Letas Teke Riso Tei Mae Pol Ka Khiloau Rom 15 - Buka Blahi Ka Cheke Holo

Leghuni puhigna Kraes

¹ Te keli na tahati mala heta ka noda fatutuani na mala toghodi iheire te theome lase fakelini unha lepo God te snakredi mare te mala eni na. Tahati mala toghodi ka unha te nanga nodini mare na, eghuteuna tahati theome mala eni kolho unha te magnahagheni theda na.

² Tutuani, tahati te gnafa na mala ghathodi kherada fofodu ka khiloau gne, eghuteuna mala edi glepo te keli ranghidi te magnahaghe tahati te eni. Kate eni tahati igne na, nodi fatutuani ginauna heta fara.

³ Naugna Kraes na neke theome edi unha te magnahaghedi thegna re. Jateula te chekeni ka grioriso te blahi, “God, u cheke te cheke fadiꞌa nigho iagho ra, cheke fadiꞌa ghau iara.”

⁴ Gobigna lepo teke rioriso soru mare ka buka blahi na tifa igre, mare neke rioriso mala farirhiu ghita tahati. Eghuteuna kate iu'ijudi grioriso igre, tahati thofno laseni God na eni ranghi ghita unha teke nhaꞌa cheke ranghi ghita na. Eghume gaoghathoda na heta fara nei tahati tangomana te ofoni God te mala togho ghita.

⁵ Eghuteuna puhi te mala au heta ka gaoghatho nei mala ofoni teuna, jifla mei ka God ngala. Iara tore ka God mala togho ghami mala au kaisei gaoghatho ngala farihoteimi themi, naugna ghotilo te gnafa na kafe leghuni puhigna Jisas Kraes.

⁶ Ka puhi igne, ghotilo te gnafa na ginauna mala kaisei nagnafa ngala mala kilo fnaknoni God Kmagna noda Lord Jisas Kraes.

Nonomho te Keli na maladi mae Jiu nei ihei te theome Jiu

⁷ Fari tothoghoi fari themi jateula Kraes teke togho ghami ghotilo ia eghu. Kate filoni ka ghotilo puhi igne, naiknore ginauna kilo fnaknoni God.

⁸ Te chekeni iara ka ghotilo na, Kraes neke eni nogna gloku na mala toghodi mae Jiu, mala farerheta nogna nhaꞌa cheke God teke eni mana ka mae ku'edi mae Jiure ne tutuani.

⁹ Jaola mana neke eni igne mala tangomana naikno te theome Jiure te kilo fnaknoni God eigna God neke kokhonidi mare. Jateula te chekeni mare ka grioriso te blahi na, “Eghume iara ginauna cheke fakeli nigho God ke lamnadi iheire te theome Jiura, iara ginauna koje ka nanghamu iagho.”

¹⁰ Eghuteuna jaola cheke eghu ka grioriso te blahi na, “Ghotilo iheire te theome Jiura, ghotilo tangomana te au gleale'a baludi nogna naikno God are.”

¹¹ Eghuteuna grioriso te blahi na jaola ne cheke eghu, “Ghotilo te gnafa naikno te theome Jiura, ghotilo mala cheke fakelini Lord. Ghotilo naikno ka namono te gnafara, ghotilo mala cheke fakelini mana ka khoje.”

¹² Eghuteuna mae profet Isaia ne cheke eghu, “Kaisei mae ka vikegna Jesi ginauna mei. Mana ginauna mei mala funei frunidi iheire te theome Jiu, eghuteuna mare ginauna rouronu ka mana mala toghodi.”

¹³ God mae ihei ngala te thofno togho ghita te mala hata unha mana teke nhaꞌa cheke ranghi ghita. Iara toreni God mala gleale'a biꞌo ghotilo nei tusu ranghi ghami pharikeli kate fatutuani ni mana na. Eghuteuna nogna nolaghi Tharunga te Blahi na ginauna faheta ghami mala rouronuni God fabrahu ghotilo te mala eni unha mana teke nhaꞌa chekeni.

Nogna gloku mae Pol

¹⁴ Kheraguro, iara thofno laseni eigna ghotilo edi fabrahu puhi te kelire, naugna ghotilo lasenihi puhigna God na nei tangomana te farirhiudi naiknore thofno chekegna God.

^15-16 Nu neuba ngau, iara frane te mala riso ari eidi keha glepo ka letas igne ka ghotilo mala ke ghatho fapulodi ghotilo glepo teke lasedihi ghotilo ra. Naugna God neke tusu mei khokofakasai igne ka iara mala kaisei nogna mae gloku Jisas Kraes mala toghodi naikno te theome Jiu. Iara loku ranghini God jateula kaisei mae te kegra fari hoteidi God ghe naikno kate toutonuni chekegna God na. Iara eni igne mala tangomana iheire te theome Jiure te mei ka God na eghuteuna mana ginauna hatadi mare jateula kaisei fafara, nei mare tangomana te blahi ka nogna nolaghi Tharunga te Blahi na.

¹⁷ Naugna iara kaisei balugna mae Jisas Kraes, iara tangomana te fahaehagheni nogu gloku ranghini God na.

¹⁸ Nu iara ginauna cheke thakleni kolho unha te eni Kraes ka iara na, ka puhi te batudi iheire te theome Jiu mala leghuni God. Mare leghuni God naugna ka unha te chekedi nei eni ranghidi teu iara re.

¹⁹ Mare ne leghuni God naugna mare neke filodi u fagaglana nei kofubobhoi balu nolaghi nogna Tharunga te Blahi. Iara toutonuni Nonomho te Keli na funu Jerusalem, iko tongana heva heva ghilei posa Ilirikam. Aonu iara ne toutonu fahui Nonomho te Keli eigna mae Jisas Kraes.

²⁰ Iara magnahagheni fara te toutonuni fabrahu u Nonomho te Keli igne ka namono aheva naiknore te theome nomhi nga teu Kraes. Iara magnahaghei eni igne naugna iara theome magnahaghei te loku ranghini God ka namono aheva tela kulu lokuhi keha mae jare ka khiloau.

²¹ Nu te chekeni ka grioriso te blahi na, “Iheire te theo kaisei naikno te toutonu eigna mana teu ranghidire, mare ginauna filodi nogna gloku mana re. Iheire te theome nomhi teu Nonomho te Keli na, mare ginauna laseni fara.”

²² Naugna iara magnahaghei te toutonu u Nonomho te Keli na ka namono aheva te theo khiloau, kmana fata gloku gre fanogra ghau iara te mala ari ka ghotilo na.

Mae Pol ghaoghatho mala tei Rom

^23-24 Nu gognaro na gloku te edi iara ka nohi igre la gnafahi. Iara ghaoghatho mala tei ka namono biꞌo Spen. Kate mei sala'u ka namonomi ghotilo re, iara magnahaghei te ari sigho ghami ghotilo. Naugna kmana finogha iara neke magnahaghei filo ghami. Eghuteuna kate ari te au fakeli iara katha vido kmoꞌei balumi ghotilo na, iara magnahaghe ghami ghotilo te togho ghau ka nogu theitei na.

²⁵ Neubane eghu iara magnahaghei mei sigho ghami, gognaro na iara na kulu tei Jerusalem mala hata tei keha sileni mala toghodi naikno khiloau jare.

²⁶ Naikno khiloau ka namono Masidonia nei Akaia keli tadi ka iara te tusu lao iara keha sileni mala toghodi naikno khiloau te kuma ka namono Jerusalem.

²⁷ Tutuani, mare thofno kaoni ka mae Jerusalem. Naugna hatimare mae ihei te theome Jiu neke kulu hatahi glepo te keli teke nhaꞌa cheke God ranghidi hatimare mae Jiu. Eghume te keli na hatimare mae te theome Jiure mala tusu lao glepo te keli malagna fei thini na ranghidi mae Jiu.

²⁸ Iara ginau tei Jerusalem mala tusu lao sileni teke salo maladi mare teku ra. Ke leghugna igne, iara na tei Spen, nu iara ginauna jaola sigho ghami kate ari sala'u ka ghotilo na.

²⁹ Iara laseni, kate ari ka ghotilo na, Kraes ginauna fablahi ghita gnafa.

³⁰ Kheraguro, naugna tahati kaisei balugna noda Lord Jisas Kraes nei Tharunga te Blahi togho ghita te mala fari namhai, iara thofno tore ghami mala kaisei balugu ka tharai nei toreni God mala togho ghau iara.

³¹ Ghotilo mala taraidi iheire te theome fatutuani ka namono Judia mala theome nenei ghau iara mare. Eghuteuna ghotilo taraidi nogna naikno God te au ka namono Jerusalem, mala tangomana mare te gleale'a ka sileni te hata te tei iara te mala toghodi mare na.

³² Eghuteuna jame te magnahagheni God na, iara ginauna ari filo ghami. Tutuani fara, iara ginauna gleale'a fara te filo ghami nei gnafa fakeli nogu balumi ghotilo.

³³ Iara toreni God mae ihei te tusu ranghi ghita pharikeli mala au balumi ghotilo gnafa. Amen.