Letas Teke Riso Tei Mae Pol Ka Khiloau Rom 14 - Buka Blahi Ka Cheke Holo

Thosei fateni ihei

¹ Ghotilo mala toghoni mae ihei te theome heta nogna fatutuani na, eghuteuna thosei magra balugna mana eidi nafnata glepo te theome kaisei gaoghatho ghotilo balugna mana re.

² Nogna fatutuani kaisei mae na snakreni mana mala ima thua nafnata ganore. Nu kehare ghatho peapea unha te keli ranghidi naikno khiloaure, mana theome ima nafnahi.

³ Mae ihei te lase ima thua nafnata gano na, thosei filo faparini mae ihei te theome lase ima nafnahi na. Eghuteuna mae ihei te theome lase ima nafnahi na, thosei filo faparini ihei te lase ima thua nafnata gano na. Naugna God na keli tagna ka mana.

⁴ Ba, iagho ihei sia mala fateni iagho nogna mae gloku keha funei na? Nogna funei thegna na jame te au nolaghi te mala chekeni te mala loku fakeli ba te loku fadiꞌa mana na. Nu mae gloku igne ginauna na eni fakeli fabrahu nogna gloku na, naugna Lord na toghoni mana ka unha te eni mana na.

⁵ Gaoghathodi keha naiknore kaisei narane na uludi fara keha narane re eghu, eghuteuna gaoghathodi keha naiknore narane te gnafare kaisei nanaba ngala eghu. Soasopai naikno na mala ghaoghatho fakelini igne ka nagnafagna na.

⁶ Mae ihei te ghathoni kaisei narane na ulu fara teuna, mana eni igne naugna mana ghatho tahuni Lord. Eghuteuna mae ihei te ima thua nafnata gano na, mana eni igne naugna mana ghatho tahuni Lord, eghuteuna mana jaola cheke fakelini God eigna gano tuana. Eghuteuna mae ihei te theome ima thua nafnata gano na, mana eni igne naugna mana ghatho tahuni Lord, nei jaola cheke fakelini God eigna gano tuana.

⁷ Theo kaisei ka tahati te karha ba lehe malagna thegna na.

⁸ Kate karha teu tahati na, tahati karha mala fafnaknoni Lord. Eghuteuna kate lehe tahati na, tahati jaola mala fafnaknoni Lord. Eghume neubane lehe ba karha tahati, tahati nogna Lord ngala.

⁹ Naugna Kraes neke lehe, eghuteuna ke karha fapulo, mala nodi Lord iheire te karha teu ba iheire tela lehehi.

¹⁰ Eghume, theo kaisei nolaghi te mala fateni thabusida ka khiloau gne. Ba, naugna unha sagho te filo faparini mana gnea? Tahati te gnafa na ginauna kegra ke ulugna God, eghuteuna God ginauna fate ghita tahati hui.

¹¹ Uve, te risoni ka grioriso te blahi na, Lord ne cheke eghu, “Naikno te gnafare ginauna mei tuturupuku ke ulugu iara, eghuteuna naikno te gnafare ginauna chekeni, iara God.” Cheke igre tutuani fara naugna Lord neke chekedihi.

¹² Eghume kheraguro, tahati te gnafa na ginauna mala cheke thakledi puhidare ka God.

Thosei batuni kheramu na ka nakhibo

¹³ Naugna igne funu gognaro na, tahati thosei fateni kherada fofodu na. Eghuteuna fiofilo ghami themi, thosei eni kaisei glepo te mala batuni kheramu fofodu na ka nakhibo.

¹⁴ Eigna iara kaisei balugna nogu Lord Jisas, iara thofno laseni te theo kaisei gano te ima tahati te mala tapla jafra ke ulugna Lord na. Nu jame ihei te ghathoni keha nafnata ganore te blahi te mala ima na teuna, nabagna na mana thosei ima gano tuana.

¹⁵ Jame kaisei kherami ka khiloau gne theome gleꞌani gano te ima ghotilo na, tuana gaoghathogna na ghotilo theome leghuni puhi mala fari namhai na. Kraes neke lehe mala fakarhini naikno tuana, eghume ghotilo mala theome neneini mana ka glepo te imani ghotilo na.

¹⁶ Jame te eni iagho glepo ne keli teu ka gaoghathomu iagho na nu batu fadiꞌani mae kheramu fofodu na teuna, iagho thosei eni glepo tuana. Naugna naiknore ginauna mala cheke fadiꞌadi puhimi ghotilo te keli te au ka gaoghathomire.

¹⁷ God na theome funei fruni ghita naugna te ima tahati keha nafnata gano ba koꞌu. Theo. Nu God na funei fruni ghita tahati kate eni unha te doglo na ke ulugna mana, nei au ka pharikeli, nei au gleale'a ka Tharunga te Blahi.

¹⁸ Ihei te leghuni Kraes kate edi nafnata puhi igre na, God ginauna gleale'a ka mana eghuteuna naiknore ginauna jaola gleale'a ka mana.

¹⁹ Eghume tahati mala thofno fariuriu edi unha te tangomana te mala togho ghita te gnafare mala au ka pharikeli nei mala heta ka fatutuani.

²⁰ Thosei snakredi gano te ima ghotilo re mala roꞌeni nogna gloku God na. Nafnata gano te gnafare, kafe keli mala ima ngala. Nu jafra jame te ima ghotilo gano te theome keli ka gaoghathodi keha naiknore nei fadiꞌani nodi fatutuani na.

²¹ Te keli na thosei ima nafnahi nei thosei koꞌu waen nei thosei eni kaisei glepo te tangomana te fadiꞌani nogna fatutuani kaisei kherami fofodu ka khiloau gne.

²² Nou fatutuani iagho eidi gano igre khogla farihoteimu iagho themu nei God eghu kolho. Eghuteuna ihei te eni unha te ghathoni mana ne doglo nei theome diꞌanagnafa ka igne teuna, mana ginauna gleale'a fara.

²³ Nu ihei te ghatho peapea eigna gano te ima mana na, mana jafra fara, naugna mana neke theome fatutuani ne doglo teuna. Eigna te theome raꞌe fatutuani ghotilo unha te eni te doglo ke ulugna God ba te theo na, tuana kaisei nakhibo ngala.