Letas Teke Riso Tei Mae Pol Ka Khiloau Rom 12 - Buka Blahi Ka Cheke Holo

Nakarha te magnahagheni God

¹ Eghume kheraguro, naugna God ne kokhoni ghami fara, iara tore ghami te mala lisa lao nakarhami are jateula kaisei fafara eghu ka God. Kaisei fafara te karha nei blahi te kelitagnani God. Igne thofno puhi te mala tufru soruni God ghotilo na.

² Thosei lisa lao ghami themi mala leghuni puhigna naikno te diꞌa te au ka nauthoglu igne, nu lisa lao ghami ka God mala tughu mana nakarhamire, kate tusu ari gaoghatho majaghani ka ghotilo na. Ka puhi igne ghotilo ginauna tangomana te filo glanini unha te magnahagheni God na. Eghuteuna eni glepo te keli nei te doglo fabrahu teuna, nei eni glepo te keli tagnadi God.

³ Naugna khokofakasai teke tusu mei God ka iara na nate chekeni iara ka ghotilo te gnafa na, thosei ghatho tahu ghami themi fara. Nu ghatho ghami themi ka puhi te nabami ghotilo leghuni nomi fatutuani teke tusu ranghi ghami God.

⁴ Tahati te gnafa na au kaisei thini ngala nei au kmana grerege, eghuteuna grerege igre au nodi soasopai nafnata gloku te mala edi re.

⁵ Jateula tuana eghu tahati, neubane kmana naikno tahati, tahati jateula kaisei thini eghu ngala, eigna tahati te gnafa na fatutuani ni mae Kraes. Naikno khiloau te gnafare kaisei grerege ka thini, eghuteuna grerege te gnafare salo fodu mala kaisei thini ngala.

⁶ Tahati te gnafa na God neke tusu ranghi ghita soasopai khokofakasai, eghume tahati mala loku ka soasopagna khokofakasai teke tusu ranghi ghita God igre. Jame te hata tahati u khokofakasai te mala toutonuni chekegna God jateu mae profet teuna, tahati toutonuni chekegna God na leghuni noda fatutuani na, neubane biꞌo ba ne ikoi kolho.

⁷ Jame te hata tahati u khokofakasai te mala toghodi naiknore, tahati mala toghodi naiknore. Jame te hata tahati u khokofakasai te mala farirhiu na, tahati mala farirhiu.

⁸ Jame te hata tahati u khokofakasai te mala fakeli nagnafadi naiknore, tahati mala eni tuana. Eghuteuna jame te hata tahati u khokofakasai te mala toghodi naiknore ka thua nafnata glepo na, tahati mala eni tuana ka puhi te keli. Jame te hata tahati u khokofakasai te mala batudi naiknore, tahati mala loku brana ranghidi. Eghuteuna jame te hata tahati u khokofakasai te mala kokhonidi nei keli ranghidi teu naiknore, tahati mala eni tuana balu gleale'a.

⁹ Thosei namha chaichaghi. Filo uchuni unha te diꞌa. Loku famaku ka nagnafami unha te keli.

¹⁰ Fari namhai jateula thabusigna eghu ka Kraes. Ghatho tahudi keha thabusigna ka khiloau gne ke tulaomi themi.

¹¹ Thosei thodo kate loku ranghini God na, nu taji fakeli ghami themi mala au heta fabrahu ka nomi fatutuani. Uve, loku ranghini Lord ka nagnafami fateo.

¹² Gleale'a fabrahu ka unha teke nhaꞌa chekeni God ka ghotilo na. Kate au papara na, au kmu. Tarai koba.

¹³ Tufa nodi naikno khiloau te theo nodi. Eghuteuna tajidi iheire te posa mei ka sugamire.

¹⁴ Ghotilo toreni God mala fablahidi iheire te nenei ghami. Tutuani, thosei toreni God mala paradi.

¹⁵ Ghotilo mala gleale'a baludi iheire te gleale'a, eghuteuna mala tanhi baludi iheire te tanhi.

¹⁶ Ghotilo mala au fodu ka pharikeli. Thosei fahaehaghe, nu fofodu ka iheire te au faparidi thedi. Eghuteuna thosei ne lalase farahi themi eghu.

¹⁷ Thosei tughu fapulo unha najafra teke eni ranghi ghami ihei na. Ghotilo eni ngala unha te keli ka tathadi naikno te gnafare.

¹⁸ Hati nhetami na fabrahu mala au ka pharikeli baludi naikno te gnafare.

¹⁹ Kheraguro, thosei foli fapulo unha najafra teke eni naiknore tami na, lisa lao ka God mala foli fapulodi jateula Lord te cheke ka grioriso te blahi ia eghu, “Iara ginauna foli fapulo ka mae iheire te tapla jafra eghuteuna iara ginauna paradi.”

²⁰ Eghuteuna u grioriso te blahi na jaola cheke eghu, “Jame te rofo nogna nou naoka na, iagho fei ghegna. Eghuteuna jame te rogna koꞌu na, iagho fakoꞌuni. Jame te eni iagho igne na, iagho ginauna famamajani fara mana mala ke tughu mana puhignare ka iagho.”

²¹ Thosei snakreni puhi te diꞌa na mala tapla fapari ghami, nu tapla faparini unha te diꞌa na kate eni unha te keli na.