Letas Teke Riso Tei Mae Pol Ka Khiloau Rom 1 - Buka Blahi Ka Cheke Holo

¹ Iara mae Pol, kaisei nogna mae gloku Jisas Kraes. God neke kilo ghau iara mala nogna mae khuru nei mana neke vahi ghau iara mala toutonuni nogna Nonomho te Keli na.

² Tifa na, God neke nhaꞌa cheke ranghi ghita eigna u Nonomho te Keli igne, eghuteuna vahidi hatimare mae profet mala rioriso eigna u nhaꞌa cheke igne ka nogna grioriso te blahire.

^3-4 U Nonomho te Keli igne eigna Thugna Jisas Kraes noda Lord. Mana neke karha mei ka vikegna mae King Devet. Eghuteuna mana mae blahi jateula God eghu, eghuteuna God neke fakarha fapuloni mana ka nogna nolaghi biꞌo na nei mala laseni naiknore mana te thofno Thugna God na.

⁵ Iara neke hata nogna fablahi God igne ka Kraes, eigna mana neke vahi ghau iara mala loku jateula kaisei mae khuru eghu mala kilodi naiknore ka namono te gnafare mala fatutuani nei leghuni eghu mana.

⁶ Eghuteuna ghotilo iheire te riso ari iara tami igre jaola auhi ke lamnadi iheire God teke kilodi mala leghuni mae Jisas Kraes.

⁷ Letas te riso ari iara igne malami ghotilo hui naikno te au ka namono Rom, eigna God namha ghami ghotilo nei kilo ghamihi ghotilo mala nogna naikno blahi mana. Iara toreni nogna khokofakasai nei pharikeli God Kmada nei nogna mae Jisas Kraes noda Lord te mala au balumi.

Mae Pol ne magnahaghei tei filodi mare Rom

⁸ Ulu lahu na, iara cheke fakelini God eimi ghotilo ka nanghagna mae Jisas Kraes. Naugna naikno kmana heva heva ka nauthoglu igne nomhini nomi fatutuani ghotilo na.

⁹ Iara loku ranghini God balu nagnafagu fateo mala toutonuni u Nonomho te Keli eigna Thugna God. Eghuteuna God lase ghau iara te ghatho ghami ghotilo koba ka nogu tharaire.

¹⁰ Tutuani, leuleghu fata kate tarai na iara jaola toreni God mala tothora nabrou ranghi ghau te mala ari filo ghami ghotilo jare na. Te leghuni gaoghathogna God na, leghu lahu na iara ginauna na tangomana te ari posa ka ghotilo na.

¹¹ Naugna iara magnahaghei fara te ari filo ghami ghotilo na, eigna God magnahaghei ghau iara te ari togho ghami ghotilo mala hata ghotilo nogna nolaghi Tharunga te Blahi na te mala farhetadi nomi fatutuani re.

¹² Te ghathoni iara na nomi fatutuani ghotilo re ginauna togho ghau iara mala au heta fabrahu, eghuteuna nogu fatutuani iara na ginauna jaola togho ghami ghotilo mala au heta fabrahu.

¹³ Uve kheraguro, funu tifa te mei posa gognaro gne iara magnahaghe ghami ghotilo te laseni kmana fata iara au gaoghathogu fara te mala ari posa ka ghotilo na, nu keha glepo te fanogra ghau koba iara. Iara magnahaghei te mei mala toghodi kmana naikno jare ke lamnami ghotilo te leghuni mae Jisas jateula teke edi iara ke lamnadi keha naikno te theome mae Jiu.

¹⁴ Naugna iara magnahaghei fara te toghodi nafnata naikno te gnafa igre, neubane mae sikolu ba mae ihei te theome sikolu, neubane mae glalase ba te theome mae lalase.

¹⁵ Eghume ka gaoghatho igne te magnahaghei fara iara te ari posa ka ghotilo te mala toutonuni u Nonomho te Keli igne.

Nonomho te Keli nogna God

¹⁶ Tutuani, iara theome mamajani te toutonuni u Nonomho te Keli na, naugna Nonomho te Keli na nogna nolaghi God mala fakarhidi gnafa iheire te fatutuani ni mana. Ulu lahu na mana fakarhidi naikno Jiu iheire te nomhini igne, eghuteuna ke leghu na mana jaola fakarhidi iheire te theome Jiu.

¹⁷ U Nonomho te Keli gne cheke ranghi ghita eigna puhigna God te fadoglo ghita ke ulugna thegna kate thofno fatutuani ngala tahati mae Jisas. Jateula te chekeni ka grioriso te blahi, “Mae ihei te fatutuani ni God na, mana ginauna doglo ke ulugna God, eghuteuna mana ginauna hatini u karha fei tifa na.”

Diꞌa tagna God ranghidi naikno te gnafa

¹⁸ Diꞌatagna God na thakle mei kligna. Mana ginauna fatedi naiknore eidi nakhibo te gnafa nei nafnata glepo te jafra te gnafa eghu te edi mare re. Naugna nafnata puhi te edi mare igre fanograni chekegna God te tutuani na.

¹⁹ God ginauna fatedi, eigna naikno te gnafare lasenihi puhigna God na. Tutuani fara, God neke falalase la glolahi ka naiknore.

²⁰ Funu kate vuvuhagna nauthoglu igne, glepo eigna God igre neke theome kakhana ka tahati, nu tahati neke filo glanidi u tutuani nei nolaghi te fei au na ka glepo teke vuavuha mana re kolho. Eghume naugna glepo igre, naiknore theome tangomana te cheke eghu na, “Ghehati theome laseni God!”

²¹ Mare lasenihi God, nu mare theome ghatho tahuni nei theome cheke fakelini eghu mana. Unha teke ghathodi mare re theo nafudi kolho, eghuteuna nagnafadire thofno jafra fara.

²² Neubane cheke eghu mare, “Ghehati lalase fara,” mare la meomekrohi.

²³ Mare la lilisei fadeleihi puhi te mala ghatho tahuni God mae ihei te karha te tifa na. Eghuteuna mare hohoro mumuju jateula naikno, ba nanghaji ba mogo ba keha nafnata glepo te tautagu te au mata. Igre glepo te thufru sorudi mare re!

²⁴ Eghume God lisa laodihi mae igre mala leghudi kolho gaoghatho te diꞌa te au ka nagnafadire mala gnognoro fabrahu nei lalamadi eghu thinidire fari thedi.

²⁵ Mare tirodi fatutuani ni chekegna God te tutuani na, eghuteuna mare fatutuanidi kolho thoutonu te chaichaghire. Jaola, mare tufru sorudi nei loku ranghidi eghu glepo teke vuavuha God re. Nu mare ghatho ihoni te tufru soruni nei loku ranghini teu God mae ihei teke vuavuhadi gobigna lepo igre. God mae ihei naiknore naba te cheke fakelini tifa te tifa. Amen.

²⁶ Naugna igne, God ne lisa laodi nafnata naikno igre mala edi glepo te thofno diꞌa fara te magnahaghei mare ka nagnafadire. Tulao goro gaꞌasere theome thuru fodu ka khetodire, nu rehati thuru tafri kolho fari gaꞌase.

²⁷ Jaola mae nalha'ure lilisei puhi te mala thuru fodu ka gaꞌase na, eghuteuna mare magnahagheni fara kolho te thuru tafri kolho fari nalhaꞌu na. Mae igre eni fara puhi te diꞌa na fari thedi. Eghuteuna ka puhi igre God neke fatedi naikno igre, leghudi puhi te thofno jafra fara teke eni mare thedi na.

²⁸ Naugna mare theome magnahaghei te ghatho tahuni God na, aonu God ne lisa laodi mala leghudi kolho mare gaoghathodi te diꞌare. Eghuteuna ka puhi igne mare ne edi glepo te theome naba te mala edi naiknore.

²⁹ Mare fodu ka puhi te diꞌa, eghuteuna mare magnahaghei te hata glepo maladi thedi kolho, eghuteuna mare thono lalamadi fara naiknore. Mare fodu ka goghotu, falehe naikno, magra, saosagro, ghaoghatho fadiꞌani koba ihei, nei cheke pouporuni ihei.

³⁰ Mare tirodini God, nei cheke fadiꞌadi nanghadi keha naiknore, fahaehaghe nei fakliaklignadi thedi eghu kolho. Mare jaola ghathodi kmana nafnata puhi te mala eni unha puhi te diꞌa, nei theome ghatho tahudi idodi kmadire.

³¹ Mare theome ghaoghatho fakeli, eghuteuna mare lase chaichaghi fara, theome kokhonidi keha naiknore.

³² Mare lasenihi nogna vetula God na la cheke eidihi iheire te edi glepo igre, mare nabadi na mala lehe kolho. Neuba, naiknore heta ghedi fara ka puhi te diꞌare, nei jaola keli tadi ka keha naikno te edila puhi te diꞌare.