tarai ka noda Lord Jisas Kraes mala falalase ranghi ghami khokofakasai na tifa tifa.

²¹ Timoti mae ihei te loku balugu iara gne, kubae ghami ghotilo. Eghuteuna mae Lusias nei mae Jason nei mae Sosipata mae te gnafa igre hatimare mae Jiu jateula iara eghu, mare jaola kubae ghami ghotilo.

²² Iara mae Tetia te riso soru ranghini mae Pol letas igne, iara kubae ghami ghotilo ka nanghagna Jisas Kraes.

²³ Mae Gaeasi jaola kubae ghami ghotilo. Iara au ka sugagna mana gognaro na. Khiloau na salo fodu koba ka sugagna mana. Erastus mae mala reireghi sileni gna namono biꞌo Korin gne, nei mae kherada Kuotasi phiamare kubae ghami ghotilo.

Tarai ka God

^24-25 Tahati cheke fakelini God! God mae ihei te tangomana te togho ghami ghotilo te mala kegra heta ka nomi fatutuani na, kate leghuni u Nonomho te Keli te toutonu iara eigna mae Jisas Kraes. Ka u Nonomho te Keli igne, God gognaro na falalase ranghi ghita gaoghathogna teke poru tifa ia.

²⁶ Tutuani, God mae ihei karha te tifa na ne falalase ranghi ghita u Nonomho te Keli igne ka unha teke riorisohi hatimare mae profet ra. Eghuteuna God cheke ranghi ghita mala toutonuni tahati u Nonomho te Keli igne, mala nu naikno ka namono te gnafa ka nauthoglu gne tangomana te fatutuani ni God nei leghuni mana.

²⁷ Ka nanghagna mae Jisas Kraes, tahati cheke fakelini tifa tifa kaisei God mae ihei ngala te lalase fara. Amen.