Nodi Khoje Hatimare Mae Jiu 89 - Buka Blahi Ka Cheke Holo

Sam 89 Khoje eigna nogna nhaꞌa cheke God

Nogna khoje mae Ethan kaisei mae vikegna mae Esra.

¹ Lord God, iara ginauna kojeni koba nou namha biꞌo iagho na, nei iara ginauna toutonuni koba eigna puhi te tajini iagho u nou nhaꞌa cheke na.

² Iara laseni nou namha biꞌo iagho na ginau au fabrahu, eghuteuna puhi te tajini iagho nou nhaꞌa cheke na igne jateula maloa te au fabrahu ana eghu.

³ Iagho neke cheke eghu, “Iara neke enihi kaisei nhaꞌa cheke ka mae Devet nogu mae gloku teke vahini iara tifa ia.

⁴ Iara neke cheke eghu ka mae Devet, ‘Uve, vikemu iagho na ngala te mala king koba na, eghuteuna mare na mae nheta koba.’ ”

⁵ Lord God, hatimare maedi kligna re, mare koje nei kilo fnakno nigho eghu iagho eidi glepo te keli te edi iagho ra. Uve, hatimare mae engel te blahi, mare koje eigna puhi te keli te tajidi iagho nou nhaꞌa cheke ra.

⁶ Lord God, theo kaisei naikno te au kligna te jateula iagho teuna. Uve, neubane engel puhidire theome keli kolho jateula puhimu iagho eghu.

⁷ Kaisei iagho God ngala te mhaghu nigho nei ghatho tahu nigho teu tothoghei engel di klignare. Uve, kaisei iagho ngala te fnakno ke klignadi mare te hui na. Naugna igne te kilo fnakno nigho mare na.

⁸ Lord God, kaisei iagho ngala te au nolaghi biꞌo na. Theo kaisei naikno te au nolaghi biꞌo jateula iagho teuna. Lord God, kaisei iagho ngala te tangomana te tajidi nou nhaꞌa chekere.

⁹ U thongna biꞌo na au nolaghi biꞌo fara, nu iagho themu ngala te batuni nei saghe leghuni teuna. Ka vido te galo biꞌo na, iagho ngala te tangomana te fabeatani na.

¹⁰ Iagho neke faleheni mogo biꞌo ka thongna te kiloi Rehab. Uve, iagho neke tapla sorudi nou naokare ka nou nolaghi biꞌo na.

¹¹ Maloa nei nauthoglu teu igre nou iagho kolho. Uve, iagho ngala teke vuavuhani nauthoglu igne baludi gobigna lepo te au ke lamnagna igre.

¹² Iagho ngala teke vuavuhadi namono te gnafa, funu ke raru te posa ke mhata. Thogele Tebo nei Thogele Hemon teu igre glealeꞌa fara jateula naikno eghu glealeꞌa nei koje kilo fnakno nigho eghu.

¹³ Lord God, iagho ngala te au nolaghi te mala vuavuhadi gobigna lepore! Uve, nou nolaghi iagho na thono biꞌo fara.

¹⁴ Iaghou ngala King na eghuteuna puhimu iaghore kafe doglo fara. Iagho fatedi koba naiknore ka puhi te doglo fara. Gobigna lepo te edi iagho re falaseni nou namha biꞌo iagho na ka naiknore, eghuteuna iagho tajini fabrahu nou nhaꞌa cheke na.

¹⁵ Iheire te koje kilo fnakno nigho iagho gre ngala te glealeꞌa nodi na, naugna iagho ne keli fara ranghidi, nei kaisei phile baludi.

¹⁶ Iaghou ngala te faglealeꞌadire, funu hamerane posa fei grafi. Eghuteuna mare kilo fnakno nigho eidi puhimu iagho te doglore.

¹⁷ Iaghou ngala te togho ghami ghehati te tapla sorudi nomi naoka kau magra na. Uve, iagho neke togho ghami ghehati mala uluni ghehati magra na, naugna iagho ne namha ghami ghehati fara.

¹⁸ Lord God, iagho ngala te vahini naikno na te mala saghe leghu ghami ghehati na. Uve, iagho ngala te blahi na nei iagho ngala nomi God ghehati mae Israel, nei iagho ngala teke vahini mae king te mala funei fruni ghami ghehati na.

¹⁹ Tifa tifa na, iagho neke mei ka nou mae gloku te kelire neke cheke eghu ka mare ka mifi na, “Iara neke toghoni kaisei mae sitei mala kaisei mae soldia te fnakno fara nanghagna na. Eghuteuna iara neke vahini mana ka mare mala king.

²⁰ Iara ngala teke tofa oel blahi na ka phaꞌugna nogu mae gloku Devet. Uve, igne fagaglanagna te vahini mana te mala king na.

²¹ Iara ngala te fahetani mana na, eghuteuna nogu nolaghi iara na ginau au fabrahu balugna mana.

²² Nogna naoka mana re ginauna theome tangomana te uluni mana ka magra na, nei mare theome tangomana te tapla soruni mana na.

²³ Iara ginauna roꞌedi nogna naoka mana re, eghuteuna iara ginauna falehedi iheire te tirodini mana re.

²⁴ Nu iara ginauna namhani fara mana, nei mala kaisei phile balugna mana eghu fabrahu. Eghuteuna iara ginauna mala toghoni mana fabrahu mala nheta mana kau magra na.

²⁵ Iara ginauna tusu ranghini mana nolaghi mala funei frunidi mana naikno te au ka vido te funu ka thongna Mediterenian tei posa ka Khoꞌu biꞌo Iufretis.

²⁶ Mae Devet ginau cheke eghu ka iara, ‘Iagho nogu God iara, nei iagho kmagu iara na. Uve, iaghou ngala te mala saghe leghu ghau nei fakarhi ghau teu iara na.’

²⁷ Mana ginau na mala jateula mae thugu teke kulu karha mei ka iara ra eghu, eghuteuna mana ginauna mala kaisei mae nafnakno ke uludi hatimare mae king te gnafa ka nauthoglu igne.

²⁸ Nogu namha biꞌo iara ranghini mana na ginauna theome gnafa, eghuteuna nhaꞌa cheke teke eni iara ka mana ia na au fabrahu tifa tifa.

²⁹ Leuleghu fata na kaisei mae ka vikegna mana na ngala te mala mae king na, eghuteuna iara ginauna kaisei mae king ka vikegna mana igne ginauna funei frunidi fabrahu naiknogna Israel jateula maloa te au fabrahu te theome gnafa kligna ana eghu.

^30-32 “Nu jame te theome leghudi mare nogu vetula iara re, nei theome leghudi puhigu iara re teuna, iara na thofno paradi fara ngala mare, naugna mare ne tapla jafra ka nakhibo. Eghuteuna jame te huhughuni mare u vetula te farirhiudi iara mare igne na, nei jaola theome edi mare unha mala edi mare teku iara na, iara ginauna na paradi fara ngala mare eidi nakhibo teke edi mare re.

³³ Nu iara ginauna na namhani fabrahu mae Devet, eghuteuna iara ginauna tajini nogu nhaꞌa cheke teke eni ka mana na.

³⁴ Uve, iara ginauna na theome ari fadidiꞌa nogu nhaꞌa cheke balugna mana na, eghuteuna iara ginauna na theome tuthughu kaisei glepo ka nhaꞌa cheke tuana.

³⁵ Iara neke nhaꞌa chekehi ka nanghagu te blahi ne, eghume iara theome tangomana te chaghini mae Devet.

³⁶ Vikegna mana na ginauna na theome tangomana te ari te khusu na. Uve, mare ginau au fabrahu jateula naprai te au fabrahu ka maloa na ana eghu mala king fabrahu.

³⁷ Leuleghu fata na kaisei ka mare ngala nate mae king na. Uve, mala jateula glaba te au fabrahu ka maloa na ana eghu, vike igne ginauna na jaola au fabrahu. Eghuteuna glaba te au ka maloa na ana ngala u fagaglana gna te thofno tutuani iara na.”

³⁸ Nu Lord God, mae king teke vavahi iagho ia, gognaro na iagho kela diꞌatamu ka mana. Uve, iagho tirounihi mana, la lisa kokonihi mana.

³⁹ Iagho la theome leghunihi u nhaꞌa cheke teke eni iagho ka nou mae gloku gne. Iagho jateula te hata nogna khepi mana na te koko lao ka chopu ra eghu kolho.

⁴⁰ Iagho la roꞌe soru nounihi gringni thina ka nogna namono mana na. Uve, iagho la thofno roꞌenihi la theo tokadi vido te mala poru mana re.

⁴¹ Naikno te gnafa te salaꞌu ka vido tuana, mare blau fateo nogna glepo mana re, eghuteuna naikno te au namo teu ka mana re mare maꞌeni mana.

⁴² Iagho neke snakredi hatimare nogna mae naoka mana re mala tapla faparini mana kau magra na, aonu gognaro na mare kelitadi fara te filoni mana te theome nheta.

⁴³ Iagho neke goigonidi nogna glepo mana te mala magra re, eghuteuna iagho snakredi hatimare nogna mae naoka mana re mala uluni mana u magra na.

⁴⁴ Iagho neke hata fadeleihi nogna nolaghi mae king na ka mana, eghuteuna iagho gognaro na theome magnahagheni hila mana te mae king na.

⁴⁵ Gognaro na iagho magnahagheni mana te ghosei te mae khuekuꞌe na, eghume mana na thofno mamaja nogna fara.

⁴⁶ Lord God, iagho ginauna na poru nou fabrahu ngala sia? Ba? Na niha fata thunu fabrahu jateula khaꞌaghi eghu si diꞌatamu iagho na ka iara?

⁴⁷ Ghatho mei ghau iara sagho. Iara gne khogla naikno kolho, eghuteuna nakarhagu iara na theome brahu kolho. Iagho neke vuavuha ghami ghehati mala karha neku, eghuteuna ke leghu na ghehati ginauna mala kafe lehe kolho.

⁴⁸ Ihei gne nate karha fabrahu te theome lehe na? Tore, theo kaisei naikno nate rikha kokoni u glehe na.

⁴⁹ Lord, aheva gne nou namha biꞌo iagho ranghi ghami ghehati gognaro na, jateula teke fakakhana iagho ka ghehati tifa ia teuna? Lord, aheva gne nou nhaꞌa cheke iagho teke edi ka mae Devet ra?

⁵⁰ God, naikno gre la cheke fapari ghau iara, thosei ghatho iho ghau iara sagho. Uve, naikno bongihehe igre eꞌei puhi te mala thoke ghau iara na.

⁵¹ Lord God, hatimare mae naoka igre mare cheke faparini mae king teke vavahi iagho igne. Ka vido aheva te tei mana na, mare maꞌeni kolho mana.

⁵² Tahati cheke fakelini Lord tifa tifa! Amen! Amen!