Nodi Khoje Hatimare Mae Jiu 90 - Buka Blahi Ka Cheke HoloFafati Buka ( Sam 90–106 ) Sam 90 Narkarhagna naikno na theome brahu kolho, nu God na au fabrahu tifa tifa Nogna tharai mae Moses mae nogna God. 1 Lord, funu tifa tela ghilei mei posa gognaro gne, iaghou ngala te jateula sugami teu ghehati na. 2 Tifa na kani theome vuavuha nga teku iagho nauthoglu igne nei theome vuavuha teku thogele igre teku na, iagho neke kulu au nekuhi. Iagho na God ngala funu tifa, gognaro gne nei nathuꞌu nauriha eghu tifa tifa. 3 Kate lehe na iagho nake hata fapulo ghami ka glose mala ke vuhai nakrofu. Uve, iagho nake atha fapulo ghami ghehati ka glose teke vuavuha ghami iagho na. 4 Ka iagho na kaisei thogha finogha na jateula te kaisei narane eghu kolho, jateula gnora tela salaꞌu arihi eghu, nei jateula kaisei aoa tela ghosei tela salaꞌu ari hila bongi ia eghu kolho. 5 Iagho neke vuavuha ghami ghehati mala ghosei lehe kolho jateula khoꞌu te britha te kmerhu ghehati ra eghu. Uve, ghehati au katha vido kmoꞌei kolho jateula mifi eghu ka nauthoglu igne. Ghehati jateula buburu te kotu haghe majaghani hamerane ra eghu kolho. 6 Kate biꞌo haghe te kotu chechenge buburu na, chechenge buburu igre ginauna brango eghuteuna khoko soru pari fei grafi. 7 Diꞌatamu iagho na goigoni ghami ghehati. Uve, ghehati mhaghu nomi fara kate diꞌatamu iagho na. 8 Iagho filodi kolho nakhibomi ghehati re. Uve, neubane fariuriu pophoru ghehati nakhibomire, iagho filodi kolho. 9 Kate diꞌatamu na, iagho fakmoꞌei arini kolho naranemi ghehati te mala au ka nauthoglu igne na. Uve, ghehati ghosei lehe kolho jateula vido gaghafa te mei nei ghosei me salaꞌu ari teu ia eghu kolho. 10 Nakarhami ghehati ka nauthoglu igne na thokeni kolho fitu salei finogha, jame te nheta thinimi ghehati gre na, ghehati ginauna thokeni kolho nhana salei finogha na. Neubane eghu ngau, kmana puhi nei diꞌanagnafa eghu thoke ghami ghehati. Uve, theome raugha ngala ghehati glehemi na. 11 Theo kaisei naikno te filo glani u nolaghi te diꞌatamu iagho ka ghehati igne. Naugna nou nolaghi iagho na thono biꞌo fara. Uve, theo kaisei naikno te filo glani u namhagu nate thoke ghami ghehati kate diꞌatamu iagho ka ghehati ginauna. 12 Falase meini sagho mala laseni ghehati te kmoꞌe kolho nakarhami gne, mala gaoghatho fakelini ghehati eigna nakarhami na. 13 Lord God, niha fata diꞌatamu ka ghehati sagho ia? Kokhoni mei ghami ghehati sagho eigna ghehati gne nou naikno gloku iagho. 14 Leuleghu hamerane na, falase meini sagho ka ghehati nou namha te biꞌo na. Jame te eghu iagho na, ghehati ginauna na koje nei glealeꞌa eghu fabrahu. 15 Faglealeꞌa ghami ghehati sagho, mala ghatho ihodi ghehati diꞌanagnafa biꞌo teke thoke ghami ka finogha tifa ra. 16 Ghehati gne nou mae gloku iagho, snakre ghami ghehati sagho mala filodi ghehati nou gloku biꞌo te edi iagho ra. Uve, snakredi iheire nate karha mei ka vikemi ghehati gre mala filoni nou nolaghi biꞌo iagho na. 17 Lord, iagho ngala nomi funei ghehati na. Tusu mei sagho glepo te keli ka ghehati. Togho mei ghami sagho ka gobigna lepo te edi ghehati ra mala ke edi fakeli ghehati. |
© 2022, Wycliffe Bible Translators , Inc. All rights reserved.
Wycliffe Bible Translators, Inc.