Letas Teke Riso Tei Mae Pol Ka Khiloau Rom 10 - Buka Blahi Ka Cheke Holo

¹ Kheraguro, iara thofno magnahagheni fara God te mala fakarhidi hui mae Jiu gre. Igne nogu tharai iara ka God na.

² Iara lasedi, mare thofno fariuriu fara te mala leghuni God na, nu mare theome raꞌe laseni puhi te doglo na neu.

³ Mare theome filo glanini puhigna God te mala toghodi naiknore te mala au doglo ka tathagna mana na. Mare fariuriu leghuni kolho unha te magnahagheni thedi na, eghuteuna mare theome snakreni God mala toghodi ka puhi te mala au doglo ka tathagna God na.

⁴ Nu Kraes la mei fagnagnafa u nogna vetula God na jateula kaisei nabrou te mala thokeni u thofno nakarha na. Eghuteuna iheire fateo te fatutuani ni mae Jisas, God ginauna toghodi mala naikno doglo.

U karha na malada tahati gnafa

⁵ Mae Moses neke rioriso eigna u vetula te mala toghodi naiknore te mala au doglo ka tathagna God na. Mana neke cheke eghu, “Ihei te leghudi fabrahu unha te gnafa te chekeni ka vetula na mala au doglo ka tathagna God, mana ginauna au fabrahu tifa tifa.”

⁶ Nu igne unha te chekeni ka u grioriso te blahi eigna puhi fatutuani te mala toghodi naiknore te mala au doglo ka tathagna God na, ne cheke eghu, “Thosei cheke eghu ka nagnafamu na, ‘Ihei nate haghe kligna na?’ ” Gaoghathogna na, “Mae ihei nate haghe kligna te mala hata soruni mae Kraes na?”

⁷ Jaola, thosei cheke eghu, “Ihei nate soru ka namonodi mae teke lehe hira?” Gaoghathogna na, “Mae ihei nate soru te mala hatani Kraes mala ke karha fapulo?”

⁸ Igne unha te chekeni ka grioriso te blahi na, “Chekegna God na la ari posahi ka iagho. Cheke igne la auhi ka foflomu iagho na nei la auhi ka nagnafamu iagho na.” Igne u farirhiu eigna u fatutuani te mala toutonuni koba tahati na.

⁹ Jame te cheke eghu iagho ke uludi naikno te gnafare, “Jisas na mae funei!” Eghuteuna te thofno fatutuani iagho ka nagnafamu na, God neke fakarha fapuloni mana kau glehe teuna, mana ginauna fakarha nigho iagho.

¹⁰ Naugna te fatutuani tahati ka nagnafada na, God na togho ghita mala au doglo ka tathagna thegna na. Eghuteuna te cheke thakleni tahati noda fatutuani na, God ginauna na fakarha ghita.

¹¹ Grioriso te blahi na cheke eghu eigna igne, “Ihei te fatutuani ni mana na, mana ginauna theome mamajani igne.”

¹² Naugna mae Jiu gre mare theome nhogri ka mae te theome Jiu gre. Tahati te gnafa na kaisei noda Lord ngala, mana tangomana te tusu lao glepo te keli ka iheire fateo te tore ka mana te mala toghodi na.

¹³ Te chekeni ka grioriso te blahi na, “Iheire fateo te tore ka Lord re, mana ginauna fakarhidi.”

¹⁴ Nu faꞌunha eghu tangomana mare te tore ka Lord na mala toghodi, jame te theome kulu fatutuani mare na? Theome tangomana. Ba, faꞌunha eghu fatutuani mare ka Lord, jame te theome kulu nomhini mare kaisei thoutonu eigna mana na? Ba, faꞌunha eghu nomhini mare u thoutonu na, jame te theo kaisei naikno te toutonuni ka mare u Nonomho te Keli na?

¹⁵ Ba, faꞌunha eghu ihei nate toutonuni u Nonomho te Keli na, jame te theo kaisei naikno te kuru teini God te mala toutonu ka mare na? Mana ne kurudi mare mala toutonu jateula te chekeni ka grioriso te blahi na, “Thofno keli fara te mei naiknore te mala toutonuni u Nonomho te Keli na!”

¹⁶ Nu theome naikno te gnafa Israel gre te magnahaghei nomhini u Nonomho te Keli igne. Jateula teke chekeni mae profet Isaia tifa ka grioriso te blahi ia, “Lord, kehaghu kolho te fatutuanidi unha te chekedi ghehati gre.”

¹⁷ Eghume te laseni tahati na, naiknore tangomana te fatutuani ni mae Jisas kate nomhi u Nonomho te Keli na, eghuteuna mare tangomana te nomhi Nonomho te Keli na kate toutonu ihei eigna Kraes na.

¹⁸ Nu iara na ghusna ka ghotilo, “Ba, naiknodi Israel gre jau theome nomhiu ngala si u Nonomho te Keli gnea?” Uve, mare la nomhihi, jateula te chekeni ka grioriso te blahi na ia eghu, “Nodi chekere la jiflahi ka naikno te gnafa ka nauthoglu gne, nodi chekere la tei thokehi ka namono te gnafa ka nauthoglu gne.”

¹⁹ Nu iara nake fapea ghusnai, “Ba, naiknodi Israel gre theome lase fakeliniu ngala si u Nonomho te Keli gnea?” Uve, mare nomhidi nu theome fatutuani eghu. Ulu lahu na mae Moses neke cheke eghu chekegna God na, “Iara ginauna togho ghami ghotilo mala goghotudi iheire te theo kaisei nodi namono thedi. Iara ginauna togho ghami ghotilo mala diꞌatamidi naikno te theome laseni kaisei glepo na.”

²⁰ Mae Isaia frane fara neke cheke eghu chekegna God na, “Iheire teke theome hiro ghau iara re mare nake filo deni ghau iara. Iara neke falalase ghau thegu ka iheire te theome ghusna ghau iara te mala toghodire.”

²¹ Nu eigna Israel na God ne cheke eghu, “Leghu narane na iara kilodi iheire te huhughu nei iheire te patugama fara, naugna iara magnahaghedi mare mala ke pulo mei ka iara.”