Letas Teke Riso Tei Mae Pol Ka Khiloau Rom 11 - Buka Blahi Ka Cheke Holo

God ne kokhonini Israel

¹ Eghume iara nake fapea ghusnai. Ba, God na susukudi nogna naikno thegna re sia? Theo! Iara gne kaisei maegu Israel, eigna iara neke karha mei ka vikegna mae Ebraham nei ka vikegna mae Benjamin.

² God theome tangomana te susukudi nogna naikno teke kulu vavahi mana tifa re. Ghotilo lasenihi thoutonu eigna mae Elija ka grioriso te blahi ia, eigna mana neke susukudi naiknodi Israel re neke cheke faheta eghu ka God,

³ “Lord, mare la falehedi nou mae profet ra, eghuteuna mare paꞌe soruhi nou olta ra. Kaisei iara ngala te karha teu te mala pogho soru nigho na, eghuteuna mare jaola magnahaghei falehe ghau iara.”

⁴ Eghuteuna nogna cheke tughu God na ne cheke eghu, “Iara au ngau fitu thogha mae malagu thegu, naugna mare theome pogho soru ke ulugna mumuju Bel.”

⁵ Jateula tuana eghu, gognaro na keha naikno ghu kolho te au nga teure, iheire God teke kulu vahidi ka nogna khokofakasai na.

⁶ Mana neke theome vahidi eigna ka nodi gloku te keli, nu eigna nogna khokofakasai ranghidi kolho. Naugna jame vahidi mana ka nodi gloku te keli muna, nogna khokofakasai God na ginauna theo nafugna kolho.

⁷ Igne gaoghathogna naiknodi Israel re theome thafoni kolho nabrou te mala au doglo ka tathagna mana na, neuba mare ne fariuriu fara te mala hironi nabrou te mala au doglo na. Naugna God neke faninhigrana ranghidi te mala fanomho ka chekegna God. Nu keha naiknodi Israel ghu kolho God teke vahidi teke filo deni nabrou te doglo na.

⁸ Igne jateula te kulu cheke kau grioriso te blahi ia, “God ne faromno gaoghathodire mala theome ghaoghatho fakeli mare. Mei thoke gognaro gne, tathadire theome tangomana te fifilo fakeli, eghuteuna khulidire theome tangomana te fanomho na.”

⁹ Eghuteuna mae Devet jaola neke cheke eghu eidi nogna naokare, “God, iara magnahaghei nigho te sagudi mae igre, kate gnokro gleꞌa teu mare ka nodi gaghamure. Iara magnahaghei te faꞌukadi nei tapla faparidi eghu.

¹⁰ Faromno tathadire mala theome fifilo mare, eghuteuna paradi fabrahu kate fapoghodi iagho kau nhugru te au ka thagrudi are.”

¹¹ Eghume te ghusnani iara na, ba, kate uka mae Jiu gre, mare la uka fadiꞌa fabrahuhi sigrea? Theo! Nu God neke hata nodi najafra mae Israel gre mala hata mei karha ka iheire te theome Jiu mala goghotu mae Israel gre ka mare.

¹² Tutuani, ka nodi najafra mae Jiu gre God tusu mei kmana glepo te keli ka nauthoglu gne. Eghuteuna unha teke luvu ka mae Jiu gre God neke hata mei fablahi te keli ka iheire te theome Jiu. Eghume, kate pulo mei ka God te gnafa naiknodi Israel re, kmana glepo te keli fara tulao ginauna mei thoke ka tahati!

God fakarhidi iheire te theome Jiu

¹³ Gognaro na iara cheke ka ghotilo iheire te theome Jiu ra. Iara ghatho tahuni nogu gloku na, eigna God neke vahi ghau iara nei kuru ghau mala loku ka ghotilo iheire te theome Jiura.

¹⁴ Iara togho ghami naugna iara magnahaghedi mae kheragu Jiu gre te goghotu na mala tangomana keha ka mare te mei ka God te mala karha na.

¹⁵ Naugna kate figri fadelei God ka ghehati mae Jiu gre, keha naikno ka nauthoglu gne na tangomana teke kheragna God na. Ginauna jateula unha eghu kate keli tagna God ka mae Jiu gre? Mae Jiu gre ginauna jateula teke karha fapulo ka glehe eghu!

¹⁶ Jame te kulu fafara lao tahati katha vido bret ka God na, u bret thongana tuana la nogna God hila. Jame glathigna kaisei gaju na nogna God gregere ginauna jaola nogna God.

¹⁷ Ghathoni cheke naba igne. Mae Jiu gre jateula thofno gaju oliv eghu. Eghuteuna ghotilo mae iheire te theome Jiu gre jateula grege oliv nathua ra eghu. God la kulu kato kokohi keha grege ka thofno gaju oliv na mala salo fodu ghamihi mala kaisei ka thofno gaju oliv na. Eghume gognaro na ghotilo jaola snori nomihi ka fablahi te jifla mei ka hatimare mae Jiu.

¹⁸ Eghume thosei filo faparidi mae Jiu jateula grege tela kato kokohi teu igre. Naugna ghotilo grege neke salo fodu mei ke leghu theome naba te tusu lao karha ka glathigna gaju na. Nu glathi na naba te tusu ari karha ka ghotilo na.

¹⁹ Ghotilo ginauna cheke eghu, “Uve, God neke kato koko grege tuare mala au choghomi ghehati ka thofno gaju oliv na.”

²⁰ Tuana tutuani fara. Nu God neke kato koko grege tuare naugna mare ne theome fatutuani ni mae Jisas. Eghuteuna ghotilo mala kaisei vidogna thofno gaju oliv igne fabrahu, naugna ghotilo ne fatutuani. Ghotilo mala thosei fahaehaghe ghami eigna igne, nu fiofilo ghami eghu.

²¹ Naugna neuba mare ne thofno gregegna gaju oliv gne, God theome snakredi te kaisei balumi ghotilo na, naugna mare ne theome fatutuani. Ba, gaoghathogna na jame te theome fatutuani ghotilo na, God na snakre ghami mala au ghotilo ka thofno gaju na? Theo!

²² Ghathoni si ghotilo God na mae keli fara, nu mana tangomana te fate ghita la. Mana fatedi iheire te theome leghuni puhigna mana re, nu mana keli fara ka ghotilo, naugna ghotilo ne leghuni nogna puhi mana na. Nu jame te theome leghuni ghotilo igne na, mana ginauna jaola kato koko ghami ghotilo.

²³ Eghuteuna jame funu fatutuani mae Jiu gre meuna, God ginauna salo fodudi mala kaisei ka gaju oliv gne ka teke kulu au mare na. Naugna God na au nolaghi te mala ke salo fodu fapulodi mae Jiure mala kaisei ngala mare ka thofno gaju oliv na.

²⁴ God la salo fodu ghamihi ka thofno gaju oliv igne, neuba ghotilo ne jifla mei ka gaju oliv nathua kolho. Tutuani, ninhigrana fara grege gaju nathua na te salo fodu balugna thofno grege gaju na. Nu thofno bligi fara God te salo fodu fapulodi hatimare mae Jiu gre ka thofno gaju oliv, naugna mare jateula gregegna tutuani eghu thofno gaju oliv na.

God na kokhonidi naikno te gnafare

²⁵ Uve kheraguro, iara magnahaghe ghami te thofno laseni glepo biꞌo te poru igne, eigna glepo te poru igne ginauna togho ghami mala thosei fahaehaghe ghotilo. God ne fapatugamadi nagnafadi mae Jiu gre ghilei thokeni narane te mala ke pulo mei ka God hatimare mae iheire te theome Jiu teke vavahi mana gre.

²⁶ Eghuteuna ka nabrou tuana, God ginauna fakarhidi gnafa naiknodi Israel gre, jateula te chekeni ka grioriso te blahi na, “Mae fakarhai te mala fakarhidi naiknore ginauna jifla mei ka hatimare mae Jiu. Mana ginauna hata fadelei puhi te diꞌa te gnafa ka vikegna mae Jekop.

²⁷ Kate hata fadelei iara nakhibodire, iara na eni kaisei nhaꞌa cheke baludi mare.”

²⁸ Naugna mae Jiu gre mare tirodini u Nonomho te Keli na, mare nogna naoka God. Eghuteuna igne togho ghami ghotilo iheire te theome Jiura. Nu naugna nogna nhaꞌa cheke teke eni mana ka mae ku'edi mae Israel ra, God namhadi fara iheire mana teke vahidi.

²⁹ Naugna God na theome tangomana nate tughu nagnafagna ka mae Jiu, iheire mana teke vahidi nei fablahidi.

³⁰ Tifa na, ghotilo neke theome leghuni God, nu gognaro na God na kokhoni ghami ghotilo naugna hatimare mae Jiu gre tirodi leghuni mana.

³¹ Jateula tuana eghu, hatimare mae Jiu te theome leghuni God gognaro gre naugna God ne kokhoni ghami ghotilo. Nu igne ne eghu mala kokhonidiu mare God, jateula mana te kokhoni ghami ghotilo gne eghu.

³² Eigna God gne neke snakredi naikno te gnafare mala huhughu fabrahu ka mana mala tangomana mana te kokhonidi ke leghu na.

Cheke fakelini God

³³ Tutuani fara, God na keli fara ka naikno te gnafare! Nogna glalase mana na biꞌo fara nei gaoghathogna mana na krepa fara! Tahati theome tangomana te filo glanini gaoghathogna God na, tahati theome tangomana te ghatho thokedi puhigna mana re!

³⁴ Jateula te chekeni ka grioriso te blahi na, “Ihei gne te laseni gaoghathogna Lord na? Ihei gne te tangomana te farirhiuni mana na? Theo kaisei naikno.”

³⁵ “Theo kaisei naikno te tusu lao ka mana kaisei glepo te mala tusu fapulo mana tagna na.”

³⁶ Uve, God neke vuavuhadi gobigna lepore, eghuteuna gobigna lepore neke kegra ka nogna nolaghi mana, eghuteuna gobigna lepore nogna ngala mana. Tahati kilo fnaknoni God tifa tifa! Amen.